បីដូចរូបពិត ផុសពីជញ្ជាំង! បវរកញ្ញាកម្ពុជា ២រូប រំលេចសម្រស់អប្សរាខ្មែរ ក្នុងព្រឹត្តិការណ៍ «សមរាត្រីអង្គរ»

ក្នុងបរិយាកាសដ៏អស្ចារ្យនៃព្រឹត្តិការណ៍ «សមរាត្រីអង្គរ» បវរកញ្ញាកម្ពុជា អុិន លក្ខិណា និង អុិន ម៉ូលីកា បានធ្វើឱ្យភ្ញៀវទេសចរជាតិ និងអន្តរជាតិភ្ញាក់ផ្អើលជាខ្លាំង ជាមួយការបង្ហាញសម្រស់ក្នុងឈុតអប្សរា ហាក់ដូចផុសចេញពីចម្លាក់ ដែលធ្លាប់តែឃើញលើជញ្ជាំងប្រាសាទអង្គរវត្ត។

ក្រោមពន្លឺព្រះអាទិត្យរះត្រង់កំពូលអង្គរវត្ត បាតុភូតធម្មជាតិដ៏កម្រនេះ បានឆ្លុះបញ្ចាំងយ៉ាងច្បាស់ពីប្រាជ្ញាបុរាណវិទ្យា និងការរចនាស្ថាបត្យកម្មដ៏ល្អឥតខ្ចោះរបស់បុព្វបុរសខ្មែរ ដែលបានគិតគូរយ៉ាងម៉ត់ចត់អំពីទិសដៅ ព្រះអាទិត្យ និងសមាមាត្រនៃសំណង់។

ដើម្បីបន្ថែមអត្ថន័យឱ្យកាន់តែជ្រាលជ្រៅ បវរកញ្ញាកម្ពុជាទាំងពីរ បានពាំនាំនិមិត្តរូបនៃសិល្បៈ និងអរិយធម៌ខ្មែរ តាមរយៈការបង្ហាញខ្លួនតុបតែងជាទេពអប្សរា គ្រងឈុតបុរាណដ៏ប្រណិត បង្អួតភាពស្រស់ស្អាត និងអត្តសញ្ញាណជាតិយ៉ាងលេចធ្លោនៅចំពោះមុខទេសចរជាតិ-អន្តរជាតិ។

ការបង្ហាញជារូបរាង ទេពអប្សរា យ៉ាងរស់រវើកនេះ មិនត្រឹមតែជាការផ្សព្វផ្សាយដ៏មានអត្ថន័យ អំពីកេរតំណែលវប្បធម៌ខ្មែរប៉ុណ្ណោះទេ ប៉ុន្តែអាចនាំយកវប្បធម៌ទាំងនោះ ទាក់ទាញពិភពលោក និងលើកស្ទួយវិស័យទេសចរណ៍ជាតិផងដែរ។

ម៉្យាងវិញទៀត ការចូលរួមរបស់បវរកញ្ញាទាំងពីរ គឺជាភស្តុតាងមួយថា សម្រស់នារីខ្មែរ និងវប្បធម៌ខ្មែរ អាចបន្តបំភ្លឺលើឆាកអន្តរជាតិ ដោយភ្ជាប់អតីតកាល និងបច្ចុប្បន្នឱ្យក្លាយជាមោទនភាពជាតិមួយដ៏រឹងមាំ៕