អ៊ីរ៉ង់ គំរាមច្បាំងជាមួយ អាមេរិក សាជាថ្មី

ស្ថានការណ៍នៅមជ្ឈិមបូព៌ា កំពុងប្រែប្រួលខ្លាំងនិងតានតឹងជាងមុន បន្ទាប់ពីភាគីជម្លោះ គំរាមដាក់គ្នាមិនលស់ថ្ងៃ ហើយឥឡូវនេះ ប្រទេសអ៊ីរ៉ង់ ថែមទាំងព្រមានផ្ទុះសង្គ្រាម ដោយច្បាំងជាថ្មី ជាមួយសហរដ្ឋអាមេរិក ទៀតផង។

តាមការផ្សាយរបស់ AFP កាលពីថ្ងៃសៅរ៍ ទី២ ខែឧសភា ឆ្នាំ២០២៦, លោក Mohammad Jafar Asadi មេបញ្ជាការរងទីបញ្ជាការកណ្តាល Khatam al-Anbiya នៃកងឆ្មាំបដិវត្តន៍ (IRGC) និយាយថា៖ «ព័ស្តុតាងបង្ហាញថា អាមេរិកមិនគោរពសន្យា ឬប្រកាន់ខ្ជាប់កិច្ចព្រមព្រៀងណាមួយឡើយ។ សកម្មភាព និងសេចក្តីថ្លែងការណ៍របស់មន្ត្រីអាមេរិក ធ្វើឡើងដើម្បីតែផ្សព្វផ្សាយព័ត៌មានប៉ុណ្ណោះ ក្នុងគោលបំណងការពារការធ្លាក់ចុះនៃតម្លៃប្រេង និងដើម្បីចាកចេញពីស្ថានភាពដ៏លំបាកដែលពួកគេបង្កើតឡើងដោយខ្លួនឯង»។

ស្របពេលជាមួយគ្នានោះដែរ លោកព្រមានថា កងកម្លាំងប្រដាប់អាវុធអ៊ីរ៉ង់ នៅតែត្រៀមខ្លួនឈរជើងយ៉ាងពេញលេញ សម្រាប់ការឆ្លើយតបជាយថាហេតុណាមួយ។

ការគំរាមនេះ កើតឡើងបន្ទាប់ពី ប្រធានាធិបតីអាមេរិក ដូណាល់ ត្រាំ បង្ហាញជំហរដាច់អហង្ការ បដិសេធសំណើចុងក្រោយ របស់ប្រទេសអ៊ីរ៉ង់ ដែលមានបំណងបញ្ចប់សង្គ្រាម។

សំណើថ្មីនេះ ត្រូវបានភាគីអ៊ីរ៉ង់បញ្ជូន តាមរយៈអ្នកសម្របសម្រួល ក្នុងប្រទេសប៉ាគីស្ថាន កាលពីយប់ថ្ងៃព្រហស្បតិ៍ ប៉ុន្តែគ្រាន់តែមកដល់ដៃភ្លាម លោក ត្រាំ បានប្រកាសទាត់ចោល នៅចំពោះមុខអ្នកសារព័ត៌មានក្នុងសេតវិមាន ដោយអះអាងថា អ៊ីរ៉ង់បានទាមទារនូវលក្ខខណ្ឌមួយចំនួន ដែលលោកមិនអាចទទួលយកបានឡើយ។

ទោះបីជាបទឈប់បាញ់រយៈពេលបីសប្តាហ៍មកនេះ នៅតែបន្តមានប្រសិទ្ធភាព​មែន ប៉ុន្តែសន្តិភាព ហាក់ដូចជាផុយស្រួយបំផុត ដោយសារភាគីទាំងសងខាង តែងតែចោទប្រកាន់គ្នាទៅវិញទៅមក ថា រំលោភលើកិច្ចព្រមព្រៀង។

លោក ត្រាំ សម្តែងការខកចិត្តយ៉ាងខ្លាំង ចំពោះថ្នាក់ដឹកនាំរបស់អ៊ីរ៉ង់ ដោយលោកបានប្រើពាក្យធ្ងន់ៗថា ជាក្រុមដឹកនាំដែលបែកបាក់គ្នា និងរញ៉េរញ៉ៃបំផុត ទោះបីជាពួកគេម្នាក់ៗ សុទ្ធតែចង់បានកិច្ចព្រមព្រៀង បញ្ចប់សង្គ្រាមក៏ដោយ។

ការចរចាដែលធ្លាប់គ្រោងធ្វើដោយផ្ទាល់ ក៏ត្រូវបានលុបចោល ហើយប្តូរមកជាការពិភាក្សាតាមទូរស័ព្ទវិញ បន្ទាប់ពីលោក ត្រាំ ដកក្រុមបេសកជន ចេញពីប្រទេសប៉ាគីស្ថានកាលពីសប្តាហ៍មុន៕

អត្ថបទ៖ សុខ សុវណ្ណ