ជិតដាច់ឆ្នាំ លោក ឆាយ វីរ:យុទ្ធ ជួបទុក្ខធំម្តាយជាទីស្រលាញ់ចែកឋាន

តារាចម្រៀងលោក ឆាយ វីរ:យុទ្ធ និងក្រុមគ្រួសារពេលនេះកំពុងមានទុក្ខដ៏ក្រៀមក្រំនិងសោកសៅ ខណ:អ្នកម្តាយជាទីស្រលាញ់របស់លោកបានទទួលមរណភាព។ នេះបើយោងតាមការឲ្យដឹងពីលោក ឆាយ វីរ:យុទ្ធ ។

តារាចម្រៀងលោក ឆាយ វីរ:យុទ្ធ បានបញ្ជាក់ខ្លីនៅព្រឹកថ្ងៃទី០៩ ខែធ្នូ ឆ្នាំ២០២៤ នេះថា អ្នកម៉ែ គង់ សុឹង អនិច្ចកម្មនៅថ្ងៃអាទិត្យ៨កើត ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវថ្ងៃទី០៨ ខែធ្នូ ឆ្នាំ២០២៤ វេលាម៉ោង ០៨:៤៥យប់។ ដំណឹងនេះ បានធ្វើឲ្យអ្នកសិល្ប:មួយចំនួនបង្ហាញការសោកស្តាយ និងចូលរួមរំលែកទុក្ខជាមួយក្រុមគ្រួសារសពផងដែរ។

គួររំលឹកថា ប៉ុន្មានសប្តាហ៍មុន លោក ឆាយ វីរ:យុទ្ធ ទើបតែបានបង្ហោះរូបភាពអ្នកម្តាយជាទីស្រលាញ់សម្រាកក្នុងមន្ទីរពេទ្យ ក្នុងវ័យចាស់ជរា ខណៈលោកសុខចិត្តទម្លាក់ការងារសិល្ប: និងជំនួញរបស់ខ្លួនមួយឡែក យកពេលមកមើលថែម្តាយជាទីស្រលាញ់ ដើម្បីជាការតបស្នងសងគុណ និងកតញ្ញូក្នុងនាមជាកូនប្រុស៕ អត្ថបទ៖ ចាន់រ៉ា