ចុងខែមិថុនា កម្ពុជាបាត់បង់មរតកមនុស្សរស់​២រូបដ៏សោកសៅបំផុត

គិតមកដល់ត្រឹមចុងខែមិថុនា ឆ្នាំ២០២៤នេះ កម្ពុជាត្រូវបាត់បង់មរតកមនុស្សរស់ចំនួន២រូបដ៏គួឲ្យសោកស្តាយជាទីបំផុត។ ជាការពិតសម្រាប់ការបាត់បង់ធន់ធានជើងចាស់ដ៏ឆ្នើមទាំង២រូបនេះ បានធ្វើឲ្យមហាជនមានការសោកស្តាយ និងក្តុកក្តួលខ្លាំងបំផុត។

ព្រឹទ្ធាចារ្យដែលជាមរតកមនុស្សរស់ទាំង២រូបដែលបានបន្សល់ទុកនូវស្នាដៃ និងការចង់ចាំសម្រាប់ប្រជាជនខ្មែរ និងយុវជនជំនាន់ក្រោយនោះគឺ ១.ព្រឹទ្ធាចារ្យបោរាណា​ចា​រ្យ ប៊ិ​ន វិ​ន មរតក​មនុស្ស​រស់ បាន​ទទួលមរណភាពកាលពី​ថ្ងៃ​សៅ​រ៍​ទី​២២ ខែមិថុនា ឆ្នាំ​២០២៤ វេលា​ម៉ោង​២​និង​២៧​នាទី​ទៀប​ភ្លឺ ក្នុង​ជុន្មាយុ​៨៨​ឆ្នាំដោយ​ជរាពាធ​។ នេះបើយោងតាមការជូនដំណឹងរបស់ក្រសួង​វប្បធម៌ និង​វិចិត្រសិល្បៈ។

ព្រឹទ្ធាចារ្យបោរាណា​ចា​រ្យ ប៊ិ​ន វិ​ន ត្រូវ​បាន​ព្រះមហាក្សត្រ​ចេញ​ព្រះរាជក្រឹត្យ​ទទួលស្គាល់​ថា ជា​មរតក​មនុស្សរ​ស់ម្នាក់នៅ​ក្នុង​ចំណោម​ព្រឹទ្ធាចារ្យ​ចំនួន​៩​រូបកាលពី​ថ្ងៃ​ទី​៤ ខែកុម្ភៈ ឆ្នាំ​២០២៣កន្លង​ទៅ​។ ព្រឹទ្ធាចារ្យ បោរាណា​ចា​រ្យ ប៊ិ​ន វិ​ន កើតនៅ​ថ្ងៃ​ទី​១០ ខែសីហា ឆ្នាំ​១៩៣៦ នៅ​ភូមិ​ចាន់ ឃុំ​តាំងក្រសាំង ស្រុក​បា​ធា​យ ខេត្តកំពង់ចាម។ ព្រឹទ្ធាចារ្យបោរាណា​ចា​រ្យ ប៊ិ​ន វិ​ន ត្រូវ​បាន​គេ​ដឹងថា ជា​អ្នក​ដែល​ចេះ​ដឹង​មាន​ជំនាញ​ច្បាស់លាស់ខាង​ភ្លេងអារក្ស យីកេ ល្ខោន អា​យ៉ៃ អាចារ្យ​កិច្ច​ពិធី​ចូល​ម្លប់ និង​ចេញ​ម្លប់ អាចារ្យ​ពេលា​ការ អាចារ្យ​មង្គលការ និង​ចៅ​មហា​ជាដើម។

២.ព្រឹទ្ធាចារ្យកោសល្យវោហារ គង់ ណៃបានទទួលមរណភាពនៅថ្ងៃសុក្រ ៧រោច ខែជេស្ន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែមិថុនា ឆ្នាំ២០២៤ វេលាម៉ោង១២និង៤៥នាទីរសៀលក្នុងជុន្មាយុ៨០ឆ្នាំដោយរោគាពាធនៅឯស្រុកកំណើត។ ព្រឹទ្ធាចារ្យចាប៉ីដងវែង គង់ ណៃ កើតនៅថ្ងៃទី១៥ ខែមីនាឆ្នាំ១៩៤៤ នៅភូមិដូងឃុំស្វាយទងខាងជើង ស្រុកកំពង់ត្រាច ខេត្តកំពត។

ព្រឹទ្ធាចារ្យ គង់ ណៃ គឺជាសិល្បករចាប៉ីដងវែងដ៏ល្បីល្បាញមួយរូបរបស់កម្ពុជាដែលមានគោរមងារថា ជាព្រឹទ្ធាចារ្យកោសល្យវោហារ គង់ ណៃ។ ក្រៅពីមានគោរមងារថ្នាក់ជាតិជាមរតកមនុស្សរស់ហើយនោះ ព្រឹទ្ធាចារ្យ គង់ ណៃ ក៏ធ្លាប់ទទួលបានពានរង្វាន់ទាំងថ្នាក់ជាតិ និងអន្តរជាតិជាច្រើនពានរង្វាន់ផងដែរ។

តាមរយ:ដំណឹងមរណភាពរបស់លោកព្រឹទ្ធាចារ្យកោសល្យវោហារ គង់ ណៃ  ដែលជាសិល្បករចាប៉ីដងវែងដ៏ឆ្នើម និងជាមរតកមនុស្សរស់ដ៏មានតម្លៃរបស់កម្ពុជាបានធ្វើឲ្យមហាជនសិល្បករ-សិល្បការិនីនិងប្រជាពលរដ្ឋខ្មែរសម្តែងការសោកស្តាយជាពន់ពេក។

សូមបញ្ជាក់ថា ដំណឹងមរណទុក្ខដ៏ក្រៀមក្រំ និងសោកសៅចំពោះវិរសិល្ប:២រូបនេះ បានធ្វើឲ្យមហាជន និងអ្នកគាំទ្រទូទាំងប្រទេសបានសម្តែងការចូលរួមសោកស្តាយយ៉ាងខ្លាំងជាមួយក្រុមគ្រួសារសព។ ម្យ៉ាងនេះក៏ជាកាបាត់បង់ធនធានមនុស្សដ៏មានតម្លៃរបស់កម្ពុជា៕

អត្ថបទ៖ ចាន់រ៉ា