ក្រុងស្ទឹងត្រែងនឹងត្រូវបិទជាបណ្តោះអាសន្ន​​ក្រោយផ្ទុះជំងឺកូវីដប្រភេទដែលតា

អាជ្ញាធរខេត្តស្ទឹងត្រែងនឹងបិទក្រុងស្ទឹងត្រែងជាបណ្តោះអាសន្នក្រោយរកឃើញមានអ្នកឆ្លងជំងឺកូវីដ១៩​ប្រភេទដែលតាជាបន្តបន្ទាប់។

លោក ម៉ែន តុង នាយករងរដ្ឋបាលសាលាខេត្តស្ទឹងត្រែង បានប្រាប់នៅរសៀលថ្ងៃទី១៧សីហានេះថា ក្រុងស្ទឹងត្រែងនឹងត្រូវបិទហើយដោយសារមានករណីឆ្លងជំងឺកូវីដ១៩ប្រភេទដែលតា ចំនួន៧នាក់ហើយអ្នកឆ្លងទាំងនោះមានជាប់ពាក់ព័ន្ធទៅនឹងអាជីវករផ្សារនិងក្នុងសហគមន៍។

លោកបានបន្តថា «​ជាគោលការណ៍បើកាលណារកឃើញវីរុសដែលតាហើយអ្នកពាក់ព័ន្ធផ្សេងៗទៀតនៅក្នុងផ្សារនិងមូលដ្ឋានក៏ឆ្លងវីរុសដែលតានេះដែរ។ដូចនេះត្រូវតែបិទក្រុងហើយដើម្បីទប់ស្កាត់ការឆ្លងរីករាលដាលជាបន្តទៀត»។

យ៉ាងណាក៏ដោយ លោកបានបន្តទៀតថាចំពោះការបិទជាផ្លូវការរង់ចាំការសម្រេចរបស់លោកអភិបាលខេត្តនៅល្ងាចនេះ។

លោក បានបន្ថែមថារហូតមកដល់ពេលនេះខេត្តស្ទឹងត្រែងបានរកឃើញមានអ្នកឆ្លងជំងឺដែលតាចំនួន៩នាក់ហើយក្នុងចំណោមអ្នកឆ្លងជំងឺកូវីដ១៩សរុបចំនួន៧៥២នាក់អ្នកជាសះស្បើយចំនួន៤៩៥នាក់ កំពុងសម្រាកព្យាបាលចំនួន២៦១នាក់និងស្លាប់ចំនួន៦នាក់។

បើតាមក្រសួងសុខាភិបាល ចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃ ទី១៣ ខែសីហា ឆ្នាំ២០២១ កម្ពុជាបានរកឃើញអ្នកមានវិជ្ជមានរុសកូវីដ-១៩ ប្រភេទ ដែលតា (Data) លើពលករត្រលប់ ពីប្រទេសថៃ និងប្រទេសវៀតណាម អ្នកដំណើរមកតាមជើងហោះហើរបុគ្គលិកសុខាភិបាល មន្ត្រីរាជការ និងអ្នកភូមិនៅក្នុង សហគមន៍ សរុបទាំងអស់ចំនួន ៤៩៤ ស្ត្រី ២៤៣នាក់ និងបានប៉ះពាល់ដល់បណ្តា ២២ រាជធានី-ខេត្ត លើកលែងតែខេត្តចំនួន៣ ប៉ុណ្ណោះ គឺ ខេត្តកែប ខេត្តតាកែវ និងខេត្តក្រចេះ៕ ដោយ៖ សំអឿន