អាល្លឺម៉ង់ ប្រកាសអស់អាវុធផ្ដល់ឲ្យ អ៊ុយក្រែន ទៀតហើយ

រដ្ឋមន្ត្រីការពារជាតិអាល្លឺម៉ង់លោក Christine Lambrecht បាននិយាយកាលពីថ្ងៃអង្គារថា កងកម្លាំងប្រដាប់អាវុធអាល្លឺម៉ង់កំពុងអស់អាវុធផ្គត់ផ្គង់ដល់អ៊ុយក្រែនទៀតហើយ ប៉ុន្តែទីក្រុងកៀវនៅតែអាចពឹងផ្អែកលើជំនួយផ្សេងៗរបស់ទីក្រុងបែរឡាំងបាននាពេលអនាគត ។

លោក Lambrecht បាននិយាយប្រាប់ទីភ្នាក់ងារសារព័ត៌មាន DPA របស់ប្រទេសអាល្លឺម៉ង់ថា “ពេលនេះយើងមិនអាចបញ្ជូនអាវុធជាច្រើនចេញពីឃ្លាំងរបស់កងកម្លាំងប្រដាប់អាវុធរបស់យើងផ្ដល់ទៅរដ្ឋាភិបាលទីក្រុងកៀវបានទៀតទេ” ។

លោករដ្ឋមន្ត្រីបាននិយាយទៀតថា ចំណែកសមភាគីអ៊ុយក្រែនគឺលោក Oleksii Reznikov ក៏ត្រូវបានជូនដំណឹងរួចហើយផងដែរអំពីសមត្ថភាពមានកំណត់របស់កងកម្លាំងប្រដាប់អាវុធរបស់អាល្លឺម៉ង់ ប៉ុន្តែទីក្រុងបែរឡាំងនៅតែអាចគាំទ្រជំនួយមួយចំនួនទៅដល់រដ្ឋាភិបាលទីក្រុងកៀវនាពេលអនាគត ។

កាលពីដើមខែនេះ ក្រសួងកិច្ចការសេដ្ឋកិច្ចអាល្លឺម៉ង់បានប្រកាសថា អ៊ុយក្រែនបានក្លាយជាប្រទេសនាំចូលអាវុធធំទី ២ របស់អាល្លឺម៉ង់ បន្ទាប់ពីទីក្រុងបែរឡាំងបានអនុម័តការនាំចេញអាវុធមានតម្លៃរហូតដល់ ៥៨៤ លានដុល្លារទៅកាន់អ៊ុយក្រែនក្នុងរយៈពេល ៦ ខែដំបូងនៃឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន នឹងផ្ដាច់ទំនាក់ទំនងជាមួយប្រទេសសម្ព័ន្ធមិត្ត រុស្ស៊ី ភ្លាម បើកងទ័ពហ៊ានចូលទឹកដីខ្លួន