ព័ត៌មានអន្ដរជាតិ

FBI រកឃើញគ្រាប់បែកច្នៃ១៥០គ្រាប់ក្នុងផ្ទះបុរសម្នាក់នៅរដ្ឋVirginia

បានផុស

១ year មុន

នៅ

ថ្ងៃព្រហស្បតិ៍ ២ មករា ២០២៥

ដោយ

ស្របពេលមានអំពើហិង្សានិងការសង្ស័យជាប់ពាក់ព័ន្ធអំពើភេរវកម្មនៅសហរដ្ឋអាមេរិក ការផ្សាយរបស់ទីភ្នាក់ងារព័ត៌មានAP បានឲ្យដឹងថា ការិយាល័យស៊ើបអង្កេតសហព័ន្ធសហរដ្ខអាមេរិក (FBI) បានរកឃើញឃ្លាំងផ្ទុកគ្រឿងផ្ទុះដ៏ធំបំផុតមួយនៅក្នុងផ្ទះរបស់បុរសម្នាក់នៅរដ្ឋ Virginia ដែលជាការរកឃើញគ្រាប់បែកកែច្នៃក្នុងចំនួនដ៏ច្រើនមិនធ្លាប់មាន។

AP បានយោងឯកសាររបស់រដ្ឋអាជ្ញាសហព័ន្ធ បានលាតត្រដាងឲ្យឃើញថា ក្រុមអ្នកស៊ើបអង្កេតបានរឹបអូសគ្រាប់បែកបំពង់ជាង១៥០ និងឧបករណ៍ផលិតនៅផ្ទះផ្សេងទៀតនៅពេលដែលពួកគេបានឆែកឆេរផ្ទះរបស់លោក Brad Spafford ភាគពាយព្យនៃទីក្រុង Norfolk កាលពីថ្ងៃទី១៧ខែធ្នូ ដែលជាការរឹបអូសដ៏ធំបំផុតក្នុងប្រវត្តិសាស្ត្រការរឹបអូសរបស់ FBI។

អំឡុងពេលឆែកឆេរ FBI បានរកឃើញកាំភ្លើងវែង និងគ្រឿងផ្ទុះមួយចំនួន។ អ្នកបច្ចេកទេសបានបំផ្ទុះវាចោលភាគច្រើននៅលើទីតាំងនោះ ព្រោះមិនមានសុវត្ថិភាពក្នុងការដឹកជញ្ជូន និងមួយចំនួនត្រូវបានរក្សាទុកសម្រាប់ការវិភាគ។

យោងតាមឯកសាររបស់តុលាការបានឱ្យដឹងថា គ្រាប់បែកភាគច្រើនត្រូវបានគេរកឃើញនៅក្នុងយានដ្ឋានមួយនៅផ្ទះនៅ Isle of Wight County រួមជាមួយនឹងឧបករណ៍ និងសម្ភារសម្រាប់ផលិតគ្រាប់បែក។ គ្រាប់បែកបំពង់ទាំងនោះត្រូវបានដាក់ក្នុងកាបូបស្ពាយនៅក្នុងបន្ទប់គេងរបស់ផ្ទះ ដោយគ្មានសុវត្ថិភាព ខណៈនៅក្នុងផ្ទះមានប្រពន្ធ និងកូនតូចពីរនាក់របស់ថែមទៀត។

បន្ទាប់ពីការរកឃើញនេះលោក Spafford អាយុ ៣៦ឆ្នាំត្រូវបានចោទប្រកាន់ពីបទកាន់កាប់អាវុធដោយបំពានច្បាប់ជាតិអាវុធ។ មន្ត្រីអនុវត្តច្បាប់ចោទថាលោកថែមទាំងមានកាំភ្លើងខ្លីមិនបានចុះបញ្ជីថែមទៀត។ លើសពីនេះព្រះរាជអាជ្ញាថាលោកប្រឈមមុខនឹង ការចោទប្រកាន់ដែលអាចមានបន្ថែមជាច្រើនទាក់ទងនឹងគ្រឿងផ្ទុះ។

គួររម្លឹកថាការស៊ើបអង្កេតបានចាប់ផ្តើមនៅឆ្នាំ ២០២៣ នៅពេលដែលអ្នកផ្តល់ព័ត៌មានបានប្រាប់អាជ្ញាធរថាលោក Spafford កំពុងស្តុកទុកអាវុធ និងគ្រាប់រំសេវ ។ អ្នកផ្តល់ព័ត៌មានដែលជាមិត្តម្នាក់បានប្រាប់អាជ្ញាធរថាលោក Spafford បានខូចដៃរបស់គាត់នៅឆ្នាំ ២០២១ ដោយមានម្រាមដៃទែពីរនៅដែស្ដាំប៉ុណ្ណោះ ខណៈពេលលោកកំពុងធ្វើគ្រឿងផ្ទុះនៅផ្ទះ។ អ្នកផ្តល់ព័ត៌មានបានប្រាប់អាជ្ញាធរថាលោក Spafford ទំនងជាគ្រោងកំណត់គោលដៅដោយហេតុផលនយោបាយ។

នៅក្នុងសវនាការកាលពីថ្ងៃអង្គារ ចៅក្រមសហព័ន្ធ Lawrence Leonard បានកំណត់ថា Spafford អាចត្រូវបានដោះលែងឱ្យជាប់ឃុំក្នុងផ្ទះនៅផ្ទះម្តាយរបស់គាត់ ប៉ុន្តែបានយល់ព្រមរក្សាគាត់ឱ្យជាប់ឃុំខណៈពេលដែលរដ្ឋាភិបាលដាក់អំណះអំណាងបន្ថែមទៀត។

ចំណែកមេធាវីការពារក្តីលោក Spafford បានសរសេរថា «មិនមានភស្តុតាងមួយចំនួននៅក្នុងកំណត់ត្រាដែលថាលោក Spafford ធ្លាប់បានគំរាមកំហែងនរណាម្នាក់ទេ ហើយការចោទប្រកាន់ថានរណាម្នាក់អាចមានគ្រោះថ្នាក់ដោយសារតែទស្សនៈនយោបាយ និងការបញ្ចេញមតិរបស់ពួកគេគឺមិនសមហេតុសមផលទេ»៕

អត្ថបទ៖ ប៊ុន សុភាព