សមាគមសិល្បករខ្មែរចូលរួមពិធីបុណ្យសពលោកតា គង់ ណៃ មរតកមនុស្សរស់

ប្រធានសមាគមសិល្បករខ្មែរលោកស្រីអ្នកឧកញ៉ា ម៉ៅ ចំណានកាលពីរសៀលថ្ងៃទី២៩ ខែមិថុនា ឆ្នាំ២០២៤បានដឹកនាំក្រុមការងារនៃសមាគមសិល្បៈករខ្មែរចូលរួមក្នុងពិធីបុណ្យឈាបនកិច្ចសពលោកព្រឹទ្ធាចារ្យកោសល្យវោហារ គង់ ណៃ មរតកមនុស្សរស់ ដែលកំពុងតម្កល់ធ្វើបុណ្យតាមប្រពៃណីព្រះពុទ្ធសាសនានៅគេហដ្ឋាននាភូមិដូង ឃុំស្វាយទងខាងជើង ស្រុកកំពង់ត្រាច ខេត្តកំពត។

ក្នុងបរិយកាសដ៏ក្រៀមក្រំនេះ លោកស្រីអ្នកឧកញ៉ាបានសម្តែងនូវមនោសញ្ចេតនា អាឡោះអាល័យ និងក្តីសង្វេគជាពន្លឹកជាមួយលោកយាយ តាត់ ឆេន ព្រមទាំងក្រុមគ្រួសារនៃសពរបស់លោកតាព្រឹទ្ធាចារ្យកោសល្យវោហារ គង់ ណៃ ព្រោះមរណៈភាពរបស់លោកតាព្រឹទ្ធាចារ្យគឺជាការបាត់បង់នូវស្វាមី ឪពុក ជីតា ជាទីគោរពស្រឡាញ់ ប្រកបដោយព្រហ្មវិហារធម៌ និងគុណូបការៈចំពោះកូនចៅគ្រប់ៗគ្នា។

ប្រធានសមាគមសិល្បករខ្មែរក៏បានចាត់ទុកថា មរណៈភាពលោកព្រឹទ្ធាចារ្យកោសល្យវោហារក៏ជាការបាត់បង់ធនធានមនុស្ស​ផ្នែកចាប៉ីដងវែង ដ៏កម្រប្រកបដោយសមត្ថភាព ទេពកោសល្យដែលបានលះបង់ពេញមួយជីវិតក្នុងការលើកកម្ពស់វិស័យសិល្បៈវប្បធម៌ជាតិរហូតល្បីសុះសាយពាសពេញសកលលោក។

ប្រធានសមាគមសិល្បករខ្មែរ សូមចូលរួមរំលែកមរណទុក្ខដ៏ក្រៀមក្រំបំផុតនេះជា មួយលោកស្រី តាត់ ឆេន ព្រមទាំងក្រុមគ្រួសារ និងសូមឧទ្ទិសបួងសួងដល់ដួងវិញ្ញាណក្ខន្ធរបស់លោកព្រឹទ្ធាចារ្យកោសល្យវោហារគង់ ណៃសូមបានទៅសោ យសុគតិភពកុំបីឃ្លៀងឃ្លាតឡើយ។

សមាគមសិល្បករខ្មែរក៏បាននាំយកបច្ច័យផ្ទាល់ខ្លួន និងពីសមាគមសិល្បករខ្មែរសរុបចំនួន ៤ ០០០ ០០០ រៀលដើម្បីចូលចាប់មគ្គផលជាមួយនឹងក្រុមគ្រួសារលោកយាយ តាត់ ឆេន និងកូនចៅ។

សមាគមសិល្បករខ្មែរ និងលោកជំទាវផ្ទាល់នៅតែបន្តទទួលបច្ច័យពីសប្បុរសជនទោះតិច ឬច្រើនក្ដី ដើម្បីបូកសរុបជូនដល់ក្រុមគ្រួសារលោកព្រឹទ្ធាចារ្យរហូតដល់ថ្ងៃបុណ្យគម្រប់៧ ថ្ងៃខាងមុខ៕

អត្ថបទ៖ ចាន់រ៉ា