ឧកញ៉ា លាន អាហ្រ្វីលគីនីន ត្រូវបុគ្គលម្នាក់បង្ហោះសារទារបំណុល

ផ្ទុះរឿងដ៏អាម៉ាស់មួយចំពោះអតីតពិធីករនិងតារាចម្រៀងដែលបច្ចុប្បន្នមានងារជាឧកញ៉ាគឺលោក លាន អាហ្វ្រីលគីនីន ខណ:ដែលថ្មីៗនេះមានការបង្ហោះនៅលើបណ្តាញសង្គមហ្វេសប៊ុកថាឧកញ៉ារូបនេះជំពាក់លុយគេមិនសង។

ដំណឹងនេះបានធ្វើឲ្យមហាជននិងអ្នកប្រើប្រាស់បណ្តាញសង្គមជាច្រើនមានការភ្ញាក់ផ្អើយហើយចាប់អារម្មណ៍គ្រប់គ្នាដោយហេតុថា ងារជាឧកញ៉ាមានលុយពេញដៃហេតុអ្វី លាន អាហ្រ្វីលគីនីន បែរជាជំពាក់បំណុលគេមិនសងរហូតធ្វើឲ្យម្ចាស់លុយខឹងទម្លាយជាសាធារណ:នៅលើបណ្តាញសង្គមយ៉ាងអាម៉ាស់ដូច្នេះទៅវិញ។

ជាក់ស្តែងនៅលើទំព័រហ្វេសប៊ុកឈ្មោះថា Sekha rithBe បានបង្ហោះភ្ជាប់រូបភាពឧកញ៉ា លាន អា ហ្រ្វីលគីនីន ​ដោយ​ផ្ដាំលោកឧកញ៉ារូប​នេះឲ្យចូលខ្លួនមកដោះស្រាយបំណុលថែមទៀតផង។ ម្ចាស់បំណុលរូបនោះបានលើកឡើងថាសូមជូនដំណឹងដល់ឈ្មោះ លាន​ អាហ្រ្វីលគីនីន​ ចូលខ្លួនមកដោះស្រាយបំណុលដែលជំពាក់ខ្ញុំ។

ពាក់ព័ន្ធនឹងរឿងដ៏រសើបនេះដែរ នៅរសៀលថ្ងៃទី៣ ខែមីនា ឆ្នាំ២០២០នេះ កម្ពុជាថ្មី មិនទាន់អាចស្វែងរកការបំភ្លឺពីឧកញ៉ា លាន អាហ្រ្វីលគីនីន បាននៅឡើងទេជុំវិញរឿងនេះ។ ដូច្នេះសង្ឃឹមថា ឧកញ៉ា លាន អាហ្រ្វីលគីនីន នឹងចេញមុខបកស្រាយឆាប់ៗ ដើម្បីស្រាយមន្ទិលមហាជន។ 

សូមបញ្ជាក់ថា អតីតតារាប្រុស លាន អាហ្រ្វីលគីនីន បានផ្អាកពីអាជីពសិល្បៈទាំងស្រុងក្រោយ​ក្លាយ​ខ្លួនជាឧកញ៉ាហើយបន្ទាប់មកលោកក៏បានប្រែខ្លួនងាកទៅចាប់មុខជំនួញផ្នែកអចលនទ្រព្យទិញលក់ដីធ្លី និងដឹកថ្មលក់​ជា​ដើម៕

អត្ថបទ៖ ចាន់រ៉ា