រដ្ឋមន្ត្រីក្រសួងសេដ្ឋកិច្ច៖ ពន្ធអាម៉េរិក និងជម្លោះព្រំដែន ជាឱកាសសម្រាប់កម្ពុជាអភិវឌ្ឍន៍សមត្ថភាព-ពង្រឹងភាពប្រកួតប្រជែង

លោក អូន ព័ទ្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី​ក្រសួង​សេដ្ឋកិច្ច បាន​គូស​បញ្ជាក់​ថា បញ្ហា​ពន្ធ​របស់​សហរដ្ឋ​អាម៉េរិក និង​ការផ្ទុះ​ឡើង​នូវជម្លោះព្រំដែនដែលបង្កឡើង​ដោយប្រទេសជិតខាងរបស់កម្ពុជា​នា​ពេល​ថ្មី​ៗ​នេះ គឺ​ជា​ឱកាស​បន្ថែម​សម្រាប់​កម្ពុជា ក្នុង​ការ​អភិវឌ្ឍ​សមត្ថភាព និង​ពង្រឹង​ភាព​ប្រកួត​ប្រជែង​។

កាលពីពេលថ្មីៗកន្លងទៅនេះ លោក ឧបនាយករដ្ឋមន្ត្រី អូន ព័ទ្ធមុនីរ័ត្ន បាន​លើក​ឡើង​ថា ក្នុងឆ្នាំ ២០២៥ នេះ ការដាក់ពន្ធគយបដិការរបស់សហរដ្ឋអាម៉េរិក និង​ការផ្ទុះ​ឡើង​នូវជម្លោះព្រំដែនដែលបង្កឡើងដោយប្រទេសជិតខាងរបស់កម្ពុជា​នាពេលថ្មីៗនេះ បាន​បន្ថែម​សម្ពាធ​មកលើសេដ្ឋកិច្ចកម្ពុជា។

លោកឧបនាយករដ្ឋមន្រ្តីបានលើកបន្ថែមទៀតថា៖«នៅចំពោះមុខបញ្ហាប្រឈមទាំងនេះ ទន្ទឹមនឹងការឆ្លើយតបដោយម៉ឺងម៉ាត់ ប្រកបដោយការទទួលខុសត្រូវខ្ពស់ ក្នុងការការពារអធិបតេយ្យ បូរណភាពដែនដី និងកិត្យានុភាពជាតិ រាជរដ្ឋាភិបាល​បាន​និង​កំពុង​តាមដាន និង​វាយតម្លៃ​ស្ថានការណ៍ជាក់ស្តែង​ដោយយកចិត្តទុកដាក់បំផុត ព្រមទាំង​ថ្លឹងថ្លែង និង​ត្រៀមដាក់​ចេញ​នូវវិធានការឆ្លើយតបមុតស្រួចលើគ្រប់​វិស័យ​ទាំងឡាយសំដៅ​ម្ខាងរក្សាចលនការ​នៃការអភិវឌ្ឍសង្គម-សេដ្ឋកិច្ចជារួម»។

​ម្ខាងទៀត ប្រែក្លាយបញ្ហាប្រឈមទាំងនេះ​ឱ្យ​ក្លាយ​ទៅ​ជា​កាលានុវត្តភាព ជាពិសេសសម្រាប់​ការ​លើក​កម្ពស់​សហគ្រាសធុនតូច និង​មធ្យម​ខណៈ​ដែលស្មារតីស្នេហាជាតិ និង​ចលនារួបរួមជាតិ​កាន់តែមានសន្ទុះខ្លាំង​ឡើងដែលជំរុញដល់ការលើកស្ទួយ និង​ការ​ឱ្យតម្លៃខ្ពស់​ដល់ផលិតផលក្នុងស្រុក​។

លោក ឧបរដ្ឋមន្ត្រី បាន​សង្កត់​ធ្ងន់​ថា «ការណ៍នេះ​ គឺជាកាលានុវត្តភាពមួយដ៏វិសេស​សម្រាប់ការអភិវឌ្ឍសមត្ថភាព ការធ្វើពិពិធកម្ម ផលិតផលក្នុងស្រុក និង​ការពង្រឹងឧត្តមភាពប្រកួតប្រជែងរបស់កម្ពុជា​ដែលនឹងរួម​ចំណែកដល់ការជំរុញ​កំណើនសេដ្ឋកិច្ច និង​ការពង្រឹងឯករាជ្យភាពនៃសេដ្ឋកិច្ចជាតិ»។

លោក​អូន ព័ទ្ធមុនីរ័ត្ន បាន​បន្ថែម​ថា និយាយជារួម រាជរដ្ឋាភិបាល​នឹងបន្តពង្រឹងភាពប្រកួតប្រជែង​ភាពរឹងមាំ និង​ភាពធន់​ទៅនឹងវិបត្តិ​តាមរយៈ​ការកែលម្អបរិយាកាសធុរកិច្ច​ ការបន្តធ្វើពិពិធកម្មសេដ្ឋកិច្ច ការ​ពង្រឹង​​លទ្ធភាព​លើកកម្ពស់​ខ្សែ​ច្រវាក់ផ្គត់ផ្គង់ក្នុងស្រុក សំដៅជំរុញការតភ្ជាប់​ទៅនឹង​ខ្សែច្រវាក់ផ្គត់ផ្គង់ក្នុងតំបន់ និង​សកល ការចាប់​យក​សកម្មភាព​ផលិតកម្ម​ដែល​បង្កើត​តម្លៃបន្ថែមខ្ពស់ ការបង្កើត​ការងារ​សម្រាប់​កម្លាំង​ពលកម្ម​ដែល​មានជំនាញ ការពង្រីក​មូលដ្ឋានសេដ្ឋកិច្ចជាតិ​ឱ្យកាន់តែទូលំទូលាយ។

សូម​ជម្រាប​ថា ផ្អែកលើសូចនាករម៉ាក្រូ សេដ្ឋកិច្ច ៧ ខែ ដើមឆ្នាំ ២០២៥ សេដ្ឋកិច្ចកម្ពុជា នៅបន្ត​មានចលនការល្អ ដោយក្នុង​នោះ​ទោះបីវិស័យខ្លះហាក់មិនទាន់អាចស្ទុះងើបខ្លាំង​ដូចការរំពឹងទុក ប៉ុន្តែ​វិស័យមួយចំនួន​ក៏សម្រេចបានវឌ្ឍនភាពល្អជាងការរំពឹងទុក ខណៈ​វិស័យកសិកម្ម​នៅបន្តរក្សាបាននូវស្ថិរភាព​នៃកំណើន​៕

ដោយ​៖ ឌិន ថារី