ប្រជាជនឥណ្ឌា ងាកទៅបន្ទោសរដ្ឋាភិបាល ដែលអនុញ្ញាតឲ្យពិធីបុណ្យសាសនា ប្រព្រឹត្តទៅបាន

គំនរសាកសព ត្រៀមសម្រាប់ការបូជាទ្រង់ទ្រាយធំនៅក្នុងទីក្រុងញូវដែលី ស្របពេលវីរុសកូវីដ-១៩ បំប្លែងខ្លួនដ៏សាហាវបំផុតលើពិភពលោក កំពុងវាយប្រហារប្រទេសឥណ្ឌា។

ក្រុមគ្រួសារនៃអ្នកស្លាប់ ដែលកំពុងមានកំហឹង បានដាក់ការស្តីបន្ទោសលើរដ្ឋាភិបាល ចំពោះការដែលអនុញ្ញាតឲ្យពិធីបុណ្យសាសនាដ៏ធំមួយ ប្រព្រឹត្តទៅបាន។

ពិធីបុណ្យ Kumbh Mela នៅលើច្រាំងទន្លេគង្គា បានធ្វើឡើងរៀងរាល់១២ឆ្នាំម្តង និងបានប្រមូលផ្ដុំអ្នកកាន់សាសនាហិណ្ឌូជាង៥លាននាក់។

គ្មាននរណាម្នាក់ពាក់ម៉ាសទេនៅក្នុងហ្វូងមនុស្សដ៏ក្រាស់ក្រែល ដែលបានប្រមូលផ្តុំគ្នាសម្រាប់ពិធីងូតទឹកតាមបែបសាសនានេះ។

នៅពេលពិធីបុណ្យនេះចាប់ផ្តើមកាលពីពីរសប្តាហ៍មុន ប៉ូលិសបានទទួលស្គាល់ថា ពួកគេគ្មានសិទ្ធិអំណាចក្នុងការអនុវត្តច្បាប់ប្រឆាំងជំងឺកូវីដ-១៩ទេ។

ការផ្គត់ផ្គង់អុកស៊ីសែនមានកម្រិតទាបនៅក្នុងរដ្ឋធានី ដែលជាហេតុបង្ខំឲ្យមន្ទីរពេទ្យជាច្រើន ត្រូវបិទទ្វារឈប់ទទួលអ្នកជំងឺ។

ពលរដ្ឋម្នាក់ឈ្មោះ Sairi អាយុ៤១ឆ្នាំ បានប្រាប់ The Mirror ថា នាងនិងកូនប្រុសឈ្មោះ Veeir អាយុ៩ឆ្នាំ មានផ្ទុកជំងឺកូវីដ-១៩ ប៉ុន្តែមិនអាចជួយបានទេ បើទោះបីជាគាត់មានបញ្ហាដកដង្ហើមធ្ងន់ធ្ងរ ដែលបណ្តាលមកពីការបំពុលខ្យល់ដ៏អាក្រក់ក៏ដោយ។

ចំណែក មេធាវីមានមូលដ្ឋាននៅទីក្រុងញូវដែលីក៏បាននិយាយផងដែរថា “គ្រប់គ្នា កំពុងស្តីបន្ទោសដល់ការប្រមូលផ្តុំនយោបាយ ហើយពិធីបុណ្យ Kumbh Mela បានធ្វើឡើងដោយមិនមានការទទួលខុសត្រូវឡើយ។ វាជាបទឧក្រិដ្ឋ”។

អង្គការសុខភាពពិភពលោកបានហៅស្ថានភាពនេះថា “ហួសពីរន្ធត់” ហើយកំពុងបញ្ជូនបុគ្គលិកចំនួន២,៦០០នាក់និងការផ្គត់ផ្គង់បន្ថែមជាច្រើនទៀត៕

ប្រែសម្រួលដោយ៖ Vann Vann

ប្រភព៖ Mirror

ចុចអាន៖ អ្នកដំណើរចេញពីឥណ្ឌា ៥២នាក់រកឃើញឆ្លងកូវីដ ពេលទៅដល់ហុងកុង ទោះតេស្តអវិជ្ជមាន មុនពេលឡើងយន្តហោះ