ភរិយាលោក គីម ជុងអ៊ុន បង្ហាញខ្លួនជាសាធារណៈលើកដំបូង ក្រោយបាត់មុខ៥ខែ

នៅថ្ងៃពុធទី២ខែកុម្ភៈនេះ ភរិយារបស់មេដឹកនាំកូរ៉េខាងជើងលោក គីម ជុងអ៊ុន គឺលោកស្រី រី សុលជូ បានបង្ហាញខ្លួននៅក្នុងប្រព័ន្ធផ្សព្វផ្សាយរដ្ឋជាលើកដំបូង ក្នុងរយៈពេលជិតប្រាំខែ ខណៈគ្រួសារដែលកំពុងកាន់អំណាច ព្យាយាមលាក់ខ្លួនអំឡុងវិបត្តិជំងឺរាតត្បាត កូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានផ្លូវការ KCNA បានរាយការណ៍ថា លោក គីម និងលោកស្រី រី បានចូលរួមការសម្តែងសិល្បៈមួយនៅឯរោងមហោស្រព Mansudae ក្នុងរដ្ឋធានីព្យុងយ៉ាង ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ។

លោកស្រីត្រូវបានគេឃើញជាសាធារណៈលើកចុងក្រោយនៅថ្ងៃទី៩ខែកញ្ញាឆ្នាំ២០២១ ក្នុងពេលដែលលោកស្រីចូលរួមជាមួយស្វាមី ទៅមើលចេតិយ Kumsusan Palace of the Sun ដែលជាកន្លែងដាក់សពជីតា និងឪពុករបស់លោក គីម ក្នុងខួបនៃការបង្កើតប្រទេស។

លោកស្រី រី ធ្លាប់ទទួលបានការចាប់អារម្មណ៍ពីអន្តរជាតិ ដោយសារលោកស្រីតែងតែអមដំណើរលោក គីម ក្នុងកម្មវិធីសង្គម អាជីវកម្ម និងសូម្បីតែព្រឹត្តិការណ៍យោធា ផ្ទុយស្រឡះពីឪពុករបស់គាត់ គឺលោក គីម ជុងអ៊ីល ដែលកម្រចេញមុខជាសាធារណៈជាមួយភរិយាណាស់។

ភ្នាក់ងារចារកម្មកូរ៉េខាងត្បូងជឿថា លោក គីម និងលោកស្រី រី មានកូនបីនាក់ ប៉ុន្តែរឿងរបស់ពួកគេមិនសូវត្រូវបានគេដឹងជាសាធារណៈឡើយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ដឹងមូលហេតុពីក្រោយការស្រកទម្ងន់មិនធ្លាប់មានរបស់ គីម ជុងអ៊ុន