ពីមុន ស្ទឹងត្រែង ១ ថ្ងៃរកឃើញអ្នកឆ្លងកូវីដជាង ៣០ នាក់ ពេលនេះបីថ្ងៃត្រឹម តែជាង ៣០ នាក់ប៉ុណ្ណោះ

រដ្ឋបាលខេត្ត ស្ទឹងត្រែង កន្លងមកបានប្រកាសរកឃើញអ្នកឆ្លងកូវីដ-១៩ ក្នុងមួយថ្ងៃមិនក្រោម ៣០នាក់ ថ្ងៃខ្លះដល់ជាង ៦០ នាក់ក៏មាន តែពេលនេះ  រដ្ឋបាលខេត្តបានប្រកាសរកឃើញ​បីថ្ងៃ​ចុងក្រោយ​ត្រឹម​តែជាង ៣០នាក់ប៉ុណ្ណោះ។

ក្នុងរយៈពេល ៣ថ្ងៃចុងក្រោយនេះ អាជ្ញាធរបានប្រកាសនៅថ្ងៃទី ៣០ មិថុនា រក​ឃើញអ្នកឆ្លងកូវីត១០ នាក់ ថ្ងៃទី ០១ កក្កដា រកឃើញអ្នកឆ្លង ១៦នាក់ និងនៅថ្ងៃទី ០២ កក្កដា​ ឆ្នាំ ២០២១ នេះ រដ្ឋបាលខេត្តបានប្រកាសគិតត្រឹមម៉ោង ៥:០០ រសៀលថ្ងៃទី ០២ កក្កដា នេះ រកឃើញអ្នកឆ្លងកូវីដត្រឹមតែ ៩នាក់ និងមានអ្នកជាសះស្បើយ ០៥ នាក់។

អត្រាថយចុះនៃការឆ្លងរីករាលដាលជំងឺកូវីដ១៩ ប៉ុន្មានថ្ងៃចុងក្រោយនេះ គឺដោយសារមានការ​ខិតខំ​ប្រឹងប្រែង ពីមន្ទីរសុខាភិបាលនិងរដ្ឋបាលខេត្ត បានធ្វើការផ្សព្វផ្សាយ អំពាវនាវ​ឲ្យ​ប្រជាពលរដ្ឋក្នុងខេត្តទាំងអស់ ចូលរួមលើកកម្ពស់ការប្រុងប្រយ័ត្ន និងអនុវត្តតាមវិធានសុខាភិបាល ៣ការពារ និង៣កុំ ដែលជាវិធានការមានប្រសិទ្ធភាពបំផុតសម្រាប់យើងគ្រប់គ្នា។

ក្រោយពីរដ្ឋបាលខេត្តបានធ្វើការផ្សព្វផ្សាយ និងអំពាវនាវឱ្យប្រជាពលរដ្ឋមានការយល់ដឹងពីការ​រីករាលដាល​នៃជំងឺកូវីដ-១៩ ត្រូវបានគេពិនិត្យឃើញថា អ្នកពាក់ព័ន្ធផ្ទាល់បានទៅយកសំណាក​វិភាគ ហើយ​បានរកឃើញ​មេរោគកូវីដ-១៩ ត្រូវបានក្រុមគ្រូពេទ្យយកទៅព្យាបាលនៅ​មណ្ឌលចត្តាឡីស័កកម្រិត ២។ ចំណែកអ្នកពាក់ព័ន្ធប្រយោលបាន​ធ្វើចត្តាឡីស័កនៅផ្ទះរបស់ខ្លួន​ចំនួន ១៤ ថ្ងៃ ផងដែរ។

រដ្ឋបាលខេត្តស្ទឹងត្រែងសូមអំពាវនាវឲ្យបងប្អូនប្រជាពលរដ្ឋទាំងអស់ រួមជាមួយភាគីពាក់ព័ន្ធ នាំគ្នាចូលរួម អនុវត្តវិធានសុខាភិបាលបន្តទៀត ព្រោះការអនុវត្តបែបនេះត្រូវបាន​គេមើល​ឃើញថា រយៈ​ពេលបី​ថ្ងៃ​ចុងក្រោយនេះ ខេត្ត​ស្ទឹងត្រែង អត្រា​ឆ្លងកូវីដ១៩មានការ​ថយចុះជាបន្តបន្ទាប់ ហើយ​ពិតជាមានប្រសិទ្ធភាពបំផុត។

ខេត្តស្ទឹងត្រែងគិតត្រឹមម៉ោង ៥:០០ រសៀលថ្ងៃទី ០២ កក្កដាឆ្នាំ ២០២១នេះ មានអ្នកឆ្លងកូវីដ សរុប ២៨៩ នាក់ ស្រី ១៣៤ នាក់​អ្នក​ជា​សះស្បើយ ២១នាក់ស្រី ៩នាក់ ស្លាប់គ្មាន និងអ្នកកំពុង​សម្រាក​ព្យាបាល ២៦៨ នាក់​ស្រី ១២៥នាក់៕

អត្ថបទ៖ ងិនលីម