ត្រាំ នឹងធ្វើជាអធិបតីផ្ទាល់ ក្នុងពិធីចុះកិច្ចព្រមព្រៀងសន្តិភាពកម្ពុជា-ថៃ នៅ​ ម៉ាឡេស៊ី

ប្រធានាធិបតីអាមេរិក ដូណាល់ ត្រាំ នឹងធ្វើដំណើរមកកាន់ប្រទេសម៉ាឡេស៊ី ដើម្បីចូលរួមជាអធិបតីដោយផ្ទាល់ ក្នុងពិធីចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ។ នេះបើតាមការបញ្ជាក់យ៉ាងច្បាស់ពីសំណាក់រដ្ឋមន្ត្រីការបរទេសម៉ាឡេស៊ី Mohamad Hasan អំឡុងសន្និសីទកាសែតក្នុងទីក្រុងគូឡាឡាំពួ នៅថ្ងៃអង្គារទី១៤ខែតុលាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mohamad ប្រាប់ទៅអ្នកសារព័ត៌មានថា មេដឹកនាំអាមេរិកនឹងមកចូលរួមកិច្ចប្រជុំកំពូលអាស៊ាននាពេលខាងមុខ ហើយធ្វើជាអធិបតីក្នុងពិធីចុះហត្ថលេខាលើ «កិច្ចព្រមព្រៀងគូឡាឡាំពួ»។

លោក Mohamad បន្តថា «ក្នុងអំឡុងកិច្ចប្រជុំកំពូលដែលនេះ យើងសង្ឃឹមថានឹងឃើញមានការចុះហត្ថលេខាលើសេចក្តីប្រកាសរវាងប្រទេសជិតខាងទាំងពីរ ដើម្បីធានាបាននូវសន្តិភាពនិងបទឈប់បាញ់ប្រកបដោយនិរន្តរភាព»។

សូមជម្រាបជាថ្មី កិច្ចប្រជុំកំពូលអាស៊ានលើកទី៤៧ ក្នុង​ទីក្រុងគូឡាឡាំពួ នឹងប្រព្រឹត្តទៅនៅថ្ងៃទី២៦-២៨ ខែតុលា​។ 

យោងតាមនាយករដ្ឋមន្ត្រីម៉ាឡេស៊ី Anwar Ibrahim, ក្រៅពីលោក ត្រាំ មេដឹកនាំពិភពលោកធំៗចំនួន៣រូបទៀត ក៏នឹងមកចូលរួមក្នុងផងដែរ ក្នុងនោះមានដូចជាប្រធានាធិបតីចិន Xi Jinping, ប្រធានាធីបតីប្រេស៊ីល Luiz Inácio Lula da Silva និងប្រធានាធិបតីអាហ្វ្រិកខាងត្បូង Cyril Ramaphosa៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី៖ កម្ពុជា-ថៃ​នឹងចុះហត្ថលេខាលើបទឈប់បាញ់ក្នុងកិច្ចប្រជុំកំពូលអាស៊ាន ក្រោម​ការ​សម្របសម្រួល​ដោយ​ម៉ាឡេស៊ី-អាមេរិក