មួយថ្ងៃស្លាប់ជាង២ពាន់នាក់ នាយករដ្ឋមន្រ្តីឥណ្ឌានិយាយថា កូវីដកំពុងវាយប្រហារដូច “ព្យុះ”

នៅថ្ងៃពុធទី២១ខែមេសានេះ ប្រទេសឥណ្ឌា បានរាយការណ៍ថាមានអ្នកស្លាប់ដោយសារជំងឺកូវីដ-១៩ ជាង២,០០០នាក់ ដែលជាចំនួនអ្នកស្លាប់ប្រចាំថ្ងៃខ្ពស់បំផុតសម្រាប់ប្រទេសនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងសុខាភិបាលបានរាយការណ៍ថា មានអ្នកឆ្លងថ្មីចំនួន ២៩៥,០០០ករណីក្នុងរយៈពេល ២៤ម៉ោងចុងក្រោយ បើប្រៀបធៀបទៅនឹងចំនួនដែលគេមើលឃើញនៅសហរដ្ឋអាមេរិកក្នុងខែមករា។

ស្របពេលជាមួយគ្នានោះ ក្នុងរយៈពេល២៤ម៉ោងចុងក្រោយ ឥណ្ឌាមានអ្នកស្លាប់ចំនួន ​២,០២៣នាក់ ដែលនាំឲ្យចំនួនអ្នកស្លាប់សរុបរបស់ប្រទេសនេះ កើនដល់ ១៨២,៥៥៣នាក់។ 

នៅក្នុងសុន្ទរកថាទៅកាន់ប្រជាជាតិកាលពីយប់ថ្ងៃអង្គារ លោកនាយករដ្ឋមន្រ្តី Narendra Modi បាននិយាយថា ប្រទេសដែលមានប្រជាជនចំនួន ១.៣ពាន់លាននាក់មួយនេះ កំពុងស្ថិតក្នុងការប្រយុទ្ធដ៏ធំជាថ្មីម្តងទៀត។

លោក Modi និយាយថា “ស្ថានភាពបានស្ថិតក្រោមការគ្រប់គ្រងកាលពីពីរបីសប្តាហ៍មុន ប៉ុន្តែរលកទី២នៃការឆ្លងជំងឺកូវីដ-១៩ពេលនេះ គឺបានវាយប្រហារដូចជាព្យុះ”។

ប៉ុន្មានសប្តាហ៍ថ្មីៗនេះ ប្រជាជនឥណ្ឌាត្រូវបានគេមើលឃើញថាបានចូលរួមក្នុងកម្មវិធីដែលមានមនុស្សកកកុញដូចជា ពិធីបុណ្យសាសនា Kumbh Mela, ការជួបជុំផ្នែកនយោបាយ ព្រមទាំងពិធីរៀបអាពាហ៍ពិពាហ៍ដ៏ហ៊ឹកហ៊ាក់ និងការប្រកួតកីឡាគ្រីកឃីតផងដែរ។

ករណីឆ្លងកូវីដសរុបរបស់ប្រទេសឥណ្ឌាឥឡូវនេះ កើនដល់១៥.៦លានករណី ជាប់ចំណាត់ថ្នាក់លេខ២បន្ទាប់ពីសហរដ្ឋអាមេរិក ដែលបានរាយការណ៍ថាមានអ្នកឆ្លងជាង ៣១លានករណី៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ ឥណ្ឌាត្រូវបានដាក់ក្នុង«បញ្ជីក្រហម»ហាមធ្វើដំណើរចូលអង់គ្លេស