ជីវិតកម្សាន្ដ

ដួង សុខគា ហួសចិត្តបុគ្គលមួយចំនួនវង្វេងស្មារតី ប្រើសំណេរជាតិខ្លួនឯង ប្រាសចាកន័យពិត នៃក្រឹត្យក្រមដើម

បានផុស

៣ years មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

តារាប្រុសពហុជំនាញលោក ដួង សុខគា បានសម្ដែងការហួសចិត្តជាថ្មី ក្រោយមួយរយៈនេះមានបុគ្គលមួយចំនួនទាំងក្មេងទាំងចាស់ ហាក់កំពុងវង្វេងស្មារតីដោយការប្រើប្រាស់ភាសា ឬ សំណេរជាតិសាសន៍ខ្លួនឯងប្រាសចាកផ្ទុយពីន័យពិត នៃក្រឹត្យក្រមដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្មារតីរបស់លោក ដួង សុខគា បានបញ្ជាក់ច្បាស់ពីជំហរផ្ទាល់ខ្លួនថា លោកអាចឆ្កួតបាន តែសីលធម៌ ភាសាជាតិ វប្បធម៌ជាតិយើង មិនអាចឆ្កួតនោះទេ។ លោកនិយាយថា «កុំចង្រៃជោរតាមគ្នាសរសេរភាសាខ្លួនឯងបែបឡឺឡប់ ហើយថាពេញនិយមឲ្យសោះ! ធ្ងន់មាត់បន្តិចហើយ(កាំជា, បងអូន, ពង់ចាម, អន់រ៉ាយ,ពេញយំ, តិចឡាចហូវ…) រំអួយរំអិលកាច់ប្របេរឆ្កួតយក៍ស្អី? អក្សរ ត្រូវតែជាម៉ែត្រយ៉ាងសុក្រឹត! កុំបែកប្រាជ្ញរហ័សទៅខាងខុស!»។

លោក ដួង សុខគា លើកឡើងថា «ច្រឡំដៃចង្រៃតិច វក់ព្រើលភ្លើភ្លេច បំផ្លាញអក្សរជាតិ ចង្រៃធំ(ដង្កូវចង្រៃ តែងតែបំផ្លាញដើមឈើដែលវារស់នៅ តែនេះយើងជាមនុស្ស)»។ លោក ដួង សុខគា បន្ថែមថា «មិនចង់និយាយ តែឥឡូវនេះរមាស់មាត់គឺរឿងសាងប្រជាប្រិយភាព បើបងប្អូនណាខ្ជិលអាន អូសរំលងចុះ នេះគ្រាន់តែជាអ្វីដែលខ្ញុំជួប និងជាអ្វីដែលខ្ញុំគិត»។

លោកបញ្ជាក់ថា «មានគ្នាយើងខ្លះចាស់ៗ គ្រាន់ដែរហើយ និយាយពន្យល់ប្រាប់ខ្ញុំថា ឲ្យរៀននិយាយតាមក្មេងៗទៅ គឺរៀននិយាយភាសាតាមក្មេងៗ ដើម្បីទីផ្សារប្រជាប្រិយភាពទាន់សម័យ។ គេថា យើងត្រូវតែនិយាយកាច់ស្ទីលតាមក្មេងៗ ទោះពាក្យនោះខុសក៏ដោយ តាមសិនទៅទើបទទួលបានការគាំទ្រច្រើន រីឯបទចម្រៀងក៏អ៊ីចឹងដែរ គឺថាត្រូវតែដើរផ្លូវនេះដើម្បីតម្រូវចិត្តពួកគាត់»។

លោកបន្តថា «ខ្ញុំចង់តែសុំច្បាប់ជេរ តែមិនហ៊ានជេរ មិនមែនខ្ញុំមិនយល់ទេ បើនិយាយពីភាសាអ្នកកាសែត គេថាភាពជិតបង្កើយ នៃសាធារណជន តែយើងមិនត្រូវតម្រូវចិត្តគាត់គ្រប់រឿងទាំងអស់នោះទេ! ក្មេងៗ គ្នាមិនទាន់យល់ដឹងបានជ្រៅ មើលមិនទាន់ឆ្ងាយទេ គ្នានៅខ្វះពិសោធន៍ មិនទាន់សូវចេះស្រលាញ់របស់រួមទេ ដូចនេះយើងចាស់ៗ គប្បីទាញគាត់មកវិញ។ សរុបមក ខ្ញុំមិនឆ្កួតធ្វើតាមគាត់ទេ មិនដើម្បីតែភាពល្បី សុខចិត្តធ្វើឆ្កួតនោះឡើយ ខ្ញុំអាចឆ្កួតបាន តែសីលធម៌ ភាសាជាតិ វប្បធម៌ជាតិយើង មិនអាចឆ្កួតនោះទេ ចាំមើលខ្ញុំបាត់ការគាំទ្រពីបងប្អូនយើងត្រឹមណាក៏តាមហ្នឹងចុះ»។ លោក សុខគា លើកឡើងបន្ថែម៕

អត្ថបទ ៖ ចាន់រ៉ា