ក្រសួងការបរទេសអាមេរិក ចេញសេចក្តីថ្លែងការណ៍ ជុំវិញជម្លោះ​​កម្ពុជា-​ថៃ មុនកិច្ចប្រជុំនៅម៉ាឡេស៊ី​

ជាថ្មីម្តងទៀត នៅថ្ងៃចន្ទទី២២ខែធ្នូឆ្នាំ២០២៥ ក្រសួងការបរទេសអាមេរិក បានចេញសេចក្តីថ្លែងការណ៍ ជុំវិញជម្លោះ​រវាង​កម្ពុជា និង​ថៃ​ដែល​កំពុង​បន្ត​អូសបន្លាយ។

ក្នុងសេចក្តីថ្លែងការណ៍នោះ សហរដ្ឋអាមេរិក បានបន្តអំពាវនាវដល់ប្រទេសកម្ពុជា និង ថៃឲ្យបញ្ចប់អរិភាព ដោយអនុវត្តយ៉ាងពេញលេញនូវកិច្ចព្រមព្រៀងសន្តិភាពទីក្រុងគូឡាឡាំពួ ដែលរួមមានយន្តការដើម្បីពន្លឿនការដោះមីនមនុស្សធម៌ និងដោះស្រាយបញ្ហាព្រំដែនផងដែរ។

ក្រសួងលើកឡើងថា៖ «យើងសូមស្វាគមន៍ចំពោះមេដឹកនាំអាស៊ានដែលមកជួបជុំគ្នានៅសប្តាហ៍នេះ ដើម្បីគាំទ្រដល់ប្រទេសកម្ពុជា និងថៃក្នុងការគោរពយ៉ាងពេញលេញនូវការប្តេជ្ញាចិត្តរបស់ពួកគេក្នុងការបញ្ចប់ជម្លោះ»។

ក្រសួងបានចេញសេចក្តីថ្លែងការណ៍នេះ មុនកិច្ចប្រជុំរដ្ឋមន្ត្រីការបរទេសអាស៊ាន ដែលរៀបចំឡើងនៅទីក្រុងគូឡាឡាំពួ ប្រទេសម៉ាឡេស៊ី នាថ្ងៃចន្ទទី២២ខែធ្នូឆ្នាំ២០២៥នេះ។ 

ដោយមានការចូលរួមទាំងពីសំណាក់ភាគីអាមេរិកនិងចិនផងនោះ ជំនួបនេះនឹងក្លាយជាវេទិកា នាំឲ្យស្ថានការណ៍កម្ពុជា-ថៃ ធូរស្រាល កាត់បន្ថយភាពតានតឹង ឈានឆ្ពោះទៅរកបទឈប់បាញ់ជាផ្លូវការ៕

អត្ថបទ៖ សុខ សុវណ្ណ