ល្អហួស ៖ ដរាបណាមានផ្ការំដួលមួយទងនេះ កាន់ទង់ជាតិកម្ពុជា មិនឱ្យជាតិសាសន៍ណាមកបំពានបានទេ

ស្របពេលដែលក្លាយជាម្ចាស់ជ័យលាភីគ្រងមកុដថ្មី Miss Teen Cambodia ប្រចាំឆ្នាំ២០២៥ ដែលត្រៀមតំណាងកម្ពុជាទៅប្រកួតលើឆាកអន្តរជាតិ ជូរី ល្អហួស បានប្រកាសដោយសន្យាថា ដរាបណាខ្លួនកាន់ទង់ជាតិកម្ពុជា គឺមិនឱ្យជាតិសាសន៍ណាមកបំពានទេ។

កាលពីថ្មីៗកន្លងទៅ ជូរី ល្អហួស ធ្លាប់បានប្រកាសហើយថា បើយកឈ្នះមកុដក្នុងការប្រកួតវិស័យបវរកញ្ញាក្នុងស្រុកហើយ នឹងមានឱកាសតំណាងឱ្យកម្ពុជាទៅប្រកួតនៅលើឆាកអន្តរជាតិ ខ្លួននឹងត្រៀមបង្ហាញឱ្យអន្តរជាតិបានដឹងនូវបញ្ហាសង្គ្រាមឈ្លានពានរបស់សៀម ដែលជាអ្នកចាប់ផ្តើមមកលើបូរណភាពទឹកដីកម្ពុជា ពិសេសល្បិតកលដ៏កខ្វក់របស់យោធាសៀមឈ្លានពាន។

ជាថ្មីម្តងទៀត ល្អហួស បានបញ្ជាក់ជំហរខ្លួនថា “ដរាបណាមានផ្ការំដួលមួយទងនេះ កាន់ទង់ជាតិកម្ពុជា នាងខ្ញុំសន្យាថា មិនឱ្យជាតិសាសន៍ណាមកបំពានអ្នកបាន ហើយសៀវភៅមួយក្បាលនេះ ទើបតែចាប់ផ្តើមអានប៉ុណ្ណោះ ប៉ុន្តែនៅមានភាគបន្តទៀតនៅលើឆាកអន្តរជាតិ នៅឆ្នាំ២០២៦ ខាងមុខនេះ“។

ជូរី ល្អហួស បន្តទៀតថា “ផ្ការំដួលកម្ពុជា កំពុងតែជះក្លិនដ៏ក្រអូបបរិសុទ្ធទៅកាន់ពិភពលោក ឥទ្ធិពលសំឡេងរបស់កូន ស្រីកម្ពុជា កម្ពុជានិយាយគឺជាការពិត”។

គួររម្លឹកថា បន្ទាប់ពីជោគជ័យក្នុងការប្រកួតវគ្គផ្តាច់ព្រ័តនិងក្លាយជាម្ចាស់មកុដ Miss Teen Cambodia 2025 ជូរី ល្អហួស បានចេញមុខអះអាងឆន្ទ:ថា នឹងបេ្តជ្ញាប្រើសំឡេងក្នុងនាមកូនខ្មែរបើកបង្ហាញការពិតនៃជម្លោះព្រំដែនកម្ពុជា-ថៃ លើឆាកអន្តរជាតិនៅឆ្នាំ២០២៦៕ អត្ថបទ ៖ ចាន់រ៉ា