​អាជ្ញាធរអាមេរិក​ ចាប់ខ្លួន​និស្សិតស្រី​ដែលបង្ហោះ​សារ​​ឌឺដង​លេងសើច​ឲ្យ​នាយករដ្ឋមន្ត្រីអ៊ីស្រាអែល​ទម្លាក់​គ្រាប់បែក​​​

​​អាជ្ញាធរ​​សហរដ្ឋអាមេរិក​​​បច្ចុប្បន្ន​ហាក់រឹតត្បិត​កាន់តែ​ខ្លាំង​លើ​​ការ​បញ្ចេញ​មតិ​ពាក់​ព័ន្ធ​សង្គ្រាម​​នៅមជ្ឈិមបូព៌ា ជាពិសេស​​ការ​រិះគន់​​នាយករដ្ឋុមន្ត្រី​​អ៊ីស្រាអែល លោក Benjamin Netanyahu ​​ដែល​ជាសម្ព័ន្ធមិត្ត​ជិត​ស្និទ្ធ​របស់​ប្រធានាធិបតី​ សហរដ្ឋអាមេរិ​ក លោក ដូណាល់ ត្រាំ​។​​

​​​ព័ត៌មាន​​​កំពុង​​ផ្ទុះ​ល្បី​លើ​បណ្តាញ​សង្គម​​​​និង​ការ​ផ្សព្វផ្សាយ​យ៉ាងទូលំទូលាយ​​នៅ​លើ​​ពិភពលោក គឹ​​ការ​ចាប់ខ្លួន​​និស្សិត​ស្រីម្នាក់​ ​វ័យ​​ជាង​​២០ឆ្នាំ ដែល​បាន​​បង្ហោះសារ​ជជែក​​គ្នា​ក្នុងក្រុម​​​​​​​​លើ​បណ្តាញ​សង្គម WhatsApp ​ដែល​ហាក់ដូចជា​ឌឺដង​​​ឱ្យនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) មក«​ទម្លាក់គ្រាប់បែក»​ ទៅលើមហាវិទ្យាល័យរបស់នាង​។ ​

​សារ​ព័ត៌មាន​ wionews.com ដែល​មាន​មូលដ្ឋាន​នៅសហរដ្ឋអាមេរិក បាន​​រាយការណ៍​នៅថ្ងៃទី​២០ខែ​​មេសា​ ឲ្យ​ដឹងថា និស្សិតសាកលវិទ្យាល័យអន្តរជាតិផ្លរីដា (Florida International University) ឈ្មោះ​​​ ហ្គាប្រីឡា សាលដាណា (Gabriela Saldana) ត្រូវបានចាប់ខ្លួនពីបទ​ចោទ​​​ឧក្រិដ្ឋមួយ បន្ទាប់ពីបានបង្ហោះសារ​​ដែល​ទំនង​​លេងសើច​​អំពី​ការ​ស្នើ​ឲ្យនាយក​រដ្ឋមន្ត្រី​អ៊ីស្រាអែលបំផ្ទុះ​គ្រាប់​បែក​​​នៅ​បរិវេណ​សាកល​វិទ្យាល័យ​ដែលនាងរៀន ហើយចាត់​ទុក​រឿង​នោះ​ជា​ «រឿងកំប្លែង»។

​យោង​សេចក្តីរាយការណ៍​របស់​ NDTV ​​​នៅមុន​ការ​ចាប់ខ្លួន​ ​​​ប៉ូលិស​​​​​​ប្រចាំ​នៅសាកលវិទ្យាល័យ​ផ្លារីដា​អន្តរជាតិ ​​(FIU police) បាន​និយាយថា ពួក​គេ​​បាន​ធ្វើ​ការងារ​ជាតិ​ក្រុម​ការងារ​​ប្រឆាំង​ភេរវកម្ម​​​ចម្រុះ​របស់​ FBI និង ​​ការិយាល័យ​អគ្គរដ្ឋអាជ្ញា​​ប្រចាំរដ្ឋ​ Miami ដើម្បី​កំណត់​អត្ថសញ្ញាណ​និស្សិត​នោះ​។

