អាមេរិក ប្រកាសធ្វើសកម្មភាពយោធា ក្បែរកោះ តៃវ៉ាន់

សេតវិមានបានប្រកាសកាលពីថ្ងៃព្រហស្បតិ៍ទី០៤ខែសីហាថា នាវា និងយន្តហោះរបស់កងទ័ពជើងទឹកអាមេរិក នឹងធ្វើដំណើរឆ្លងកាត់ច្រកសមុទ្រតៃវ៉ាន់ ក្នុងរយៈពេលពីរសប្តាហ៍ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រុមប្រឹក្សាសន្តិសុខជាតិ លោក John Kirby បានថ្កោលទោសការធ្វើសមយុទ្ធយោធារបស់ចិននៅក្នុងតំបន់ ហើយនិយាយថា មន្ទីរបញ្ចកោណបានបញ្ជាឲ្យនាវាផ្ទុកយន្តហោះ USS Ronald Reagan និងកងកម្លាំងអម ត្រូរក្សាវត្តមាននៅជិតកោះតៃវ៉ាន់ ដើម្បីតាមដានស្ថានការណ៍។

នាវា Reagan និងកប៉ាល់អមដំណើរ គឺមានមូលដ្ឋាននៅក្នុងប្រទេសជប៉ុន ហើយត្រូវបានដាក់ពង្រាយទៅកាន់សមុទ្រចិនខាងកើត នារយៈពេលប៉ុន្មានថ្ងៃថ្មីៗនេះ ខណៈប្រធានសភាអាមេរិកលោកស្រី Nancy Pelosi ទៅបំពេញទស្សនកិច្ចនៅទីក្រុងតៃប៉ិ ផ្គើននឹងការគំរាមរបស់ចិន។

ទីក្រុងប៉េកាំង បានឆ្លើយតបទៅនឹងដំណើរទស្សនកិច្ចរបស់លោកស្រី Pelosi ជាមួយការធ្វើសមយុទ្ធទ្រង់ទ្រាយធំនៅជុំវិញកោះតៃវ៉ាន់ ហើយបាញ់មីស៊ីលរាប់សិបគ្រាប់រំលងកោះនេះ។

យោងតាមលោក Kirby បានឲ្យដឹងថា ចំពេលមានភាពតានតឹងកាន់តែខ្លាំង ប្រធានាធិបតីសហរដ្ឋអាមេរិក លោក Joe Biden បានសម្រេចចិត្ត បញ្ជាឲ្យក្រុមវាយប្រហារនាវាផ្ទុកយន្តហោះអាមេរិក បន្តឈរជើងនៅក្នុងតំបន់ យូរជាងការគ្រោងទុកបន្តិច។

អ្នកនាំពាក្យរូបនេះក៏បានថ្កោលទោសការសាកល្បងមីស៊ីលរបស់ចិនផងដែរថា ជាទង្វើគ្មានទំនួលខុសត្រូវ ហើយផ្ទុយពីគោលដៅយូរអង្វែងក្នុងការរក្សាសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ និងក្នុងតំបន់។

លោកនិយាយថា “យើងនឹងមិនត្រូវបានគេរារាំងពីប្រតិបត្តិការនៅក្នុងសមុទ្រ និងផ្ទៃមេឃនៃតំបន់ប៉ាស៊ីហ្វិកខាងលិច ស្របតាមច្បាប់អន្តរជាតិ ដូចដែលយើងធ្វើអស់រយៈពេលជាច្រើនទសវត្សរ៍ ដោយគាំទ្រតៃវ៉ាន់ និងការពារតំបន់ឥណ្ឌូប៉ាស៊ីហ្វិក ដែលសេរី និងបើកចំហ”។

លោក Kirby បន្ថែមថា ជាផ្នែកនៃកិច្ចខិតខំប្រឹងប្រែងនោះ សហរដ្ឋអាមេរិកនឹងធ្វើប្រតិបត្តិការ ផ្លូវអាកាស និងដែនសមុទ្រស្តង់ដារ ឆ្លងកាត់ច្រកសមុទ្រតៃវ៉ាន់ក្នុងរយៈពេលពីរសប្តាហ៍ខាងមុខ៕

ប្រែសម្រួល៖​ Vann Vann

ប្រភព៖ RT

ចុចអាន៖ កងទ័ពតៃវ៉ាន់ ប្រកាសត្រៀមធ្វើសង្គ្រាម ជាមួយ ចិន