លោក Zelensky ថា អ៊ុយក្រែន ត្រៀមខ្លួនជាស្រេចប្រយុទ្ធជាមួយ រុស្ស៊ី ១០ ឆ្នាំទៅមុខទៀត (មានវីដេអូ)

ប្រធានាធិបតីអ៊ុយក្រែនលោក Volodymyr Zelensky បាននិយាយនៅក្នុងបទសម្ភាសន៍មួយជាមួយទូរទស្សន៍ CNN ថា អ៊ុយក្រែនត្រៀមខ្លួនជាស្រេចក្នុងការប្រយុទ្ធជាមួយរុស្ស៊ីដើម្បីទឹកដីរបស់ខ្លួនរយៈពេល ១០ ឆ្នាំទៅមុខទៀត ។

លោក Zelensky បាននិយាយថា “យើងចង់រំដោះប្រទេសរបស់យើងដើម្បីយកមកវិញនូវអ្វីដែលជាកម្មសិទ្ធិរបស់យើង ។ យើងប្រហែលជាកំពុងប្រយុទ្ធជាមួយសហព័ន្ធរុស្ស៊ីរយៈពេល ១០ ឆ្នាំដើម្បីយកមកវិញនូវអ្វីដែលជារបស់យើង ។ យើងអាចជ្រើសរើសផ្លូវនេះ” ។

លោក Zelensky បានពន្យល់ថា “លោក​បាន​ជំរុញ​ឲ្យ​លោកខាងលិច​ពន្លឿន​ការ​ផ្តល់​អាវុធ​ដល់​អ៊ុយក្រែន ហើយយើងត្រូវការឧបករណ៍នៅថ្ងៃនេះ ឬថ្ងៃស្អែកមិនមែនក្នុងរយៈពេលពីរ ឬបីខែខាងមុខទេ” ។

ដូចគ្នានេះផងដែរ ទីប្រឹក្សាសេដ្ឋកិច្ចរបស់លោក Zelensky លោក Oleg Ustenko បាននិយាយនៅក្នុងការអត្ថាធិប្បាយតាមទូរទស្សន៍កាលពីថ្ងៃអាទិត្យថា ក្រុងកៀវបានស្នើសុំក្រុមប្រទេស G7 និងមូលនិធិរូបិយវត្ថុអន្តរជាតិ (IMF) សម្រាប់ជំនួយហិរញ្ញវត្ថុចំនួន ៥០ ពាន់លានដុល្លារ ។

លោក​បាន​បន្ថែម​ថា ប្រទេស​អ៊ុយក្រែន​ក៏​បាន​នឹង​កំពុង​ពិចារណា​ផង​ដែរ​ក្នុង​ការ​ស្នើ​សុំ​កម្ចី​សិទ្ធិ​ទាញ​យក​ពិសេស​ពី IMF ។ យោងតាមលោក Ustenko បានឲ្យដឹងថា បច្ចុប្បន្នអ៊ុយក្រែនកំពុងខាតបង់ប្រាក់ប្រហែល ៧ ពាន់លានដុល្លារក្នុងមួយខែ ហើយនឹងន្ថែមប្រហែល ៥០ ពាន់លានដុល្លារទៀតក្នុងរយៈពេល ៦ ខែខាងមុខ ។

គួរបញ្ជាក់ថា ការលើកឡើងរបស់លោក Zelensky ​កើត​ឡើង ​ខណៈ​ដែល​ប្រតិបត្តិការ​យោធា​ពិសេស​របស់​រុស្ស៊ី​នៅ​អ៊ុយក្រែន​បាន​ឈាន​ចូល​ដល់​ថ្ងៃ​ទី ៥៣ ហើយ ។ កាលពីថ្ងៃទី២៤ ខែកុម្ភៈ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសពីការចាប់ផ្តើមប្រតិបត្តិការសំដៅការពារប្រជាជនដែលទទួលរងការរំលោភបំពាន និងការប្រល័យពូជសាសន៍ដោយទីក្រុងកៀវ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Zelensky ឲ្យពិភពលោកកុំរង់ចាំរហូតដល់ រុស្ស៊ី ប្រើអាវុធនុយក្លេអ៊ែរ