YouTube ផ្អាកការរកប្រាក់របស់អ្នកបង្កើតមាតិកាកូរ៉េ ៣ រូប ក្រោយគំរាមកំហែង Tzuyang

យោងតាមសារព័ត៌មានកូរ៉េ Allkpop បានចេញផ្សាយកាលពីថ្ងៃទី ១៥ ខែកក្កដា ដោយបញ្ចាក់ថាអ្នកបង្កើតមាតិកាប្រុស៣រូប ដែលគេស្គាល់តាមរយៈរហស្សនាម cyber wreckers ដោយមាន Gu Je Yeok, Caracula និង Jeon Gukjin ពេលនេះត្រូវចោទប្រកាន់ពីបទគំរាមកំហែង ​Tzuyang ដែលជាអ្នកញុំាអាហារ​ដ៏ល្បី ហើយយូធូបក៏បានបិទមិនឲ្យ​រកប្រាក់បានដែរ។

គោលការណ៍របស់ YouTube ចែងថា​ អ្នកបង្កើតដែលចូលរួមក្នុងអាកប្បកិរិយាមិនសមរម្យទាំងនៅលើ និងក្រៅវេទិកា ដូចជាការព្យាបាទអ្នកដទៃ ចូលរួមក្នុងការរំលោភបំពាន ឬហិង្សា ការបង្ហាញភាពឃោរឃៅ ឬការចូលរួមក្នុងការក្លែងបន្លំ ឬការបោកបញ្ឆោត ដែលបណ្តាលឲ្យមានគ្រោះថ្នាក់ច្រើនអាចប្រឈមនឹងការពិន័យ។

ការពិន័យទាំងនេះអាចរាប់បញ្ចូលទាំងអសមត្ថភាពក្នុងការដំណើរការការផ្សាយពាណិជ្ជកម្ម និងបង្កើតប្រាក់ចំណូលនៅលើប៉ុស្តិ៍របស់ពួកគេ ការដកខ្លួនចេញពីកម្មវិធីដៃគូ YouTube ដែលមានន័យថា ពួកគេនឹងមិនទទួលបានការគ្រប់គ្រងដៃគូ និងការគាំទ្រអ្នកបង្កើត និងការបាត់បង់សិទ្ធិចូលប្រើកម្មវិធីគ្រប់គ្រងខ្លឹមសារ YouTube Studio នោះទេ។

YouTube បានប្តេជ្ញាដកខ្លឹមសារទាំងអស់ដែលបំពានគោលការណ៍ណែនាំសហគមន៍ចេញ។ នេះរួមបញ្ចូលទាំងខ្លឹមសារដែលមានការគំរាមកំហែង ការយាយី ឬពាក្យសំដីស្អប់។

យោងតាមគេហទំព័រ YouTube ក៏បានបញ្ចាក់បន្ថែមទៀតថា គោលការណ៍ស្របគ្នាត្រូវបានអនុវត្តនៅទូទាំងវេទិកា ដោយមិនគិតពីអ្នកដែលបានបង្ហោះខ្លឹមសារនោះទេ ហើយការសម្រេចចិត្តទាំងនេះមិនត្រូវបានជះឥទ្ធិពលដោយប្រជាប្រិយភាពរបស់ប៉ុស្តិ៍នោះទេ។

យ៉ាងណាក៏ដោយ​ ប្រការដែលឈានដល់ YouTube សម្រេចបិទមិនឲ្យម្ចាស់ឆានែល៣រូបនេះរកប្រាក់បាននោះគឺដោយសារតែ​ Tzuyang ដែលអ្នកទស្សនាជាច្រើនស្គាល់នាងថាជាអ្នកញុំអាហារដ៏មានប្រជាប្រិយភាពបានអះអាងថា ទទួលរងការវាយដំ និងគំរាមកំហែងជាបន្តបន្ទាប់ពីអតីតមិត្តប្រុសរបស់នាងអស់រយៈពេល ៤ ឆ្នាំ ។ ជាពិសេសនាងក៏ត្រូវគំរាមកំហែងដោយបុរស៣រូបនោះ ជាមួយនឹងការលាតត្រដាងពីជីវិតឯកជន​និងអតីតកាលរបស់នាង​ ទើប​ប្រកាស​ពី​ចេតនា​ដាក់​ពាក្យ​បណ្តឹង​ប្រឆាំង​ពួក​គេ​ទៅ​អយ្យការ។

សូមជម្រាបជូនដែរថា Tzuyang គឺជា mukbang TouTuber ក្នុងប្រទេសកូរ៉េខាងត្បូង ដែលមានអ្នកតាមដាននាងជាង ១០ លាននាក់។ ផ្ទុយទៅវិញ ឆានែលរបស់ Gujeyeok មានអ្នកជាវប្រហែល ១៩២,០០០ប៉ុណ្ណោះ៕

អត្ថបទ៖ សាង ស្រីល័ក្ខ

ចុចអាន៖Dawn លុបរូបថតរបស់ HyunA ចេញពី IG ក្រោយប្រកាសដំណឹងរៀបការជាមួយមិត្តប្រុសថ្មី