​តាមការ​ផ្សព្វផ្សាយ​នោះ និស្សិតស្រី​​​រូបនោះ​ បានប្រាប់មន្ត្រីថា «វាជារឿងកំប្លែង» ប៉ុន្តែ អាជ្ញាធរកំពុងចាត់ទុកការគំរាមកំហែងនេះយ៉ាងធ្ងន់ធ្ងរ ក្រោមច្បាប់របស់រដ្ឋ Florida ស្តីពីការគំរាមកំហែងទាក់ទងនឹងសាលារៀន។ អាជ្ញាធរបានបកស្រាយពាក្យ «bonbon» របស់នាង​ក្នុងការ​បង្ហោះ​ថា ជា ការគំរាមកំហែងដែលអាចទុកចិត្តបានប្រឆាំងនឹងលោក បេនចាមីន ណេតាន់យ៉ាហ៊ូ។

យោងតា​ម​សេចក្តីរាយការណ៍​របស់ NBC Miami របាយការណ៍ចាប់ខ្លួនបានបង្ហាញថា នាង ហ្គាប្រីឡា សាលដាណា បាន «គំរាមកំហែងសម្លាប់ ឬធ្វើបាបរាងកាយដល់បុគ្គលទាក់ទងនឹងព្រឹត្តិការណ៍ដែលបានកំណត់ពេលនៅថ្ងៃសុក្រ ទី ១០ ខែមេសា ឆ្នាំ ២០២៦ តាមរយៈការជជែកជាក្រុម WhatsApp»​។

​តាមសេចក្តីរាយការណ៍របស់ NDTV សាររបស់​និស្សិតនោះ​ត្រូវបានផ្ញើនៅយប់ថ្ងៃពុធសប្តាហ៍​មុន​ទៅកាន់ការជជែកមួយដែលត្រូវបានគេរាយការណ៍ថា មានក្រុ្ម (Group)​​ មួយ​ដែល​មាន​និស្សិតប្រហែល ២១៥​នាក់។ នាងបានផ្ញើសារ​នោះ​នៅពេលដែលនិស្សិតកំពុងពិភាក្សាអំពីព្រឹត្តិការណ៍នាពេលខាងមុខនៅមជ្ឈមណ្ឌលប្រជុំ Ocean Bank របស់សាកលវិទ្យាល័យ។ សាររបស់ Saldana អានថា៖ «@Netanyahu តើអ្នកអាចទម្លាក់គ្រាប់បែកលើ FIU បានទេ។ ការប្រឡងផ្តាច់ព្រ័ត្រគឺនៅសប្តាហ៍ក្រោយ ហើយខ្ញុំមិនទាន់រួចរាល់ទេ»​។

​សារ​នាងបានបន្ថែមបន្ទាប់ពីនោះថា ៖«នឹងមានគ្រាប់បែកនៅក្នុងមជ្ឈមណ្ឌលប្រជុំ Ocean Bank ហើយវានឹងក្លាយជាកំហុសរបស់ Jonathan»។ នេះបើយោងតាមមន្ត្រីប៉ូលីសសាកលវិទ្យាល័យ។

តាមការ​ដកស្រង់របស់ NDTV នៅពេលដែលនាងបង្ហាញខ្លួននៅក្នុងតុលាការ ចៅក្រម Mindy Glazer បាននិយាយថា «ខ្ញុំអាចយល់ពីជំហររបស់អ្នកនៅពេលអ្នកកំពុងនិយាយថា «នេះជារឿងកំប្លែង» ប៉ុន្តែចំពោះមនុស្សដែលមានគោលបំណង វាមិនមែនជារឿងកំប្លែងទេ ហើយវានឹងគ្រប់គ្រាន់សម្រាប់មូលហេតុដែលអាចកើតមាន»។

ចៅក្រមបានបន្ថែមថា «ខ្ញុំមិននិយាយថា វាគ្រប់គ្រាន់លើ​សពីការសង្ស័យសមហេតុផល​។ ខ្ញុំមិនដឹងថាតើរដ្ឋនឹងអាចបញ្ជាក់វានៅក្នុងសវនាការឬអត់នោះទេ ប៉ុន្តែសម្រាប់គោលបំណងនៃសវនាការនេះ ខ្ញុំជឿថា មានគ្រប់គ្រាន់សម្រាប់មូលហេតុដែលអាចកើតមាន»៕​​

រ៉ាន់ រើយ​