តារា​ចម្រៀង​ស្រី​វ័យក្មេង​កញ្ញា សុវត្ថិ​ឌី ធា​រិ​កា ថ្វីត្បិត​ពេលនេះ​អ្នក​ម្ដាយ និង​លោក​ឪពុក​ជាទី​ស្រលាញ់​បាន​ចែក​ឋាន​លាចាក​ឆ្ងាយ​ពី​គ្រួសារ​មាន​រយៈពេល​ជិត ១ ឆ្នាំ​ហើយ​ពិតមែន ប៉ុន្តែ​សម្រាប់​ទំហំ​ទឹកចិត្ត នៃ​ការ​នឹក​ស្រលាញ់ ក្នុងនាម​កូនៗ នៅ​មិន​ទាន់​បំភ្លេច​បាន​ឡើយ។

តារា​ចម្រៀង សុវត្ថិ​ឌី ធា​រិ​កា បាន​បង្ហាញ​អារម្មណ៍​នឹក​ទៅ​ដល់​អ្នកមានគុណ​ទាំងពីរ​ថា នៅ​ពេល​ដែល​យើង​ដើរ​មក​ដល់​ចំណុច​មួយ​ដែល​ឪពុកម្ដាយ​ធ្លាប់​ប្រាប់​ទើប​ដឹង​ថា ជីវិត​មិន​ទៀងទាត់ ត្រូវ​រៀន​រស់នៅ​ដោយ​ខ្លួនឯង រឹងប៉ឹង ឆ្លាត ប៉ិនប្រសប់ មិន​ឲ្យ​ល្អ​ពេក ក៏​មិន​ឲ្យ​អន់​ពេក មិន​ងាយ​ពេក ក៏​មិន​ឲ្យ​លំបាក​ពេក ជា​រួម​កុំ​លោភលន់ (I missed you so much)។

កញ្ញា សុវត្ថិ​ឌី ធា​រិ​កា បាន​បញ្ជាក់​ប្រាប់​តាម​បណ្ដាញ​សង្គម​ហ្វេ​ស​ប៊ុ​ក​ដោយ​ខ្លី​បន្ថែម​ថា បើ​គិត​មក​ដល់​ពេលនេះ ពោល​ត្រឹម​ថ្ងៃ​ទី ១៧ ខែ​មករា ឆ្នាំ ២០២៣ លោក​ឪពុក និង​អ្នក​ម្ដាយ​ជាទី​ស្រលាញ់​នាង​បាន​ទទួល​មរណភាព​មាន​រយៈពេល​ប្រមាណ ៨ ខែ​ហើយ។

នាង​និយាយ​ថា (១៧.០៥.២០២២/១៧.០១.២ ០២៣) ពិតជា​ដើរ​លឿន​ណាស់ ការ​ចងចាំ​មួយ​នេះ​មិន​ងាយ​នឹង​រំសាយ​,I will be strong mom& dad don’t worry។

គួរ​រម្លឹក​ថា កាលពី​ថ្ងៃ​ទី ១៧ ខែ​ឧសភា ឆ្នាំ ២០២២ តារា​ចម្រៀង សុវត្ថិ​ឌី ធា​រិ​កា មាន​ទុក្ខ​ជា​ទម្ងន់ ដោយសារ​តែ​លោក​ឪពុក និង​អ្នក​ម្ដាយ​ជាទី​ស្រលាញ់​ត្រូវ​បាត់បង់​ជីវិត​ព្រម​គ្នា​ក្នុង​ហេតុការណ៍​ក្រឡាប់​រថយន្ត​នៅ​ស្រុក​ឆែប ខេត្ត​ព្រះវិហារ។ ការ​ចាកចេញ​ទៅ​របស់​អ្នកមានគុណ​ក្នុង​ពេល​តែមួយ​ដោយ​មួយ​ប៉ប្រិច​ភ្នែក​បែបនេះ គឺជា​រឿង​ពិបាក​នឹង​ទទួល​យក​ខ្លាំង​ណាស់​សម្រាប់ សុវត្ថិ​ឌី ធា​រិ​កា ព្រោះតែ​ស្ដាយ​ស្រណោះ​អាឡោះអាល័យ​ចំពោះ​ការ​បាត់បង់​អ្នកមានគុណ​ម្ដង​ទាំង ២៕

អត្ថបទ ៖ ចាន់រ៉ា