តៃវ៉ាន់ រកឃើញមីកញ្ចប់ វៀតណាម ជាង១តោន មានផ្ទុកសារធាតុ បង្កជំងឺមហារីក និងសរសៃប្រសាទ

កោះតៃវ៉ាន់ ​បានបញ្ជូន​មីកញ្ចប់ម៉ាក Omachi​ ទម្ងន់សរុប ១.៤៤ តោន ទៅឲ្យប្រទេសវៀតណាម​​វិញ ដោយ​និយាយ​ថា មីទាំងនោះមានផ្ទុក​សារធាតុ ​អេទីឡែនអុកស៊ីដ ដែល​បង្កទៅជាជំងឺមហារីក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋបាលចំណីអាហារ និងឱសថតៃវ៉ាន់ បានរកឃើញថា មីដែលនាំចូលដោយក្រុមហ៊ុនចិន Qianyu គឺមានផ្ទុកសារធាតុអេទីឡែនអុកស៊ីដ ០.១៩៥មីលីក្រាមក្នុងមួយគីឡូក្រាម ដែលលើសពីស្តង់ដាររបស់តៃវ៉ាន់។

សារធាតុអេទីឡែនអុកស៊ីដ ត្រូវបានហាមប្រាមក្នុងចំណីអាហារនៅតៃវ៉ាន់ ដោយសារអាជ្ញាធរចាត់ទុកវាជាសារធាតុបង្កជំងឺមហារីក និងជំងឺសរសៃប្រសាទមួយចំនួន។

ក្រុមហ៊ុន Masan Consumer បាននិយាយថា ខ្លួនមិនបានលក់មីទៅឲ្យក្រុមហ៊ុន Qianyu ទេ ថ្វីបើខ្លួនបានផលិតមីសម្រាប់ទីផ្សារតៃវ៉ាន់ក៏ដោយ។

ប្រទេស និងទឹកដីនីមួយៗមានស្តង់ដារអាហាររបស់ខ្លួន ដូច្នេះហើយក្រុមហ៊ុន Masan Consumer បានផលិត ផលិតផលជាពិសេសសម្រាប់ប្រទេស និងទឹកដីនីមួយៗ។ យើង​មាន​លក្ខខណ្ឌ​តឹងរ៉ឹង​ជាមួយ​អ្នក​ចែកចាយ ដើម្បី​ការពារ​ពួកគេ​ពី​ការ​នាំ​ចេញ​ផលិតផល​ពី​ទីផ្សារ​មួយ​ទៅ​ទីផ្សារ​មួយ​ទៀត។

ក្រុមហ៊ុន Masan Consumer បញ្ជាក់ថា មីម៉ាក Omachi គឺបំពេញតាមស្តង់ដារអាហាររបស់ប្រទេសវៀតណាម និងមានសុវត្ថិភាពសម្រាប់អ្នកប្រើប្រាស់។

ខណៈពេលនេះ ក្រសួង​ឧស្សាហកម្ម និង​ពាណិជ្ជកម្ម​វៀត​ណាម​កំពុង​ពិនិត្យ​មើល​បញ្ហា​នេះ៕

ប្រែសម្រួល៖ Vann Vann

ប្រភព៖ VN Express

ចុចអាន៖ ប្រទេសអឺរ៉ុប រកឃើញ មីវៀតណាម ២ប្រភេទ មានផ្ទុកសារធាតុគីមី សម្លាប់សត្វល្អិត