អតីតគ្រូបង្រៀនល្ខោនបាសាក់ លោក ស ប៊ុនរ៉ា ធ្លាក់ខ្លួនឈឺ និងសម្រាកព្យាបាលនៅមន្ទីរពេទ្យព្រះអង្គឌួង

បច្ចុប្បន្នលោក ស ប៊ុនរ៉ា ហៅ រ៉ាញ៉េវ អតីតគ្រូបង្រៀនល្ខោនបាសាក់ កំពុងមានជំងឺ និងសម្រាកព្យាបាលនៅមន្ទីរពេទ្យព្រះអង្គឌួង។ នេះបើតាមរយៈផេកផ្លូវការរបស់សមាគមសិល្បករខ្មែរ បានបញ្ជាក់ ក្រោយពេលទៅសួរទុក្ខខលោកដោយផ្ទាល់ នៅឯមន្ទីរពេទ្យ កាលពីពេលថ្មីៗនេះ។

ប្រភពដដែលបញ្ជាក់ថា តាមការចង្អុលបង្ហាញពីលោកជំទាវអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ ក្រុមការងារសមាគមសិល្បករខ្មែរ បានទៅសួរសុខទុក្ខលោក ស ប៊ុនរ៉ា ហៅ ដោយផ្ទាល់ និងបាននាំយកថវិកា ៨០មុឺនរៀល ជូនដល់សិល្បកររូបនេះ និងក្រុមគ្រួសារ ដើម្បីសម្រាលដល់ការចំណាយប្រចាំថ្ងៃមួយផ្នែកផងដែរ។

ជាមួយនឹងដំណឹងនេះ សិល្បករខ្មែរមួយចំនួន រួមនិងមហាជន ក៏បានសម្តែងការខ្វាយខ្វល់ និងជូនពរលោកឆាប់ជាសះស្បើយ បានវិលត្រឡប់ទៅជូបជុំក្រុមគ្រួសារញាតិមិត្តវិញនាពេលខាងមុខដ៏ខ្លីផងដែរ។

គួរជម្រាបថា លោក ស ប៊ុនរ៉ា វ័យ៦៨ឆ្នាំ ជាអតីតគ្រូបង្រៀនផ្នែកល្ខោនបាសាក់ នៃសាលាវិចិត្រសិល្បៈ ជាអ្នកនិពន្ធ និងជាអ្នកដឹកនាំរឿងមួយរូប ដែលបានចូលរួមបម្រើវិស័យសិល្បៈអស់រយៈពេលជាង ៤០ឆ្នាំមកហើយ ដោយអាចនិយាយបានថា លោកក៏ជាសិល្បករជំនាន់ទី១ ក្រោយរបបប្រល័យពូជសាសន៍ ប៉ុល ពត នាឆ្នាំ១៩៧៩ ។

ជាបន្តបន្ទាប់ លោកក៏បានសាងស្នាដៃជាច្រើន ចំពោះវិស័យសិល្ប:បុរាណលើឆាក និងវិស័យភាពយន្តខ្មែរ ព្រមទាំងបានប្ដូរផ្លាស់មុខរបរមួយគ្រាៗ ទៅប្រកបមុខរបរជាកសិករដោយបន្សល់ទុកជាគំរូល្អៗឱ្យកូនចៅ។ ទោះយ៉ាងណា លោកនៅតែឆ្លៀតឱកាសធ្វើការងារសិល្ប:ខ្លះៗផងដែរ ដោយសារតែមានជំនាញស្រាប់ និងក្ដីស្រលាញ់មិនចង់បោះបង់៕