ព័ត៌មានអន្ដរជាតិ

រដ្ឋមន្រ្តីការពារជាតិអ៊ីស្រាអែល គំរាមវាយប្រហារពាសពេញផ្ទៃប្រទេសលីបង់

បានផុស

១ ខែ មុន

នៅ

ថ្ងៃអង្គារ ២៨ មេសា ២០២៦

ដោយ

ជម្លោះរវាងអ៊ីស្រាអែល និងប្រទេសលីបង់ ដែលជាមូលដ្ឋានរបស់ក្រុមហេសបូឡា គាំទ្រដោយអ៊ីរ៉ង់ កាន់តែមានភាពផុយស្រួយងាយធ្លាក់ចូលទៅក្នុងជម្លោះជាថ្មីទៀត បើទោះបីជា មានបទឈប់បាញ់សម្របសម្រួលដោយសហរដ្ឋអាមេរិកកាលពីថ្ងៃទី១៧ ខែមេសា ដែលជាបទឈប់បាញ់សំខាន់បំផុតឈានទៅបញ្ចប់សង្គ្រាមនៅអ៊ីរ៉ង់ផងនោះ។

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បានចេញការគំរាមថ្មីមួយដល់ប្រទេសលីបង់កាលពីថ្ងៃចន្ទដែលថា ភ្លើងសង្រ្គាមនឹងឆាបឆេះប្រទេសលីបង់ទាំងមូល បន្ទាប់ពីនាយករដ្ឋមន្ត្រីអ៊ីស្រាអែលបញ្ជាឱ្យបង្កើនកម្លាំងយោធាប្រឆាំងនឹងទីក្រុងបេរូតត្រឹមតែរយៈពេល២ថ្ងៃប់ុណ្ណោះ។

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី២៧ ខែមេសា ឆ្នាំ២០២៦ លោក Katz ថ្លែងក្នុងកិច្ចប្រជុំជាមួយបេសកជនអង្គការសហប្រជាជាតិប្រចាំប្រទេសលីបង់ លោកស្រី Jeanine Hennis-Plasschaert ថា៖ « [ប្រធានក្រុមហេសបូឡា] លោក Naim Qassem កំពុងលេងជាមួយភ្លើង ហើយភ្លើងនឹងឆេះហេសបូឡា និងប្រទេសលីបង់ទាំងមូល»។

រដ្ឋមន្ត្រីអ៊ីស្រាអែលអះអាងថា៖ « រដ្ឋាភិបាលលីបង់បន្តលាក់ខ្លួន នៅក្រោមស្លាបហេសបូឡា។ ភ្លើងនឹងផ្ទុះឡើង ហើយលេបត្របាក់ដើមតាដានៃប្រទេសលីបង់ទាំងអស់»។

សូមបញ្ជាក់ថា « ដើមតាដា (genus Cedrus) គឺជាដើមឈើដ៏អស្ចារ្យនៃប្រទេសលីបង់ វាមានក្លិនក្រអូប ជាប្រភេទឈើប្រើប្រាស់បានយូរ ធន់នឹងការរលួយ ប្រើក្នុងការសាងសង់ គ្រឿងសង្ហារឹម និងទូ ជាដើម»។

មិនតែប៉ុណ្ណោះ លោក Katz ចោទប្រកាន់ថា៖ « ប្រធានាធិបតីលីបង់ លោក ចូសេហ្វ អាអូន (Joseph Aoun) កំពុងលេងល្បែងជាមួយអនាគតនៃប្រទេសលីបង់។ អ៊ីស្រាអែលនឹងមិនទទួលយកស្ថានភាពដែលបទឈប់បាញ់នៅក្នុងប្រទេសលីបង់រួមផ្សំនឹងការវាយប្រហារជាបន្តបន្ទាប់លើកងកម្លាំងអ៊ីស្រាអែល និងភាគខាងជើងអ៊ីស្រាអែលនោះទេ»។

រដ្ឋមន្ត្រីក្រសួងការពារជាតិរូបនេះ និយាយថា៖ « យើង និង លោក ណេតាន់យ៉ាហ៊ូ បានណែនាំកងទ័ពអ៊ីស្រាអែលឆ្លើយតបដោយការបាញ់ប្រហារយ៉ាងខ្លាំងប្រឆាំងនឹងក្រុមហេសបូឡា ក្នុងករណីមានការខូចខាត គំរាមកំហែង ឬរំលោភលើអធិបតេយ្យភាពអ៊ីស្រាអែល»។

ការវាយប្រហាររបស់អ៊ីស្រាអែលនៅទូទាំងប្រទេសលីបង់ចាប់តាំងពីថ្ងៃទី០២ ខែមីនា មនុស្សជាង ២ ៥០០នាក់ ត្រូវបានសម្លាប់ ជាង ៧ ៧៥០នាក់ រងរបួស និងជាង ១.៦លាននាក់ បាត់បង់ទីលំនៅ។ នេះបើយោងតាមតួលេខផ្លូវការរបស់លីបង់។

យ៉ាងណា បទឈប់បាញ់រយៈពេល១០ថ្ងៃ ត្រូវបានប្រកាសរវាងប្រទេសលីបង់និងអ៊ីស្រាអែលនៅថ្ងៃទី១៧ ខែមេសា ហើយ ក្រោយមក ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសថា ភាគីលីបង់ និងអ៊ីស្រាអែលយល់ព្រមពង្រីកបទឈប់បាញ់៣សប្តាហ៍ទៀត។ ទោះបីជាបែបណា បទឈប់បាញ់ត្រូវរាយការណ៍បានរងការរំលោភម្តងហើយម្តងទៀតពីភាគីអ៊ីស្រាអែលនិងហេសបូឡា៕

ប្រែសម្រួល៖ ណឺ មិនា

Related Topics:ប្រទេសលីបង់ក្រុមហេសបូឡា អ៊ីស្រាអែល

ព័ត៌មានអន្ដរជាតិ២២ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា