ព័ត៌មានអន្ដរជាតិ

គីម យ៉ុងណាម មន្ត្រីជើងចាស់៣ជំនាន់របស់កូរ៉េខាងជើង ទទួលមរណភាពក្នុងអាយុ៩៧ឆ្នាំ

បានផុស

៧ ខែ មុន

នៅ

ថ្ងៃអង្គារ ៤ វិច្ឆិកា ២០២៥

ដោយ

Chheang

យោងតាមការចុះផ្សាយនាថ្ងៃអង្គារទី៤ខែវិច្ឆិកាឆ្នាំ២០២៥របស់ BBC លោក គីម យ៉ុងណាម (Kim Yong Nam) ដែលជាអតីតប្រមុខរដ្ឋដ៏មានឥទ្ធិពល និងជាមន្ត្រីដែលកាន់អំណាចយូរជាងគេបំផុតរបស់ប្រទេសកូរ៉េខាងជើង បានទទួលមរណភាពក្នុងអាយុ៩៧ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានកណ្តាលកូរ៉េ (KCNA) បាននិយាយថា លោក គីម បានទទួលមរណភាពកាលពីថ្ងៃទី៣ខែវិច្ឆិកា ដោយពណ៌នាថា គាត់ជា«អ្នកបដិវត្តន៍ជំនាន់ចាស់» ដែលបានបង្កើត«សមិទ្ធផលដ៏អស្ចារ្យ» ក្នុងការអភិវឌ្ឍប្រទេស។

គីម យ៉ុងណាម បានបម្រើការជាប្រធានសភាប្រជាជនកំពូលពីឆ្នាំ១៩៩៨ ដល់ឆ្នាំ២០១៩ ដែលជាមុខតំណែងដ៏ធំមួយដែលធ្វើឲ្យគាត់ក្លាយជាប្រមុខរដ្ឋជាផ្លូវការក្រោមបីជំនាន់នៃគ្រួសារគីមដែលកំពុងកាន់អំណាច មានដូចជា ស្ថាបនិក គីម អ៊ីលស៊ុង កូនប្រុសរបស់គាត់ គីម ជុងអ៊ីល និងមេដឹកនាំបច្ចុប្បន្ន គីម ជុងអ៊ុន។

ទោះបីជាមិនពាក់ព័ន្ធនឹងត្រកូលគីមដែលកំពុងកាន់អំណាចក៏ដោយ លោក គីម យ៉ុងណាម គឺជាអ្នកបម្រើការដ៏ស្មោះត្រង់របស់របបនេះអស់រយៈពេលជាង៦ទសវត្សរ៍ ដោយកាន់តំណែងការទូតជាន់ខ្ពស់ក្នុងនាមជារដ្ឋមន្ត្រីការបរទេស។

កើតនៅឆ្នាំ១៩២៨ក្នុងអំឡុងពេលអាណានិគមរបស់ប្រទេសជប៉ុនលើប្រទេសកូរ៉េ លោកគីមបានសិក្សានៅសាកលវិទ្យាល័យ Kim Il Sung និងនៅទីក្រុងមូស្គូ មុនពេលចូលរួមជាមួយគណបក្សពលករដែលកំពុងកាន់អំណាចក្នុងទសវត្សរ៍ឆ្នាំ១៩៥០។

គាត់ត្រូវបានគេស្គាល់សម្រាប់ការប្រៀនប្រដៅរបស់គាត់ និងភាពស្មោះត្រង់មិនងាករេចំពោះគ្រួសារគីម។

លោកគីម បានដឹកនាំគណៈប្រតិភូអន្តរកូរ៉េជាច្រើន ដូចជា ការទៅកិច្ចប្រជុំកំពូលឆ្នាំ២០០០ និង២០០៧ ជួបជាមួយអតីតប្រធានាធិបតីកូរ៉េខាងត្បូង Kim Dae-jung និង Roh Moo-hyun ហើយបានដឹកនាំគណៈប្រតិភូទីក្រុងព្យុងយ៉ាងទៅចូលរួមព្រឹត្តិការណ៍កីឡាអូឡាំពិករដូវរងាឆ្នាំ២០១៨ នៅប្រទេសកូរ៉េខាងត្បូង ជាកន្លែងដែលលោកបានជួបជាមួយអតីតប្រធានាធិបតី Moon Jae-in នាពេលនោះ។

សូមជម្រាបថា មិនដូចមនុស្សសម័យរបស់គាត់ជាច្រើនដែលត្រូវបានបោសសម្អាត ឬប្រហារជីវិតក្នុងអំឡុងពេលផ្លាស់ប្តូរអំណាច លោក គីម យ៉ុងណាម បានចូលនិវត្តន៍ដោយស្ងាត់ស្ងៀមក្នុងឆ្នាំ២០១៩ ដែលជាការបញ្ចប់អាជីពដ៏កម្រមួយដែលគ្មានភាពចម្រូងចម្រាសនៅក្នុងទិដ្ឋភាពនយោបាយដែលប្រែប្រួលរបស់កូរ៉េខាងជើង៕