UNDP ប៉ាន់​ស្មាន​ការ​កសាង​តំបន់​ហ្កាហ្សា​ឡើង​វិញ​នឹង​ត្រូវ​ចំណាយ​ប្រាក់​៧០​ពាន់​លាន​ដុល្លារ

ការសាងសង់តំបន់​ហ្គាហ្សា​ស្ទ្រីប​ ដែលហែកហួរដោយសង្រ្គាម​ឡើង​វិញ នឹងត្រូវការ​ថវិកាចំនួន៧០​ពាន់លានដុល្លារ ដោយត្រូវការ​២០​ពាន់លានដុល្លារ ក្នុងរយៈពេល​៣​ឆ្នាំដំបូង។ នេះបើយោងតាមការប៉ាន់ស្មានដែលចេញផ្សាយកាលពីថ្ងៃអង្គារ​ទី​១៤​ខែតុលា​ដោយ​កម្មវិធីអភិវឌ្ឍន៍អង្គការសហប្រជាជាតិ (UNDP)។

តួលេខនេះបានមកពីកម្មវិធី«Joint Damage and Needs Assessment» ដែលធ្វើឡើងរួមគ្នាដោយ​សហភាពអឺរ៉ុប អង្គការសហប្រជាជាតិ និងធនាគារពិភពលោក ហើយត្រូវបានបញ្ជាក់ដោយ​លោក Jaco Cilliers តំណាងពិសេសរបស់ UNDP សម្រាប់កម្មវិធីជំនួយដល់ប្រជាជនប៉ាឡេស្ទីន។

លោក Cilliers បាន​និយាយ​ថា​មាន​​សញ្ញា​សន្យា​នៃ​ការ​ប្តេជ្ញាចិត្ត​ផ្នែក​ហិរញ្ញវត្ថុ​ពី​​សហរដ្ឋអាមេរិក កាណាដា រដ្ឋ​អារ៉ាប់ បណ្តា​ប្រទេស​អឺរ៉ុប និង​ស្ថាប័ន​អន្តរជាតិ។ លោកបានបន្ថែមថា កិច្ចខិតខំប្រឹងប្រែងកសាងឡើងវិញក៏ត្រូវតែផ្តោតលើ​ការធ្វើ​ឲ្យ​វិស័យឯកជនរស់ឡើងវិញ តាមរយៈ​ឥណទានខ្នាតតូច និងជំនួយ ដើម្បីជំរុញសេដ្ឋកិច្ចក្នុងតំបន់របស់ហ្គាហ្សា។

យោងតាមការវាយតម្លៃ ផ្ទះចំនួន ៤២៥ ០០០​ខ្នង​ ប្រហែល ៨៤% នៃអគារទាំងអស់នៅហ្គាហ្សា ត្រូវបានបំផ្លាញ ឬខូចខាតចាប់តាំងពីការវាយប្រហាររបស់អ៊ីស្រាអែលបានចាប់ផ្តើមនៅក្នុង​ខែតុលា​ឆ្នាំ​២០២៣។ ការ​ទម្លាក់​គ្រាប់​បែក​ដែល​បាន​បញ្ចប់​កាល​ពី​ថ្ងៃ​ចន្ទ​ក្រោម​កិច្ច​ព្រម​ព្រៀង​បទ​ឈប់​បាញ់​ បាន​បង្កើតកម្ទេច​ថ្ម​ប្រមាណ ៥៥​លាន​តោន​​នៅ​តំបន់​ហ្គាហ្សា។

ប្រតិបត្តិការបោសសម្អាតបានចាប់ផ្តើមរួចហើយ ដោយមាន​កម្ទេចកម្ទីចំនួន ៨១ ០០០​តោនត្រូវបានសម្អាត និង ១៣ ២​០០​តោនត្រូវបានកែច្នៃឡើងវិញ សម្រាប់ការត្រួសត្រាយផ្លូវ និងការសាងសង់ជម្រកបណ្តោះអាសន្ន។

លោក Cilliers បានកត់សម្គាល់ថា ក្រុមសង្គ្រោះនៅតែស្វែងរកសាកសពជនរងគ្រោះ នៅ​ក្រោម​គំនរ​បាក់បែក។ ជម្លោះបានបញ្ចប់ជាផ្លូវការនៅ​ថ្ងៃទី​១៣​ខែតុលា នៅពេលដែល​ចំណាប់ខ្មាំង​២០​នាក់ ដែលត្រូវបានឃុំខ្លួននៅហ្គាហ្សាត្រូវបានដោះលែង​ឲ្យ​ទៅអ៊ីស្រាអែលជាថ្នូរនឹង​អ្នកទោសប៉ាឡេស្ទីនចំនួន ១ ៨០៩​នាក់៕

ដោយ៖ ឈាង