តាលីបង់ រត់ពន្ធគ្រឿងសព្វាវុធនិងរថពាសដែកអាមេរិក ចូលទៅ ប៉ាគីស្ថាន ដើម្បីលក់ឲ្យភេរវករ យកលុយធ្វើសង្គ្រាម

គ្រឿងសព្វាវុធរបស់យោធាអាមេរិក ដែលមានតម្លៃរាប់លានដុល្លារ កំពុងត្រូវបាននាំចេញពីប្រទេសអាហ្វហ្គានីស្ថាន ដោយបណ្តាញតាលីបង់។

រថយន្ត Humvee និងរថពាសដែករបស់កងទ័ពអាមេរិកផ្សេងទៀតទាំងជួរៗ ត្រូវបានគេមើលឃើញ កំពុងដឹកចូលទៅក្នុងប្រទេសប៉ាគីស្ថាន។

រថយន្តជាច្រើន​ នឹងត្រូវលក់ទៅឲ្យបណ្តាញភេរវកម្ម ដើម្បីយកប្រាក់មកពង្រឹង សមត្ថភាពធ្វើសង្គ្រាមរបស់ក្រុមតាលីបង់ ដែលនឹងត្រូវចំណាយអស់ទឹកប្រាក់រាប់ពាន់លានដុល្លារ។

រូបភាពនៃក្បួនរថយន្តមួយបានបង្ហាញពី រថយន្តយោធាកំពុងត្រូវបានគេបញ្ជូនទៅកាន់ទីក្រុង Quetta ក្នុងប្រទេសប៉ាគីស្ថាន ដែលទីនោះត្រូវបានគេជឿជាយូរមកហើយថា ជាទីបញ្ជាការរបស់ក្រុមតាលីបង់អាហ្វហ្គានីស្ថាន។

មានការសង្ស័យថា ទីភ្នាក់ងារស៊ើបការណ៍សម្ងាត់អន្តរសេវាកម្ម របស់ប៉ាគីស្ថាន បានជួយសម្រួលដោយសម្ងាត់​ ចំពោះការនាំចេញរថយន្តយោធាអាមេរិក។

ប្រភពមួយនិយាយថា “ឥឡូវនេះ តាលីបង់ហាក់ដូចជាមានសម្ភារច្រើនណាស់ ដែលបន្សល់ទុកដោយកងទ័ពអាហ្វហ្គានីស្ថាន ហើយទាំងនោះគឺជាសម្ភារដែលអាមេរិកផ្តល់ឲ្យ”។

ទីក្រុងសមរភូមិជួរមុខ Quetta របស់ប្រទេសប៉ាគីស្ថាន ត្រូវចំណាយពេលបើកបរ ៣ ម៉ោងពីទីក្រុង Kandahar ហើយជាកន្លែងលាក់ខ្លួនរបស់ក្រុមភេរវករ និងការជួញដូរគ្រឿងញៀនជាពិសេសហេរ៉ូអ៊ីន។

ភាគច្រើននៃប្រជាជនរបស់ខ្លួនគឺជាជនជាតិ Pashtoun ដែលជាកុលសម្ព័ន្ធដូចតាលីបង់ដែរ ហើយគេជឿថា ក្រុមប្រឹក្សាដឹកនាំរបស់តាលីបង់ឈ្មោះ Quetta Shura គឺមានមូលដ្ឋាននៅទីនោះ។

ឥស្សរជនតាលីបង់បានរត់គេចខ្លួនទៅ Quetta នៅពេលដែលពួកគេត្រូវនិរទេសក្នុងការវាយលុកដោយសហរដ្ឋអាមេរិកបន្ទាប់ពីថ្ងៃទី១១ខែកញ្ញា ហើយប្រាក់ជាច្រើនពីម្ចាស់ជំនួយឈូងសមុទ្រពែក្ស ទៅឲ្យតាលីបង់ គឺត្រូវបានផ្តល់ឲ្យតាមរយៈទីក្រុង Quetta នេះ៕

ប្រែសម្រួល៖ Vann Vann

ប្រភព៖ Mirror

ចុចអាន៖ តាលីបង់ព្រមានហើយ បើអាមេរិក មិនចេញឲ្យអស់ពី អាហ្វហ្គានីស្ថាននៅសប្តាហ៍ក្រោយ