កូរ៉េខាងជើងថ្កោលទោសទណ្ឌកម្មថ្មីរបស់អាមេរិក ហើយ​ចាត់ទុក​ថាជាព័ស្តុតាងនៃចរិតអរិភាព

ប្រទេសកូរ៉េខាងជើង​ នៅ​ថ្ងៃ​ព្រហស្បតិ៍​ទី​៦​វិច្ឆិកា​នេះ​បានបរិហារ​ទណ្ឌកម្មចុងក្រោយរបស់សហរដ្ឋអាមេរិក ដែលផ្តោតលើបុគ្គល និងអង្គការនានាដែលត្រូវបានចោទប្រកាន់ពីបទឧក្រិដ្ឋកម្មតាមអ៊ីនធឺណិត ដោយនិយាយថា ទង្វើ​នេះ​បានឆ្លុះបញ្ចាំងពី«ចរិត​ដ៏អាក្រក់របស់ទីក្រុងវ៉ាស៊ីនតោន ដើម្បី​បង្កើត​អរិភាព» ចំពោះទីក្រុងព្យុងយ៉ាង។

ការរិះគន់នេះ បានធ្វើឡើងបន្ទាប់ពី​ក្រសួងរតនាគារសហរដ្ឋអាមេរិក​ប្រកាស​ដាក់ទណ្ឌកម្មលើ​បុគ្គលចំនួន​៨​នាក់ និងអង្គភាពចំនួន​២​ ដែលត្រូវបានចោទប្រកាន់ថាជាប់ពាក់ព័ន្ធក្នុងការលាងលុយកខ្វក់ពីគម្រោងខុសច្បាប់របស់កូរ៉េខាងជើង។ វ៉ាស៊ីនតោនបាននិយាយថា ពួក Hacker បានធ្វើប្រតិបត្តិការក្រោមការឧបត្ថម្ភរបស់រដ្ឋ ដើម្បីផ្តល់ហិរញ្ញប្បទានដល់កម្មវិធីអាវុធនុយក្លេអ៊ែររបស់ទីក្រុងព្យុងយ៉ាង ដោយលួច និងលាងលុយជាង​៣​ពាន់លានដុល្លារ ដែលភាគច្រើនជារូបិយប័ណ្ណគ្រីបតូក្នុងរយៈពេល​៣​ឆ្នាំកន្លងមកនេះ។

នៅក្នុងសេចក្តីថ្លែងការណ៍ដែលធ្វើឡើងដោយ​ទីភ្នាក់ងារសារព័ត៌មានមជ្ឈិមកូរ៉េ KCNA អនុរដ្ឋមន្ត្រី​ទទួលបន្ទុកកិច្ចការអាមេរិក​លោក Kim Un Chol បានថ្កោលទោសទង្វើនេះថាជា​ការដាក់ទណ្ឌកម្មឯកតោភាគីជុំទី៥ ដែលដាក់ដោយរដ្ឋបាលអាមេរិកថ្មីចាប់តាំងពីចូលកាន់តំណែង។

លោក​ Kim បានលើក​ឡើង​ថា «តាមរយៈការធ្វើដូច្នេះ រដ្ឋបាលសហរដ្ឋអាមេរិកបានបង្ហាញជំហររបស់ខ្លួនទាំងស្រុងថា វានឹងក្លាយ​ជា​អរិភាពចំពោះកូរ៉េខាងជើង​នៅ​ទី​បញ្ចប់» ដោយបន្ថែមថា វិធានការនេះ​នឹងមិនផ្លាស់ប្តូរទិសដៅគោលនយោបាយរបស់ទីក្រុងព្យុងយ៉ាងទេ។

ទណ្ឌកម្មនេះ ត្រូវបានប្រកាសភ្លាមៗបន្ទាប់ពី​ប្រធានាធិបតីអាមេរិក ដូណាល់ ត្រាំ បង្ហាញឆន្ទៈជួបជាមួយ​មេដឹកនាំកូរ៉េខាងជើងលោក គីម ជុងអ៊ុន ក្នុង​ដំណើរទស្សនកិច្ចនៅអាស៊ី​នាពេលថ្មីៗនេះ ដែលជាការផ្តល់ជូនដែលមិនទាន់មានការឆ្លើយតបពីទីក្រុងព្យុងយ៉ាង។

លោកត្រាំ និងលោកគីម បានរៀបចំ​កិច្ចប្រជុំកំពូលចំនួន​៣​ដង​ក្នុងអំឡុងអាណត្តិដំបូងរបស់លោកត្រាំ ប៉ុន្តែកិច្ចពិភាក្សាមិន​ជោគជ័យ ជុំវិញ​បញ្ហា​​​បន្ធូរបន្ថយទណ្ឌកម្ម និង​ការរំសាយអាវុធនុយក្លេអ៊ែរ៕

ដោយ៖ ឈាង