​យន្តហោះ​​អាមេរិក​ ដឹកមនុស្ស ២២១ នាក់ បុក​បង្គោល​ភ្លើង និងរថយន្ត ពេលចុះ​ចត​ ​នៅព្រលាន Newark

អាជ្ញាធរបានប្រាប់ភ្នាក់ងារសារព័ត៌មាន AFP ថា យន្តហោះរបស់ក្រុមហ៊ុនអាកាសចរណ៍អាមេរិក United Airlines ដែលផ្ទុកអ្នកដំណើរ ២២១ នាក់ និងសមាជិក​អាកាសយានិក​ ១០ នាក់ បានហោះ​បុកបង្គោលភ្លើង និងរថយន្តដឹកទំនិញ​មួយគ្រឿងនៅលើផ្លូវហាយវ៉េ ក្នុងរដ្ឋ New Jersey ខណៈពេលកំពុងចុះចតនៅព្រលានយន្តហោះអន្តរជាតិ Newark Liberty ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរដ្ឋបាលអាកាសចរណ៍សហព័ន្ធ (FAA) បានបញ្ជាក់ក្នុងសេចក្តីថ្លែងការណ៍មួយ​ឲ្យ​ដឹងថា «ខណៈពេលកំពុងហោះហើរឆ្ពោះទៅកាន់ទីចុះចតនៅព្រលានយន្តហោះអន្តរជាតិ Newark Liberty ជើងហោះហើរលេខ ១៦៩ របស់ក្រុមហ៊ុនអាកាសចរណ៍ United Airlines បានហោះទៅបុកបង្គោលភ្លើងមួយនៅលើផ្លូវ New Jersey នៅវេលាម៉ោងប្រហែលជា ២ រសៀល (ម៉ោងក្នុងស្រុក) កាលពីម្សិលមិញ ថ្ងៃទី៣ ខែឧសភា ដោយបន្ថែមថា យន្តហោះនោះបានរងការខូចខាតតិចតួចប៉ុណ្ណោះ»។

យ៉ាងណា អាជ្ញាធរកំពង់ផែ បានបញ្ជាក់ក្នុងសេចក្តីថ្លែងការណ៍មួយថា យន្តហោះនោះបានបង្កឲ្យមានការខូចខាតដល់បង្គោលភ្លើងមួយ និងរថយន្តសណ្ដោងរ៉ឺម៉កមួយគ្រឿង ដែលកំពុងធ្វើដំណើរឆ្ពោះទៅទិសខាងត្បូង នៅលើផ្លូវ New Jersey ។

យោងតាមសម្តីលោក Chuck Paterakis អនុប្រធានជាន់ខ្ពស់របស់ក្រុមហ៊ុន (H&S Bakery) បានឲ្យដឹងថា រថយន្តដឹកទំនិញរបស់ក្រុមហ៊ុនលោក មិនបានរងការខូចខាតធ្ងន់ធ្ងរនោះទេ ប៉ុន្តែ កង់របស់យន្តហោះពាណិជ្ជកម្មនោះ បានហោះមកបុកទម្លុះកញ្ចក់ទ្វារខាងអ្នកបើកបរ។ ជាក់ស្ដែង អ្នកបើកបររថយន្តគ្រាន់តែរងរបួសមុតតិចតួចប៉ុណ្ណោះពីហេតុការណ៍នេះ»។

ដោយឡែក ក្រុមហ៊ុនអាកាសចរណ៍ United Airlines បានបញ្ជាក់ក្នុងសេចក្តីថ្លែងការណ៍មួយថា ខ្លួនមានគម្រោងនឹងធ្វើការស៊ើបអង្កេតយ៉ាងហ្មត់ចត់អំពីសុវត្ថិភាពហោះហើរចំពោះហេតុការណ៍នេះ ហើយក្រុមអាកាសយានិកត្រូវបានផ្អាកពីការងារជាបណ្ដោះអាសន្ន ដែលវាគឺជាផ្នែកមួយនៃដំណើរការស៊ើបអង្កេតនេះ»៕

អត្ថបទ៖ សាង ស្រីល័ក្ខ