អ៊ុយក្រែន នឹងផ្ដាច់ទំនាក់ទំនងជាមួយប្រទេសសម្ព័ន្ធមិត្ត រុស្ស៊ី ភ្លាម បើកងទ័ពហ៊ានចូលទឹកដីខ្លួន

រដ្ឋមន្ត្រីការបរទេសអ៊ុយក្រែនលោក Dmitry Kuleba បាននិយាយនៅក្នុងបទសម្ភាសន៍មួយជាមួយទស្សនាវដ្តី Forbes កាលពីថ្ងៃអង្គារថា អ៊ុយក្រែននឹងផ្តាច់ទំនាក់ទំនងការទូតជាមួយប្រទេសបេឡារុសភ្លាម ប្រសិនបើកងទ័ពរបស់ប្រទេសសម្ព័ន្ធមិត្តរុស្ស៊ីមួយនេះឆ្លងចូលទៅក្នុងទឹកដីអ៊ុយក្រែន ។

ការព្រមានរបស់លោក Kuleba បានកើតឡើង ខណៈដែលកន្លងមករដ្ឋមន្ត្រីការបរទេសរូបនេះតែងតែសង្កត់ធ្ងន់ថា ទីក្រុងកៀវបានចាត់ទុករដ្ឋាភិបាលទីក្រុង Minsk របស់ប្រទេសបេឡារុសជាអ្នកចូលរួមយ៉ាងសកម្មនៃប្រតិបត្តិការយោធាពិសេសរបស់រុស្ស៊ីនៅអ៊ុយក្រែន ។

លោករដ្ឋមន្ត្រីបាននិយាយថា “យើងបានផ្តាច់ទំនាក់ទំនងការទូតជាមួយសហព័ន្ធរុស្ស៊ីភ្លាមៗ បន្ទាប់ពីការចាប់ផ្តើមសង្គ្រាមលុកលុយទ្រង់ទ្រាយធំមកលើទីក្រុងកៀវ ។ ដូចគ្នានេះដែរ ទំនាក់ទំនងការទូតជាមួយបេឡារុសក៏នឹងត្រូវកាត់ផ្តាច់ ប្រសិនបើកងកម្លាំងប្រដាប់អាវុធនៃសាធារណរដ្ឋបេឡារុសឆ្លងកាត់ព្រំដែនអ៊ុយក្រែន” ។

ស្ថានភាពចូលរួមរបស់កងទ័ពនៅតាមខ្សែបន្ទាត់នៃតំបន់ Donbass បានកើនឡើងនៅថ្ងៃទី ១៧ ខែកុម្ភៈ បន្ទាប់ពីសាធារណរដ្ឋប្រជាមានិត Donetsk និង Lugansk រាយការណ៍ពីការទម្លាក់គ្រាប់បែកទ្រង់ទ្រាយធំដោយយោធាអ៊ុយក្រែនក្នុងរយៈពេលប៉ុន្មានខែថ្មីៗនេះ ដែលបានបំផ្លាញហេដ្ឋារចនាសម្ព័ន្ធស៊ីវិល និងបណ្តាលឲ្យជនស៊ីវិលជាច្រើនស្លាប់បាត់បង់ជីវិត ។

ក្រោយមកនៅថ្ងៃទី ២១ ខែកុម្ភៈ ប្រធានាធិបតីរុស្ស៊ីលោក Vladimir Putin បានប្រកាសទទួលស្គាល់អធិបតេយ្យភាពរបស់សារធារណរដ្ឋមានិត Donetsk និង Lugansk ហើយបានចុះហត្ថលេខាលើកិច្ចព្រមព្រៀងស្តីពីមិត្តភាព កិច្ចសហប្រតិបត្តិការ និងជំនួយទៅវិញទៅមកជាមួយមេដឹកនាំរបស់ពួកគេ ។

៣ ថ្ងៃក្រោយមក ពោលនៅថ្ងៃទី២៤ ខែកុម្ភៈ លោក Putin បានប្រកាសឆ្លើយតបនឹងសំណើរបស់ប្រមុខនៃសាធារណរដ្ឋ Donbass សម្រាប់ជំនួយផ្សេងៗ ហើយបានធ្វើការសម្រេចចិត្តដើម្បីធ្វើប្រតិបត្តិការយោធាពិសេសមួយនៅអ៊ុយក្រែន ខណៈដែលមេដឹកនាំរុស្ស៊ីបានសង្កត់ធ្ងន់ថា ទីក្រុងមូស្គូមិនមានផែនការកាន់កាប់ទឹកដីអ៊ុយក្រែនឡើយ ដោយកត់សម្គាល់ថា ប្រតិបត្តិការនេះគឺសំដៅលើការបំផ្លិចបំផ្លាញ និងដើម្បីធ្វើឲ្យតំបន់គ្មានយោធារបស់អ៊ុយក្រែនតែប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ អាមេរិក ឲ្យអឺរ៉ុបប្រាប់ចំៗអាវុធដែល អ៊ុយក្រែន ត្រូវការ ដើម្បីងាយស្រួលផលិត