ឆ្លងកាត់សិល្ប:ជិត២០ឆ្នាំ! ខាន់ ជេមស៌ អះអាងថាបើគ្មានអ្នកគាំទ្រទេក៏គ្មានថ្ងៃនេះដែរ

តារាចម្រៀងលោក ខាន់ ជេមស៌ បានដើរលើវិថីសិល្ប:មកដល់ពេលនេះ មានរយ:ពេលជិត ២០ឆ្នាំមកហើយ ខណ:ការគាំទ្រនិងប្រជាប្រិយភាពរបស់តារាប្រុសរូបនេះ នៅតែទទូលបានការគាំទ្រច្រើនគួរសម ពីសំណាក់ទស្សនិកជនគ្រប់មជ្ឈដ្ឋាន។

ថ្វីត្បិតតារាចម្រៀងចាស់វស្សារូបនេះ បានចាប់អាជីពសិល្ប:ច្រើនឆ្នាំក៏ពិតមែន តែលោកបានបញ្ជាក់ថា ភាពល្បីល្បាញរបស់លោក មកទល់សព្វថ្ងៃនេះ គឺបានមកការគាំទ្រពីសំណាក់មហាជនគ្រប់រូប ដោយក្នុងនោះលោក ខាន់ ជេមស៌ បានរំលឹកដឹងគុណចំពោះការគាំទ្ររបស់ទស្សនិកជនមកលើរូបលោកនិងកូនៗរបស់លោកផងដែរ។

តារាចម្រៀងម្ចាស់បទ “របាំចង់ស្នេហ៍” លោក ខាន់ ជេមស៌ បានរៀបរាប់ថា អស់រយៈពេលជាង១៩ឆ្នាំ នៅក្នុងវិស័យសិល្បៈមួយនេះ បើសិនជាគ្មានបងប្អូនអ៊ុំពូមីងទេ ក៏គ្មាន ខាន់ ជេមស៌ ថ្ងៃនេះដែរ អរគុណសម្រាប់ក្ដីស្រឡាញ់អរគុណសម្រាប់ការគាំទ្ររបស់មហាជន។ ជាការពិតលោក ខាន់ ជេមស៍បច្ចុប្បន្នមិនត្រឹមតែល្បីឈ្មោះទេ លោកថែមទាំងបណ្តុះកូនៗឲ្យដើរតាមគន្លងសិល្ប:ដូចខ្លួនផងដែរ។

គួរម្លឹកថា លោកខាន់ ជេមស៌ កន្លងមកធ្លាប់បានទម្លាយបើកកកាយពីប្រវត្តិរបស់ខ្លួនទាំងភ្ញាក់ផ្អើលថា មុនចូលសិល្ប:កាលពីជាង២០ឆ្នាំមុន លោកធ្លាប់ផ្ញើវាសនាលើផ្ទៃសមុទ្រធ៏ធំល្វឹងល្វើយនៅស្រុកថៃ ទើបក្រោយចូលប្រឡូកលើវិស័យចម្រៀងតាមហាង (បៀរហ្គា ឌិន) ។ លោក ខាន់ ជេមស៌ បញ្ជាក់ថាកាលពីឆ្នាំ១៩៩៨ ខ្លួនជាកម្មករចុះទូកនៅប្រទេសថៃ។ ឆ្នាំ២០០២ ជាអ្នកចម្រៀងប្រចាំនៅបៀរហ្គាឌិន ដល់ឆ្នាំ២០០៧ មានវាសនាបានក្លាយជាតារាចម្រៀងល្បីនិងឆ្នាំ២០២១ ជាតារាចម្រៀងផង ជាសហក្រិនផង៕ អត្ថបទ៖ ចាន់រ៉ា