ទើបខែមិថុនាប៉ុណ្ណោះ តែចំនួនអ្នកស្លាប់ដោយសារជំងឺកូវីដ-១៩ ជាសកល កើនលើសឆ្នាំ២០២០ បាត់ទៅហើយ

កាសែត The Wall Street Journal បានរាយការណ៍កាលពីថ្ងៃសុក្រថា ត្រឹមពាក់កណ្តាលឆ្នាំ២០២១ប៉ុណ្ណោះ ប៉ុន្តែចំនួនអ្នកស្លាប់ដោយសារជំងឺកូវីដ-១៩ ជាសកល បានកើនលើសចំនួនស្លាប់ក្នុងឆ្នាំ២០២០ បាត់ទៅហើយ ថ្វីបើមានយុទ្ធនាការចាក់វ៉ាក់សាំង នៅតាមបណ្តាប្រទេសអ្នកមានក៏ដោយ។

កាសែតនេះ បានដកស្រង់ទិន្នន័យពីសកលវិទ្យាល័យ Johns Hopkins University ដែលបានបង្ហាញថា “ក្នុងរយៈពេលតិចជាង៦ខែប៉ុណ្ណោះសម្រាប់ពិភពលោក ចំនួនអ្នកស្លាប់ដោយសារកូវីដកើនជាង ១.៨៨ លាននាក់នៅឆ្នាំនេះ”។

ចំនួននេះបង្ហាញថា ជំងឺរាតត្បាតបានរាលដាលដល់ផ្នែកផ្សេងៗនៃពិភពលោកមិនស្មើភាពគ្នា ដោយប្រទេសក្រីក្រកាន់តែរងផលប៉ះពាល់ និងរងគ្រោះ មុនពេលពួកគេទទួលបានវ៉ាក់សាំងដែលបានផ្តល់ផលប្រយោជន៍ដល់ប្រទេសអភិវឌ្ឍន៍។

ខណៈពេលដែលបណ្តាប្រទេសលោកខាងលិច ដូចជាសហរដ្ឋអាមេរិក កាណាដានិងចក្រភពអង់គ្លេស មានចំនួនអ្នកស្លាប់ទាបនិងការថយចុះនៃអត្រាស្លាប់ដោយសារតែការចាក់វ៉ាក់សាំងទ្រង់ទ្រាយធំនោះ ជំងឺរាតត្បាតនេះកំពុងបង្កើនការវាយលុកកាន់តែខ្លាំង នៅផ្នែកខ្លះនៃទ្វីបអាស៊ីនិងអាមេរិកឡាទីន ដែលជំរុញឲ្យមានការស្លាប់ជាសកលកាន់តែខ្ពស់៕

ប្រែសម្រួល៖ Vann Vann

ប្រភព៖ Xinhua