EU មិនពង្រីកបេសកកម្មនៅ​ច្រក​សមុទ្រ Hormuz តាមការ​អំពាវនាវរបស់ត្រាំទេ​

ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បាននិយាយកាលពីថ្ងៃចន្ទទី១៦មីនាថា EU «គ្មានចំណូលចិត្ត» ក្នុងការពង្រីកអាណត្តិនៃបេសកកម្មកងទ័ពជើងទឹក «Aspides» ចូលទៅក្នុងច្រកសមុទ្រ Hormuz ទេ ទោះបីជាមានការអំពាវនាវកាន់តែខ្លាំងឡើងឲ្យជួយធានាសុវត្ថិភាព​នាវាដឹក​ប្រេង​​ និងការពារការរំខានធំៗចំពោះការផ្គត់ផ្គង់ប្រេងសកលក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters លោកស្រី Kaja Kallas បានប្រាប់អ្នកយកព័ត៌មាននៅក្នុងសន្និសីទសារព័ត៌មានមួយ ដោយលើកឡើងអំពីការពិភាក្សាថា ប្រតិបត្តិការ «Aspides» គួរតែត្រូវបានពង្រឹង ព្រោះវាមិនមានទ្រព្យសម្បត្តិកងទ័ពជើងទឹកច្រើនពេកទេ។ ប៉ុន្តែសម្រាប់ពេលនេះ តើយើងគួរពង្រីកអាណត្តិនេះដើម្បីគ្របដណ្តប់ច្រកសមុទ្រ Hormuz ដែរឬទេ? គ្មាននរណាម្នាក់ចង់ចូលរួមឲ្យ​សកម្មក្នុងសង្គ្រាមនេះទេ»។

លោកស្រី Kallas បានថ្លែងបែបនេះ បន្ទាប់ពីរដ្ឋមន្ត្រីការបរទេសចំនួន ២៧រូបរបស់សហភាពអឺរ៉ុប បានជួបជុំគ្នានៅទីក្រុងព្រុចសែល ដើម្បីពិភាក្សាអំពីរបៀបដែលអឺរ៉ុបគួរឆ្លើយតបទៅនឹងផលប៉ះពាល់នៃសង្គ្រាមជាមួយអ៊ីរ៉ង់ ដែលអ្នកវិភាគពិពណ៌នាថា ជាការរំខានដ៏ធំបំផុតចំពោះការផ្គត់ផ្គង់ប្រេងសកលក្នុងប្រវត្តិសាស្ត្រ និងបានធ្វើឲ្យតម្លៃប្រេងឡើងលើសពី ១០០ ដុល្លារក្នុងមួយបារ៉ែល។

ការកត់សម្គាល់របស់លោកស្រី ក៏បានកើតឡើងមួយថ្ងៃ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានបង្កើនសម្ពាធលើអឺរ៉ុប ដើម្បីជួយការពារច្រកសមុទ្រ Hormuz ដោយព្រមានថា ណាតូប្រឈមមុខនឹងអនាគត «អាក្រក់ខ្លាំង» ប្រសិនបើសមាជិករបស់ខ្លួនមិនមកជួយទីក្រុងវ៉ាស៊ីនតោន៕

អត្ថបទ៖ សាង ស្រីល័ក្ខ