ជូរី ល្អហួស សុំការលើកទឹកចិត្តពីមហាជន ខណៈត្រៀមចេញទៅប្រកួតលើឆាកអន្តរជាតិ ថ្ងៃស្អែក

យុវតី ជូរី ល្អហួស ម្ចាស់​មកុដ Miss Preteen International Cambodia 2023 ស្របពេល​ដែលត្រៀម​ចេញទៅ​ប្រកួត​លើឆាកអន្តរជាតិថ្ងៃទី២៧ ខែមីនា ឆ្នាំ២០២៤ ស្អែកនេះ នាងបាន​ស្នើរ​សុំការ​លើក​ទឹកចិត្ត​ពីមហាជន​ និង​អ្នកគាំទ្រ។ ក្នុងនោះ ល្អហួស ក៏ធ្លាប់ប្រកាសឆន្ទៈ​ដោយ​ប្ដេជ្ញា​ដណ្ដើម​ជ័យជំនះ​មកជូន​ប្រជាជនកម្ពុជា​ផងដែរ។

សម្រាប់​ការ​ចេញ​ទៅ​ប្រកួត​តំណាងឲ្យកម្ពុជានេះ ល្អហួស បានត្រៀមខ្លួនជាស្រេច​ជា​មួយការខិតខំប្រឹង នឹង​ហ្វឹកហាត់​យ៉ាង​ខ្លាំង​ក្នុង​ការ​ពង្រឹង​សមត្ថភាព​បន្ថែម​ដើម្បី​ចេញ​ទៅ​ដណ្ដើម​យក​ជ័យជំនះ​នៅក្នុង​ការប្រកួត​លើ​ឆាក​អន្តរជាតិ។ អ្វីដែលចាប់អារម្មណ៍​ថែម​ទៀត ជូរី ល្អហួស ក៏បានត្រៀម​នាំរបាំ​អប្សរា​របស់​ដូនតាខ្មែរ​យកទៅបង្ហាញ​នៅលើឆាកអន្តរជាតិផងដែរ។

ជាមួយ​គ្នានេះដែរម្ចាស់​មកុដ Miss Preteen International Cambodia 2023 រូបនេះ​បាន​លើកឡើងថា «​ថ្ងៃស្អែកនេះ​ នាង​ខ្ញុំត្រូវចាកចេញ​ពីមាតុភូមិយើង​ហើយ​ទៅប្រកួត​បវរកញ្ញា​វ័យក្មេងនៅ​ឯ​ប្រទេសថៃ ពុកម៉ែបងប្អូន​មានពាក្យជូនពរ ល្អហួស ទេ។ ជួបជុំគ្នាម៉ោង ៩ព្រឹកនៅព្រលានយន្តហោះ​ទាំងអស់គ្នាណា»។

ប្រាកដ​ណាស់ ​ម្ចាស់​មកុដ​បរវកញ្ញា​យុវតី​កម្ពុជា​ឆ្នាំ២០២៣ ជូរី ល្អហួស ក៏ត្រូវបានទស្សនិកជន​កត់​សម្គាល់ឃើញថា ពិតជា​មានភាពលេច​ធ្លោ​ខ្លាំង​ទាំង​រូប​សម្ផស្ស និង​ចំណេះ​ដឹង​ដែល​អាចធ្វើ​បាន​ល្អរហូត​ដណ្តើមបានមកុដMiss Preteen International Cambodia 2023។

កន្លងមកគេ​ចាំ​បាន​ថា ល្អហួស ក៏បាន​ប្រកាសប្តេជ្ញាយក​ជ័យ​ជំនះ​លើ​ឆាកអន្តរជាតិ​ដើម្បី​មក​ជូន​ប្រទេស កម្ពុជា​ដោយភាពជឿជាក់។ ម្ចាស់​មកុដ​រូប​នេះ ​បាន​បញ្ជាក់​ថា នាង​នឹង​ខិតខំ​ដុះ ខាត់​ទាំង​សមត្ថភាព និង​ចំណេះ​ដឹង​ដើម្បី​តំណាង​ប្រទេស​ទៅ​ប្រកួត​នៅ​លើ​ឆាក​អន្តរជាតិ៕

អត្ថបទ៖ ចាន់រ៉ា