​Mark Carney៖​ ទំនាក់ទំនងសេដ្ឋកិច្ច​​កាណាដា​និង​អាមេរិក​ ធ្លាក់ដល់​ចំណុចខ្សោយ

នាយករដ្ឋមន្ត្រីកាណាដា លោក Mark Carney បាន​លើក​ឡើង​នៅ​​ថ្ងៃទី២០មេសា ថា បន្ទាប់ពីភាពជាដៃគូជាមួយសហរដ្ឋអាមេរិកអស់រយៈពេលជាច្រើនទសវត្សរ៍មក ទំនាក់ទំនងសេដ្ឋកិច្ចជិតស្និទ្ធរវាងប្រទេសទាំងពីរឥឡូវនេះបាន​​ធ្លាក់​ដល់​«ចំណុចខ្សោយ» ដែលត្រូវការកែសម្រួល​​។ នេះបើយោងតាមការចុះផ្សាយពីទីភ្នាក់ងារសារព័ត៌មាន Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Carney បានអត្ថាធិប្បាយលើទំនាក់ទំនងទ្វេភាគីនៅក្នុងវីដេអូមួយថា ៖«អាមេរិកបានផ្លាស់ប្តូរ​គោល​ជំហររបស់ខ្លួនលើ​វិស័យ​ពាណិជ្ជកម្មជាមូលដ្ឋាន ដោយដំឡើងពន្ធដល់កម្រិតដែលយើងបានឃើញ ធ្លាប់​តែ​កើត​ឡើង​ក្នុងអំឡុងពេលវិបត្តិសេដ្ឋកិច្ចដ៏ធំ (នៅចុងទសវត្សរ៍ឆ្នាំ ១៩៣០)។ ចំណុចខ្លាំងជាច្រើនរបស់កាណាដាពីមុន ដោយផ្អែកលើទំនាក់ទំនងជិតស្និទ្ធរបស់ខ្លួនជាមួយអាមេរិក ឥឡូវនេះបានក្លាយជាចំណុចខ្សោយ ហើយយើងត្រូវយកឈ្នះលើចំណុចខ្សោយទាំងនេះ»​។

​នាយករដ្ឋមន្ត្រី​កាណាដា បាន​បន្ថែមទៀត ថា ​​កាណាដា មិនអាចគ្រប់គ្រងការរំខានពីប្រទេសជិតខាងរបស់ខ្លួនបានទេ ហើយកាណា​​​ដា​ក៏មិនអាចដាក់អនាគតរបស់ខ្លួន ដោយសង្ឃឹមថា ស្ថានភាពនឹងមានស្ថេរភាពក្នុងពេលឆាប់ៗនេះដែរ។ ជាក់ស្ដែងប្រទេសនេះត្រូវកំណត់គោលដៅមិនពឹងផ្អែកលើប្រទេសណាមួយហួសហេតុ​​ពេក​ទេ​​ ចំពេលមានបរិបទថា ពិភពលោកកំពុងតែមានគ្រោះថ្នាក់ និងបែកបាក់។ ហេតុដូច្នេះ លោកនឹងធ្វើបច្ចុប្បន្នភាពជាប្រចាំដល់ប្រជាជន អំពីកិច្ចខិតខំប្រឹងប្រែងរបស់រដ្ឋាភិបាលក្នុងការពង្រឹងសេដ្ឋកិច្ច និងការពារអធិបតេយ្យភាព។

នាយករដ្ឋមន្ត្រីកាណាដាដែល​មិន​ចុះ​ញ៉ម​នឹង​ការ​គំរាម​​របស់​លោក ដូណាល់ ត្រាំ ក៏បានដាក់ក្ដីសង្ឃឹមថា អាមេរិកនឹង​វិល​ត្រឡប់​ទៅរកភាពប្រក្រតីវិញ ដោយ​មិនអាចត្រូវបានចាត់ទុកថា ​អ្វី​ដែលរដ្ឋបាល​​ត្រាំ​ធ្វើ​នោះ​ជា​យុទ្ធសាស្ត្រដែលអាចធ្វើទៅបាននោះទេ ផ្ទុយទៅវិញ កាណាដា​ត្រូវកសាងប្រទេសឲ្យរឹងមាំគ្រប់គ្រាន់ដើម្បីទប់ទល់នឹងការប្រែប្រួលពីខាងក្រៅ។

យ៉ាងណាមិញ ទំនាក់ទំនងសហរដ្ឋអាមេរិក-កាណាដាកំពុងជួបប្រទះនឹងភាពចលាចលជាច្រើន ក្រោយការធ្វើ​សមាហរណកម្ម​សេដ្ឋកិច្ចយ៉ាងស៊ីជម្រៅអស់រយៈពេលជាច្រើនទសវត្សរ៍ និង បន្ទាប់ពីប្រធានាធិបតី ដូណាល់ ត្រាំ បានដាក់ពន្ធជាច្រើនលើគូប្រជែង រួមទាំងសម្ព័ន្ធមិត្ត ដែលរំខានដល់ពាណិជ្ជកម្មពិភពលោក៕

អត្ថបទ៖ សាង ស្រីល័ក្ខ