ប្រមុខ MI5 និង FBI ចេញមុខព្រមានរួមគ្នា អំពី ការគំរាមកំហែងដ៏ធំសម្បើម របស់ ចិន

កាលពីថ្ងៃពុធទី០៦ខែកក្កដា ប្រមុខទីភ្នាក់ងារចារកម្មអង់គ្លេស MI5 និងប្រមុខ FBI របស់អាមេរិក បានព្រមានរួមគ្នា អំពីការគំរាមកំហែងរយៈពេលវែងដែលកំពុងបង្កកាន់តែខ្លាំងឡើងដោយប្រទេសចិន ចំពោះផលប្រយោជន៍របស់ចក្រភពអង់គ្លេស និងសហរដ្ឋអាមេរិក។

អគ្គនាយក MI5 លោក Ken McCallum បាននិយាយថា សេវាកម្មនេះបានបង្កើនកិច្ចខិតខំប្រឹងប្រែងទ្វេដង ប្រឆាំងនឹងសកម្មភាពគួរឲ្យព្រួយបារម្ភរបស់ចិន។ លោកបន្ថែមថា សេវាកម្មបានដំណើរការ ការស៊ើបអង្កេតច្រើនជាងក្នុងឆ្នាំ ២០១៨ រហូតដល់ទៅ៧ដង ឯណោះ។

ស្របពេលជាមួយគ្នានោះ នាយក FBI លោក Christopher Wray និយាយថា រដ្ឋាភិបាលចិន បានបង្កការគំរាមកំហែងរយៈពេលវែងបំផុតចំពោះសេដ្ឋកិច្ច និងសន្តិសុខជាតិ របស់ចក្រភពអង់គ្លេស សហរដ្ឋអាមេរិក និងសម្ព័ន្ធមិត្តនៅអឺរ៉ុប ព្រមទាំងនៅកន្លែងផ្សេងទៀត។

យោងតាមលោក Wray, “រដ្ឋាភិបាលចិន កំពុងព្យាយាមរៀបចំពិភពលោក ដោយការជ្រៀតជ្រែកក្នុងនយោបាយរបស់យើង និងសម្ព័ន្ធមិត្តរបស់យើង។ ទីក្រុងប៉េកាំង បានជ្រៀតជ្រែកដោយផ្ទាល់ក្នុងការបោះឆ្នោតសភានៅទីក្រុងញូវយ៉ក ក្នុងឆ្នាំនេះ ព្រោះពួកគេមិន ចង់​ឲ្យ​បេក្ខជន​ម្នាក់​ដែល​ធ្លាប់​ជា​អ្នក​រិះគន់ និង​ជា​អតីត​បាតុករ​នៅ​ទីលាន Tiananmen ជាប់​ឆ្នោត”។

ទន្ទឹមនោះ លោក Wray បានព្រមានថា រដ្ឋាភិបាលចិន បានបង្កការគំរាមកំហែងកាន់តែធ្ងន់ធ្ងរ ដល់អាជីវកម្មលោកខាងលិច ហើយបានកំណត់លើការលួចបច្ចេកវិទ្យា។ កម្មវិធី Hack របស់រដ្ឋាភិបាលចិនគឺ ធំជាងគ្រប់ប្រទេសធំៗផ្សេងទៀតរួមបញ្ចូលគ្នា។

ដោយឡែក លោក McCallum និយាយថា ក្នុងរយៈពេលមួយឆ្នាំកន្លងមកនេះ ចក្រភពអង់គ្លេស បានចែករំលែកព័ត៌មានសម្ងាត់ជាមួយប្រទេសចំនួន ៣៧ ដើម្បីជួយពួកគេការពារប្រឆាំងនឹងចារកម្មតាមអ៊ីនធឺណិត។ កាលពីខែឧសភា ពួកគេបានរំខានដល់ការគំរាមកំហែងដ៏ស្មុគ្រស្មាញ ដែលផ្តោតលើក្រុមហ៊ុនអវកាសសំខាន់ៗ។

និយាយអំពីកោះតៃវ៉ាន់ ដែលចិនចាត់ទុកជាខេត្តមួយវិញ លោក Wray លើកឡើងថា ចិនអាចនឹងព្យាយាមដណ្តើមយកវាដោយកម្លាំង ហើយប្រសិនបើរឿងនោះកើតឡើងមែននោះ វានឹងតំណាងឲ្យការរំខានអាជីវកម្មដ៏គួរឲ្យរន្ធត់បំផុតមួយ ដែលពិភពលោកមិនធ្លាប់បានឃើញសោះ។

ឆ្លើយតបទៅនឹងសំណួរអំពីការអត្ថាធិប្បាយរបស់លោក McCallum និងលោក Wray, អ្នកនាំពាក្យស្ថានទូតចិនប្រចាំនៅចក្រភពអង់គ្លេស បាននិយាយថា “ការចោទប្រកាន់ប្រឆាំងនឹងប្រទេសចិនដោយមន្ត្រីចារកម្មរបស់សហរដ្ឋអាមេរិក និងចក្រភពអង់គ្លេស គឺគ្មានមូលដ្ឋានទាល់តែសោះ ហើយករណីដែលលើកឡើងទាំងអស់សុទ្ធតែមិនច្បាស់”។

អ្នកនាំពាក្យដដែលបន្តថា ចិនសូមជំរុញប្រទេសទាំងពីរ យល់ឲ្យច្បាស់អំពីនិន្នាការនៃពេលវេលា បោះបង់ចោលចិត្តគំនិតសង្រ្គាមត្រជាក់ដែលហួសសម័យយូរមកហើយ បញ្ឈប់ការឃោសនាអំពីការគំរាមកំហែងរបស់ចិន និងបញ្ឈប់បង្កើតការប្រឈមមុខដាក់គ្នា និងជម្លោះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ គិតត្រឹមពេលនេះ មាន សមាជិករដ្ឋាភិបាលអង់គ្លេស ៥០រូបហើយ បានលាលែងតំណែង