ទីបំផុត​ក្រុម​ប្រឆាំង​អ៉ីស្រាអែល​យល់​ព្រម​បង្កើត​រដ្ឋាភិបាល​ឯកភាព​ថ្មី​ហើយ

មេដឹកនាំគណបក្សប្រឆាំងនានានៅប្រទេសអ៉ីស្រាអែលបានឈានដល់កិច្ចព្រមព្រៀងគ្នាដើម្បីបង្កើតរដ្ឋាភិបាលឯកភាពថ្មីមួយដែលអាចនឹងបញ្ចប់អំណាចរយៈពេល១២ឆ្នាំរបស់លោកនាយករដ្ឋមន្ត្រី Benjamin Netanyahu។

លោក Yair Lapid មេដឹកនាំគណបក្សកណ្តាលនិយម Yesh Atid បានប្រកាសពីសម្ព័ន្ធភាពចម្រុះដែល៨គណបក្សចូលរួមត្រូវបានបង្កើតឡើង។

ស្ថិតក្រោមការរៀបចំប្តូរវេនគ្នាដឹកនាំ មេគណបក្សស្តាំនិយម Yamina លោក Naftali Bennett នឹងទទួលតំណែងនាយករដ្ឋមន្ត្រីដំបូងគេមុនពេលប្តូរវេនទៅលោក Lapid បន្ទាប់។

យ៉ាងណា វាត្រូវការបោះឆ្នោតសម្រេចពីសភាជាមុនសិនមុនពេលរដ្ឋាភិបាលត្រូវបានស្បថចូលកាន់តំណែង។

នៅក្នុងសេចក្តីថ្លែងការណ៍មួយ លោក Lapid បាននិយាយថា លោកបានជម្រាបទៅលោកប្រធានាធិបតី Reuven Rivlin រួចរាល់ហើយពីកិច្ចព្រមព្រៀងចម្រុះនេះ និងបន្ថែមថា ៖«ខ្ញុំសូមសន្យាថា រដ្ឋាភិបាលនេះនឹងធ្វើការដើម្បីបម្រើប្រជាជនអ៉ីស្រាអែលទាំងអស់ រាប់ទាំងអ្នកដែលបានបោះឆ្នោត និងអ្នកដែលមិនបានបោះឆ្នោតក៏ដោយ»។

លោកថា ៖«វានឹងគោរពគូប្រជែងរបស់ខ្លួន ហើយធ្វើអ្វីៗគ្រប់យ៉ាងនៅក្នុងក្របខណ្ឌអំណាចរបស់ខ្លួនដើម្បីរួបរួម និងភ្ជាប់ទំនាក់ទំនងជាមួយគ្រប់ភាគីទាំងអស់នៃសង្គមអ៉ីស្រាអែល»។

រូបភាពដែលបង្ហោះតាមបណ្តាញទំនាក់ទំនងសង្គមអ៉ីស្រាអែលបានបង្ហាញថា លោក Bennett និងមេដឹកនាំគណបក្ស Arab Islamist Raam លោក Mansour Abbas បានកំពុងចុះហត្ថលេខាលើកិច្ចព្រមព្រៀងដែលកិច្ចព្រមព្រៀងនេះមានមនុស្សច្រើនណាស់គិតថាអាចទៅរួច។

លោក Abbas បានប្រាប់អ្នកសារព័ត៌មានថា ៖«ការសម្រេចចិត្តនេះគឺពិបាក និងមានជម្លោះជាច្រើន ប៉ុន្តែវាពិតជាសំខាន់ដើម្បីឈានដល់កិច្ចព្រមព្រៀង»។ លោកថា មានរឿងរ៉ាវជាច្រើននៅក្នុងកិច្ចព្រមព្រៀងនេះដែលមានផលប្រយោជន៍ដល់សង្គមអារ៉ាប់។

នៅក្នុងកំណត់ហេតុជម្រាបទៅលោកប្រធានាធិបតី លោក Lapid បាននិយាយថា លោកនឹងដឹកនាំរដ្ឋាភិបាលរួមជាមួយនឹងលោក Bennett ដែលនឹងបន្តកាន់តំណែងនាយករដ្ឋមន្ត្រីបន្ទាប់នៅថ្ងៃទី២៧ ខែសីហា ឆ្នាំ២០២៣។

លោកប្រធានាធិបតី Rivlin បានអំពាវនាវឲ្យរដ្ឋសភាកោះប្រជុំឲ្យបានឆាប់ដើម្បីរៀបចំការបោះឆ្នោតទុកចិត្តមួយ។ ប្រសិនបើក្រុមសម្ព័ន្ធភាពចម្រុះមិនទទួលបានសំឡេងបោះឆ្នោតសភាភាគច្រើនដែលមាន១២០អាសនៈទេនោះ នឹងមានហានិភ័យដែលប្រទេសត្រូវបោះឆ្នោតលើកទី៥ក្នុងរយៈពេល២ឆ្នាំ។

សមាជិកក្រុមសម្ព័ន្ធភាពចម្រុះមានវិសាលភាពពេញលេញនៃនយោបាយអ៉ីស្រាអែល។ គណបក្សនានាមានផ្នែកដូចគ្នាតិចតួចពីផែនការរបស់ពួកគេដើម្បីជំនួយលោកនាយករដ្ឋមន្ត្រី Netanyahu៕

គណបក្ស​ទាំង​៨​ដែល​ចងសម័្ពន្ធ​ភាព​គ្នា​មាន៖

• បក្ស Yesh Atid (កណ្តាល​និយម) – ដឹក​នាំ​ដោយ​លោក Yair Lapid (មាន​១៧​អាសនៈ)
• បក្ស Kahol Lavan (ខៀវ និងស កណ្តាល​និយម)​ – ដឹក​នាំ​ដោយ​លោក Benny Gantz (មាន​៨​អាសនៈ)
• បក្ស Israel Beiteinu (ជាតិ​និយម​បែប​ខាង​ស្តាំ) – ដឹក​នាំ​ដោយ​លោក Avigdor Lieberman (មាន​៧​អាសនៈ)
• បក្ស Labor (សង្គម​ប្រជា​ធិបតេយ្យ​) – ដឹក​នាំ​ដោយ​លោក Merav Michaeli (មាន​៧​អាសនៈ)
• បក្ស Yamina (ស្តាំ​និយម) – ដឹក​នាំ​ដោយ​លោក Naftali Bennett (មាន​៧​អាសនៈ)
• បក្ស New Hope (កណ្តាល​និយម​​បែប​​ខាងស្តាំ​​) – ដឹក​នាំ​ដោយ​លោក Gideon Sa’ar (មាន​៦​អាសនៈ)
• បក្ស Meretz (ឆ្វេង​និយម​បែប​សង្គម​ប្រជា​ធិបតេយ្យ​) – ដឹក​នាំ​ដោយ​លោក Nitzan Horowitz (​មាន​៦​អាសនៈ)
• បក្ស Raam (អារ៉ាប់ឥស្លាម) – ដឹក​នាំ​ដោយ​លោក Mansour Abbas (មាន​៤​អាសនៈ)

គណបក្ស​សម្ព័ន្ធភាព​ចម្រុះ​ទាំង​៨​​ដើម្បី​ឈាន​ដល់​បង្កើត​រដ្ឋាភិបាល​បាន ត្រូវ​ការ​សំឡេង​គាំទ្រ​ពីសភា​ឲ្យ​បាន​លើស​ពី​៦១៕

ប្រែសម្រួល៖ វីរបុត្រ
ប្រភព៖ BBC