ឥណ្ឌូណេស៊ីកត់ត្រាកំណើនភ្ញៀវទេសចរអន្តរជាតិដល់ ៨,៥ លាននាក់ ត្រឹម ៧ ខែដើមឆ្នាំ

ប្រទេសឥណ្ឌូណេស៊ីបាន​ទទួលភ្ញៀវទេសចរអន្តរជាតិប្រមាណ ៨,៥ លាននាក់ ដោយ​កើនឡើងប្រមាណ ១០ ភាគរយ ក្នុងរយៈពេល ៧ ខែដើមឆ្នាំ ធៀបនឹងរយៈពេលដូចគ្នាកាលពីឆ្នាំមុន និងជិតពាក់កណ្ដាលនៃគោលដៅប្រចាំឆ្នាំ។ នេះបើតាមការចុះផ្សាយរបស់ភ្នាក់ងារព័ត៌មាន​រដ្ឋ Antara។

យោងតាមការិយាល័យស្ថិតិឥណ្ឌូណេស៊ី ប្រទេសនេះ​បាន​ទទួល​ភ្ញៀវទេសចរប្រមាណ ១,៤៨ លាននាក់ នៅខែកក្កដា ដោយ​កើនឡើង ១៣ ភាគរយ ដែលនេះជាការបន្តកំណើនប្រចាំខែ ក្រោយធ្លាក់ចុះ ៣ ខែជាប់ៗគ្នានៅដើមឆ្នាំ។

ឥណ្ឌូណេស៊ីកំណត់គោលដៅទាក់ទាញភ្ញៀវទេសចរអន្តរជាតិ​ឱ្យបាន​ចន្លោះពី ១៤,៦-១៦ លាននាក់នៅឆ្នាំនេះ។

រដ្ឋមន្ត្រីក្រសួងទេសចរណ៍របស់ប្រទេស លោកស្រី Widiyanti Putri Wardhana បាននិយាយថា វិស័យទេសចរណ៍របស់ឥណ្ឌូណេស៊ីកំពុងដំណើរការ «ការស្ទុះងើប​ឡើងវិញដ៏គួរឱ្យកត់សម្គាល់»។

លោកស្រីបានបន្ថែមថា ឥណ្ឌូណេស៊ីមិនគិតតែលើចំនួនអ្នកទស្សនាប៉ុណ្ណោះទេ តែក៏ផ្ដោតផងដែរ​លើការផ្តល់ជូនដល់ភ្ញៀវនូវសេវាកម្មទេសចរណ៍ប្រកបដោយគុណភាព ការថែរក្សាបរិស្ថាន និងវប្បធម៌ និងការធានាអត្ថប្រយោជន៍សម្រាប់សហគមន៍មូលដ្ឋាន។

កាលពីដើមខែនេះ ឥណ្ឌូណេស៊ីបានបើកដំណើរការកម្មវិធីទូរស័ព្ទថ្មីមួយដែលមានឈ្មោះថា «All Indonesia» ដើម្បីសម្រួលដល់នីតិវិធីនៃការចូលទៅក្នុងប្រទេស សម្រាប់ភ្ញៀវទេសចរអន្តរជាតិ។ អាជ្ញាធរ​ក៏​បាន​ដាក់​ពង្រាយ​ក្រុម​ការងារ​ល្បាត​អន្តោប្រវេសន៍​នៅ​កោះ​បាលី ដើម្បី​ដោះស្រាយ​ការ​រំលោភ​បំពានណាមួយដោយ​​ជនបរទេសផងដែរ។