តើអ្នកណានឹងទទួលបានប្រាក់ បើអាមេរិកទិញ Greenland បានសម្រេច?

សំណួរថា «តើអ្នកណានឹងទទួលបានប្រាក់» ប្រសិនបើសហរដ្ឋអាមេរិកទិញកោះ Greenland បានសម្រេច បានក្លាយជាប្រធានបទដ៏ស្មុគស្មាញមួយផ្នែកច្បាប់ និងការទូត។ ដោយសារ Greenland ជាតំបន់ស្វយ័តក្រោមព្រះរាជាណាចក្រដាណឺម៉ាក ការទូទាត់ប្រាក់នឹងមិនមែនជារឿងសាមញ្ញដូចការសរសេរមូលប្បទានប័ត្រ​ឲ្យ​ទៅបុគ្គល ឬរដ្ឋាភិបាលណាមួយនោះទេ។

តាមរយៈច្បាប់ស្វ័យគ្រប់គ្រងឆ្នាំ​២០០៩ ដាណឺម៉ាកមិនអាចលក់ Greenland តាមចិត្តចង់បានឡើយ ព្រោះប្រជាជននៅលើកោះនេះមានសិទ្ធិសម្រេចវាសនាដោយខ្លួនឯង។ អ្នកជំនាញផ្នែកច្បាប់យល់ឃើញថា ដើម្បីឲ្យ​ការទិញលក់នេះកើតឡើងបាន លុះត្រាតែ Greenland ប្រកាសឯករាជ្យជាមុនសិន។

ក្នុងករណីនោះ ថវិកានឹងត្រូវបែងចែកដូចខាងក្រោម៖

១. រដ្ឋាភិបាល Greenland៖ ប្រសិនបើមានការព្រមព្រៀង ប្រាក់ភាគច្រើននឹងត្រូវធ្លាក់ទៅក្នុងដៃរដ្ឋាភិបាល Greenland ផ្ទាល់ ដើម្បីប្រើប្រាស់ក្នុងការអភិវឌ្ឍជំនួស​ឲ្យ​ប្រាក់ឧបត្ថម្ភពីដាណឺម៉ាក។ មានព័ត៌មានលេចឮថា អាមេរិកអាចនឹងផ្តល់ប្រាក់ឧបត្ថម្ភផ្ទាល់ដល់ប្រជាជនម្នាក់ៗប្រហែល ១០០ ០០០​ដុល្លារ ដែលសរុបជាទឹកប្រាក់ប្រហែល ៥.៦ពាន់លានដុល្លារ សម្រាប់ប្រជាជនទាំងមូល។

២. ប្រទេសដាណឺម៉ាក៖ ជាការគួរឲ្យ​ភ្ញាក់ផ្អើល ដាណឺម៉ាកអាចនឹងមិនទទួលបាន «ថ្លៃលក់» ផ្ទាល់នោះទេ។ អត្ថប្រយោជន៍ចម្បងសម្រាប់ដាណឺម៉ាក គឺការឈប់ចំណាយប្រាក់ឧបត្ថម្ភប្រចាំឆ្នាំប្រហែល ៦០០លានដុល្លារ ទៅ​ឲ្យ Greenland ប៉ុន្តែពួកគេនឹងត្រូវបាត់បង់ឥទ្ធិពលភូមិសាស្ត្រនយោបាយនៅក្នុងតំបន់អាកទិក។

បច្ចុប្បន្ន តម្លៃសរុបនៃកោះនេះត្រូវបានគេប៉ាន់ស្មានខុសៗគ្នា ចាប់ពី ១៥ពាន់លានដុល្លារ (ផ្អែកលើការសន្សំថវិកាឧបត្ថម្ភ) រហូតដល់ជាង ៣.៧ទ្រីលានដុល្លារ (ផ្អែកលើតម្លៃធនធានរ៉ែដ៏មហាសាលដែលមាននៅលើកោះ)៕

ដោយ៖ ឈាង