ព័ត៌មានអន្ដរជាតិ

តុលាការយោធាមីយ៉ាន់ម៉ា កាត់ទោសលោកស្រី ស៊ូជី ឲ្យជាប់ពន្ធនាគារ ៣ឆ្នាំទៀត (មានវីដេអូ)

បានផុស

២ years មុន

នៅ

ថ្ងៃសុក្រ ២ កញ្ញា ២០២២

ដោយ

តុលាការដែលគ្រប់គ្រងដោយយោធាក្នុងប្រទេសមីយ៉ាន់ម៉ា បានកាត់ទោសលោកស្រី អ៊ុងសាន ស៊ូជី ឲ្យជាប់ពន្ធនាគាររយៈពេល៣ឆ្នាំបន្ថែមទៀត លើការចោទប្រកាន់ពីបទក្លែងបន្លំសន្លឹកឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន លោកស្រី ស៊ូជី ត្រូវបានកាត់ទោសឲ្យជាប់ពន្ធនាគារ២០ឆ្នាំ លើបទចោទប្រកាន់១១ករណី ខណៈនៅសល់ការចោទប្រកាន់មួយចំនួនទៀត មិនទាន់កាត់ក្តី។

ទោះបីជាយ៉ាងណាក៏ដោយ លោកស្រីបានបដិសេធរាល់ការចោទប្រកាន់ ហើយការកាត់ក្តីនេះត្រូវបានថ្កោលទោសដោយក្រុមសិទ្ធិមនុស្សថាជា រឿងនយោបាយ។

ប្រសិនបើត្រូវបានកាត់ទោសលើការចោទប្រកាន់ទាំងអស់មែននោះ លោកស្រីអាចប្រឈមមុខនឹងការជាប់ពន្ធនាគាររយៈពេលជិត ២០០ ឆ្នាំ។

មេធាវីរបស់លោកស្រី និយាយថា ការកាត់ទោសថ្មីនេះ រួមបញ្ចូលទាំងការធ្វើពលកម្មធ្ងន់ធ្ងរផងដែរ។

សាធារណជន និងប្រព័ន្ធផ្សព្វផ្សាយ មិនអាចដឹងព័ត៌មានអំពីសវនាការបិទទ្វារបានទេ ហើយយោធាបានរារាំងមេធាវីរបស់លោកស្រី មិនឲ្យនិយាយជាមួយអ្នកកាសែត។

តុលាការបានរកឃើញថា លោកស្រីមានទោសពីបទក្លែងបន្លំក្នុងការបោះឆ្នោតសកលខែវិច្ឆិកា ឆ្នាំ ២០២០ ដែលគណបក្សរបស់លោកស្រី គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) បានទទួលជ័យជម្នះភ្លូកទឹកភ្លូកដី។

កងទ័ពបានធ្វើរដ្ឋប្រហារកាលពីឆ្នាំមុន បន្ទាប់ពីចោទប្រកាន់ថា មានការក្លែងបន្លំសន្លឹកឆ្នោតយ៉ាងច្រើននៅក្នុងការបោះឆ្នោត ប៉ុន្តែអ្នកសង្កេតការណ៍ការបោះឆ្នោតឯករាជ្យអះអាងថា ការបោះឆ្នោតគឺ “តំណាងឲ្យឆន្ទៈរបស់ប្រជាជន”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ លោក មីន អ៊ុងឡាំង៖ លោកស្រី អ៊ុងសាន ស៊ូជី អាច វិល ត្រឡប់ ទៅ ផ្ទះ ក្រោយ សាលក្រមបញ្ចប់