វៀតណាម លេងធម៌ក្ដៅ ដាក់ទណ្ឌកម្មអ្នកមិនចាក់វ៉ាក់សាំងកូវីដ

នាយករដ្ឋមន្ត្រីវៀតណាមលោក Pham Minh Chinh បានអំពាវនាវឲ្យដាក់ទណ្ឌកម្មលើជនណាដែលបដិសេធមិនចាក់វ៉ាក់សាំងការពារកូវីដដោយគ្មានហេតុផលត្រឹមត្រូវ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំជាមួយគណៈកម្មាធិការជាតិដឹកនាំការបង្ការ និងទប់ស្កាត់ជំងឺកូវីដ ១៩ លោកនាយករដ្ឋមន្ត្រីបាននិយាយថា អាជ្ញាធរគួរតែបញ្ចុះបញ្ចូលប្រជាពលរដ្ឋឲ្យចាក់វ៉ាក់សាំង និងពិចារណាហាមប្រជាពលរដ្ឋមិនឲ្យចាកចេញពីផ្ទះ ឬយកថ្លៃសេវាព្យាបាល ប្រសិនបើពួកគេឆ្លងជំងឺកូវីដ ក្រោយបដិសេធមិនចាក់វ៉ាក់សាំង ។

លោកបាននិយាយថា គោលដៅ នេះគឺដើម្បីសុវត្ថិភាពអំឡុងជំងឺរាតត្បាត ដោយផ្តោតលើការកាត់បន្ថយការឆ្លងក្នុងសហគមន៍ ជំងឺធ្ងន់ធ្ងរ និងការស្លាប់ជាដើម ។ លោក​បាន​ព្រមាន​ថា តំបន់​ដែល​មិន​អាច​ឈាន​ដល់​គោលដៅ ​ចាក់​វ៉ាក់សាំង​ក៏​នឹង​ទទួល​ខុស​ត្រូវ​ចំពោះបញ្ហានេះផងដែរ ។

លោកបាននិយាយថា មនុស្សពេញវ័យទាំងអស់ត្រូវតែចាក់វ៉ាក់សាំងលើកដូសទី ២ របស់ពួកគេក្នុងខែនេះ ហើយកុមារដែលមានអាយុពី ១២ ទៅ ១៧ ឆ្នាំត្រូវតែចាក់វ៉ាក់សាំងក្នុងខែមករាឆ្នាំក្រោយ ហើយមនុស្សពេញវ័យទាំងអស់គួរតែចាក់ដូសជំរុញនៅ ក្នុងខែមករាដូចគ្នា ខណៈការចាក់វ៉ាក់សាំងសម្រាប់កុមារដែលមានអាយុចាប់ពី ៥ ឆ្នាំឡើងទៅ នឹងត្រូវធ្វើឡើងក្នុងពេលកំណត់ជាក់លាក់ណាមួយ ។

រហូតមកដល់ពេលនេះ ប្រទេសវៀតណាមបានទទួលវ៉ាក់សាំងប្រហែល ១៦៩ លានដូសពីប្រភពផ្សេងៗគ្នា ហើយបានចាក់ដល់ប្រជាជនប្រហែល ១៣៥ លាននាក់ហើយ ខណៈប្រហែល ៩៧ ភាគរយនៃចំនួនប្រជាជនពេញវ័យបានទទួលការចាក់វ៉ាក់សាំងយ៉ាងហោចណាស់ ១ ដូស ហើយ ៨០ ភាគរយបានចាក់ពេញ ២ ដូស ៕

ប្រែសម្រួលដោយ ៖ ជីវ័ន្ត

ប្រភព ៖ VNExpress

ចុចអាន ៖ វៀតណាម ដឹកពលរដ្ឋខ្លួនទៅ ប្រទេសវិញជាង ២០ ម៉ឺននាក់