ប៉ូ​គីម​ថេ​ង សុតធីតា បង្ហាញសកម្មភាពរាំល្វតល្វន់លើក្បាលទូក ង ដើម្បីចូលរួមផ្សព្វផ្សាយប្រពៃណីខ្មែរ (មានវីដេអូ)

អតីតម្ចាស់​មកុដ Miss Grand Cambodia 2021 កញ្ញា ប៉ូ​គីម​ថេ​ង សុ​ត​ធីតា ទើបតែបញ្ចេញវីដេអូខ្លីមួយពីសកម្មភាពអង្គុយរាំយ៉ាងល្វតល្វន់លើក្បាលទូកង « មរតកកែវនេត្រាទិព្វ » របស់វត្តព្រែកលួង ដោយបង្ហាញទិដ្ឋភាពក្រុងភ្នំពេញដ៏សុីវិល័យ នាវេលាសូរិយាហៀបអស្តង្គត។

សកម្មភាពនេះ ក៏ត្រូវបានសាធារណជនសម្តែងការកោតសរសើរផងដែរ ដោយចាត់ទុកថា ជាគំនិតបំផុសប្រពៃណីខ្មែរដ៏ល្អផូផង់ ដែលរួមចំណែកផ្សព្វផ្សាយអត្តសញ្ញាណកម្ពុជា។

ដ្បិតតែឆ្នាំនេះ មានការផ្អាករៀបចំព្រឹត្តិការណ៍ធំសម្រាប់ព្រះរាជពិធីបុណ្យអុំទូកក៏ដោយ ប៉ុន្តែក្នុងនាមជាបវរកញ្ញាកម្ពុជាមួយរូប កញ្ញា ប៉ូ​គីម​ថេ​ង សុ​ត​ធីតា ក៏នៅតែចូលរួមចំណែកក្នុងការលើកស្ទួយ និងផ្សព្វផ្សាយមរតកវប្បធម៌ ដែលជាប្រពៃណី-ទំនៀមទម្លាប់ខ្មែរមួយនេះផងដែរ។

ទន្ទឹមនឹងការចូលរួមផ្សព្វផ្សាយពីព្រះរាជពិធីបុណ្យអុំទូក ដែលខិតចូលមកដល់ខាងមុខនេះដែរ កញ្ញា ប៉ូ​គីម​ថេ​ង សុ​ត​ធីតា ក៏សុំការអធ្យាស្រ័យពីសារធារណជនផងដែរ បើសិនមានការឆ្គាំឆ្គងណាមួយ ដោយហេតុថា ខ្លួនពុំមែនជាអ្នករាំអាជីពនោះទេ ហើយអ្វីដែលធ្វើ គឺគ្រាន់តែចង់បង្ហាញពីប្រពៃណីរបស់ខ្មែរប៉ុណ្ណោះ។

គួរឱ្យដឹងដែរថា “មរតកកែវនេត្រាទិព្វ” ជាទូកង វត្តព្រែកលួង ស្រុកខ្សាច់កណ្ដាល ខេត្តកណ្ដាល និងទទួលបានការឧបត្ថម្ភជាច្រើនសម្រាប់ការចូលរួមប្រកួតកាលពីថ្ងៃទី ២៥ និង២៦ ខែតុលាកន្លងទៅថ្មីៗនេះ ក្នុងភូមិសាស្ត្រខេត្តកណ្តាល ជាគូទី១២ ជាមួយទូកង ក្រុងនគរសែនជ័យ ៕