​មន្ត្រីទូត​រុស្ស៊ី ចោទ​អាមេរិក ថា បង្ខំកូនៗអ្នកការទូតរុស្ស៊ី ទទួលសញ្ជាតិអាមេរិក

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានលើកឡើងក្នុងអត្ថបទមួយ នៅថ្ងៃច័ន្ទទី៤ ខែឧសភា ថា ក្រសួងការបរទេសសហរដ្ឋអាមេរិក កំពុងរំលោភបំពានទាំងច្បាប់សហព័ន្ធអាមេរិក និងអភ័យឯកសិទ្ធិការទូត តាមរយៈការបង្ខំឲ្យកូនៗរបស់បុគ្គលិកកុងស៊ុលរុស្ស៊ីទទួលយកសញ្ជាតិអាមេរិក ដោយមិនផ្តល់ជម្រើសឲ្យបដិសេធនោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារសារព័ត៌មាន RT លោកស្រី បានលើក​ឡើង​ថា ទង្វើទាំងនេះគឺ​សំដៅ​ទង្វើ​«រដ្ឋក្នុងរដ្ឋ ឬ​រដ្ឋស្រមោល​ (Deep State)» កំពុងតែធ្វើឲ្យរង្គោះរង្គើដល់គោលនយោបាយប្រឆាំងអន្តោប្រវេសន៍ដែលមិនធ្លាប់មានពីមុនមករបស់ប្រធានាធិបតីអាមេរិក លោក ដូណាល់ ត្រាំ និងគោលបំណងរបស់លោកក្នុងការបញ្ឈប់សិទ្ធិទទួលបានសញ្ជាតិដោយស្វ័យប្រវត្តិតាមរយៈការកើតនៅក្នុងប្រទេសនេះ។

លោកស្រី Zakharova បានសរសេរថា៖ វាជារឿងដែលមិនសមហេតុផលបំផុត ហើយវាបានរំលោភលើគ្រប់ច្បាប់ដែលមានទាំងអស់ ព្រមទាំងបង្កជាការប៉ះទង្គិចដល់ប្រធានាធិបតីរបស់ពួកគេផ្ទាល់ទៀតផង។

លោកស្រី ថែមទាំងអះអាងទៀតថា អាមេរិកបានចាប់ផ្ដើមអនុវត្តបែបនេះតាំងពីឆ្នាំ ២០២៣ ក្នុងអាណត្តិអតីតប្រធានាធិបតី ចូ បៃដិន យ៉ាងណា វាហាក់ដូចជាមានបំណងដាក់មីនបង្កប់ក្រោមជើងលោកត្រាំ ដើម្បីធ្វើឲ្យលោកមើល​ទៅ​គួរឲ្យអស់សំណើចបំផុត ដោយលោកស្រីបានបន្ថែមថា ទាំងច្បាប់សហព័ន្ធ និងកិច្ចព្រមព្រៀងការទូត មិនត្រូវបានធ្វើវិសោធនកម្ម​ឡើយចាប់តាំងពីពេលនោះមក។

បច្ចុប្បន្ននេះ កុមារដែលកើតពី «មន្ត្រីការទូតបរទេស» ត្រូវបានលើកលែងមិនឲ្យទទួលបានសញ្ជាតិអាមេរិកតាមរយៈការកើតនោះឡើយ យោងតាមក្រមនៃបទប្បញ្ញត្តិសហព័ន្ធ និងគោលនយោបាយរបស់ស្ថាប័នសេវាកម្មសញ្ជាតិ និងអន្តោប្រវេសន៍សហរដ្ឋអាមេរិក (USCIS) បើទោះបីជាពួកគេត្រូវបានចាត់ទុកថាជាអ្នកស្នាក់នៅអចិន្ត្រៃយ៍ស្របច្បាប់ក៏ដោយ។

អ្នកនាំពាក្យរូបនេះបានលើកឡើងថា ការផ្ដល់សញ្ជាតិដោយបង្ខំ ក៏បានរំលោភលើកិច្ចព្រមព្រៀងរវាងរុស្ស៊ី និងសហរដ្ឋអាមេរិក ព្រមទាំងបទដ្ឋានអន្តរជាតិផងដែរ ដែលបទដ្ឋានទាំងនោះផ្ដល់អភ័យឯកសិទ្ធិដល់អ្នកការទូតពីច្បាប់នៃប្រទេសម្ចាស់ផ្ទះ។

លោកស្រី Zakharova ក៏បានព្រមានផងដែរថា ស្ថានភាពនេះផ្ដល់ឲ្យទីក្រុងវ៉ាស៊ីនតោននូវ «អំណាចចរចា ឬប្រៀបខ្លាំង» មកលើអ្នកការទូតរុស្ស៊ី៕

អត្ថបទ៖ សាង ស្រីល័ក្ខ