មុនទៅចិន លោក ត្រាំ រំលឹកថា អាមេរិកនៅតែជា «បងធំ» ផ្នែកបច្ចេកវិទ្យា AI

នៅក្នុងកម្មវិធីជួបជុំសហគ្រិនខ្នាតតូចមួយ ដែលរៀបចំឡើងនៅសេតវិមាន កាលពីថ្ងៃចន្ទ ទី​៤ ខែ​ឧសភា ឆ្នាំ​២០២៦ លោកប្រធានាធិបតី ដូណាល់ ត្រាំ បានបង្ហើបឲ្យ​ដឹងពីគម្រោងធ្វើដំណើរដ៏សំខាន់មួយ ដើម្បីទៅជួបពិភាក្សាជាមួយប្រធានាធិបតីចិន លោក ស៊ី ជិនពីង នៅរយៈពេល ២សប្តាហ៍ខាងមុខ។

តាម​ការ​ផ្សាយ​របស់​រ៉យទ័រ លោក ត្រាំ បាន​ចាត់ទុកថា ជំនួប​នេះ គឺជាដំណើរទស្សនកិច្ច ដែលមានសារៈសំខាន់បំផុត ក្នុងកំឡុងពេលដែលប្រទេសយក្សទាំងពីរ កំពុងមានភាពតានតឹងនឹងគ្នា លើបញ្ហាពាណិជ្ជកម្ម និងបច្ចេកវិទ្យា។

អ្វីដែលគួរឲ្យ​ចាប់អារម្មណ៍នោះគឺ លោក ត្រាំ បានលើកឡើងយ៉ាងច្បាស់ៗពីចេតនារបស់លោក ក្នុងការរំលឹកទៅកាន់សមភាគីចិនថា បច្ចុប្បន្ននេះ សហរដ្ឋអាមេរិកកំពុងតែបោះជំហាននាំមុខគេបង្អស់ លើផ្នែកបញ្ញាសិប្បនិម្មិត AI។ បើទោះបីជាប្រទេសទាំងពីរហាក់ដូចជា កំពុងប្រជែងគ្នាយ៉ាងស្វិតស្វាញ លើវិស័យបច្ចេកវិទ្យាក៏ដោយ ក៏លោក ត្រាំ បានហៅការប្រកួតប្រជែងនេះថា ជាការប្រកួតប្រជែងបែបមិត្តភាព និងមានភាពថ្លៃថ្នូរ។

លោកប្រធានាធិបតី បានសង្កត់ធ្ងន់ថា ដ្បិត​មានភាពរកាំរកូសខ្លះៗលើរឿងជំនួញក៏ពិតមែន ប៉ុន្តែលោកនៅតែចាត់ទុកលោក ស៊ី ជិនពីង ជាគូប្រជែងដ៏សំខាន់ម្នាក់ ដែលលោកត្រូវតែជួបដើម្បីជជែកគ្នាឲ្យដាច់ស្រឡះ។ ជំនួបនាពេលដ៏ខ្លីខាងមុខនេះ ត្រូវបានគេរំពឹងថានឹងក្លាយជាវេទិកាមួយ ដែលមេដឹកនាំពិភពលោកទាំងពីរ នឹងត្រូវចរចាគ្នាពីតុល្យភាពអំណាចបច្ចេកវិទ្យា ដែលកំពុងមានឥទ្ធិពលយ៉ាងខ្លាំងដល់សេដ្ឋកិច្ចសកលលោក៕

ប្រែសម្រួល៖ ឈាង