ត្រាំ ដាក់សម្ពាធសេដ្ឋកិច្ចលើថៃ ដើម្បីឲ្យចុះកិច្ចព្រមព្រៀងសន្តិភាពជាមួយកម្ពុជា

តាមការបញ្ជាក់ចេញពីមាត់ផ្ទាល់របស់លោក Siripong Angkasakulkiat ដែលជាអ្នកនាំពាក្យរដ្ឋបាលនាយករដ្ឋមន្ត្រីថៃ Anutin Charnvirakul កាលពីថ្ងៃអង្គារទី១៤ខែតុលាឆ្នាំ២០២៥, ពេលនេះប្រធានាធិបតីអាមេរិក ដូណាល់ ត្រាំ បានដាក់សម្ពាធសេដ្ឋកិច្ចលើប្រទេសថៃ ដើម្បីឲ្យឈានដល់កិច្ចព្រមព្រៀងសន្តិភាពជាមួយកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Siripong ប្រាប់អ្នកកាសែតក្នុងទីក្រុងបាងកកថា​៖ «សហរដ្ឋអាមេរិកបានប្រើប្រាស់ជម្លោះព្រំដែនរវាងកម្ពុជានិងថៃ ដើម្បីចរចាជាមួយរដ្ឋាភិបាល។ នេះគឺជាបញ្ហាប្រឈមថ្មីមួយសម្រាប់ក្រុមចរចាថ្មីរបស់ថៃ ដែលត្រូវបានគណៈរដ្ឋមន្ត្រីអនុម័តកាលពីថ្ងៃអង្គារនិងដឹកនាំដោយរដ្ឋមន្ត្រីក្រសួងហិរញ្ញវត្ថុ Ekniti Nitithanprapas ដើម្បីដោះស្រាយជាមួយអាមេរិក។ ជាមួយនឹងតម្រូវការថ្មីរបស់សហរដ្ឋអាមេរិកនេះ ការឈានដល់កិច្ចព្រមព្រៀងជាមួយកម្ពុជាបានក្លាយជាអាទិភាពមួយសម្រាប់រដ្ឋាភិបាល ដែលកំពុងព្យាយាមជំរុញសេដ្ឋកិច្ច មុនការបោះឆ្នោតនៅដើមឆ្នាំក្រោយ»។

កាលពីពេលកន្លងទៅ សហរដ្ឋអាមេរិកបានដាក់ពន្ធ១៩%រួចទៅហើយ លើការនាំចេញរបស់ថៃ ដែលវាធ្វើឲ្យប៉ះពាល់យ៉ាងខ្លាំងដល់កំណើនសេដ្ឋកិច្ចប្រទេសនេះ។

លោក ត្រាំ នឹងធ្វើដំណើរមកកាន់ប្រទេសម៉ាឡេស៊ី ដើម្បីចូលរួមជាអធិបតីដោយផ្ទាល់ ក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ។ 

បើតាមការបញ្ជាក់យ៉ាងច្បាស់ពីសំណាក់រដ្ឋមន្ត្រីការបរទេសម៉ាឡេស៊ី Mohamad Hasan អំឡុងសន្និសីទកាសែតក្នុងទីក្រុងគូឡាឡាំពួ នៅថ្ងៃអង្គារទី១៤ខែតុលាឆ្នាំ២០២៥, មេដឹកនាំអាមេរិកនឹងមកចូលរួមកិច្ចប្រជុំកំពូលអាស៊ាននាពេលខាងមុខ ហើយធ្វើជាអធិបតីក្នុងពិធីចុះហត្ថលេខាលើ «កិច្ចព្រមព្រៀងគូឡាឡាំពួ»។

លោក Mohamad និយាយថា «ក្នុងអំឡុងកិច្ចប្រជុំកំពូលនេះ យើងសង្ឃឹមថានឹងឃើញមានការចុះហត្ថលេខាលើសេចក្តីប្រកាសរវាងប្រទេសជិតខាងទាំងពីរ ដើម្បីធានាបាននូវសន្តិភាពនិងបទឈប់បាញ់ប្រកបដោយនិរន្តរភាព»។

សូមជម្រាបជាថ្មី កិច្ចប្រជុំកំពូលអាស៊ានលើកទី៤៧ ក្នុង​ទីក្រុងគូឡាឡាំពួ នឹងប្រព្រឹត្តទៅនៅថ្ងៃទី២៦-២៨ ខែតុលា​៕

អត្ថបទ៖ សុខ សុវណ្ណ

ចុចអាន៖ ត្រាំ នឹងធ្វើជាអធិបតីផ្ទាល់ ក្នុងពិធីចុះកិច្ចព្រមព្រៀងសន្តិភាពកម្ពុជា-ថៃ នៅ​ ម៉ាឡេស៊ី