ព័ត៌មានអន្ដរជាតិ

លោក មីន អ៊ុងឡាំង៖ លោកស្រី អ៊ុងសាន ស៊ូជី អាចវិលត្រឡប់ទៅផ្ទះ ក្រោយសាលក្រមបញ្ចប់

បានផុស

៣ years មុន

នៅ

ថ្ងៃសៅរ៍ ២០ សីហា ២០២២

ដោយ

មេដឹកនាំយោធាមីយ៉ាន់ម៉ាបាននិយាយកាលពីថ្ងៃសុក្រទី១៩ខែសីហាថា លោកនឹងពិចារណាអនុញ្ញាតឲ្យ លោកស្រី អ៊ុងសាន ស៊ូជី ផ្ទេរពីពន្ធនាគារទៅការឃុំខ្លួនក្នុងផ្ទះវិញ បន្ទាប់ពីសាលក្រមក្នុងសំណុំរឿងមួយចំនួនប្រឆាំងនឹងលោកស្រី ត្រូវបានបញ្ចប់។

កងទ័ពនិយាយថា លោកស្រី ស៊ូជី ដែលត្រូវបានបណ្តេញចេញនៅក្នុងរដ្ឋប្រហារយោធាកាលពីឆ្នាំមុន ត្រូវបានផ្ទេរទៅពន្ធនាគារក្នុងរដ្ឋធានី Naypyitaw កាលពីមិថុនា។

ម្ចាស់ជយលាភីពានរង្វាន់ណូបែល និងនិមិត្តរូបលទ្ធិប្រជាធិបតេយ្យ អាយុ៧៧ឆ្នាំរូបនេះ បានចំណាយពេលប្រហែលពាក់កណ្តាលនៃរយៈពេលបីទសវត្សរ៍ចុងក្រោយ ក្រោមការឃុំខ្លួនក្នុងផ្ទះ។

ចាប់តាំងពីរដ្ឋប្រហារមក លោកស្រី ស៊ូជី បានរងការចោទប្រកាន់ពីបទល្មើសយ៉ាងតិច ១៨ ចាប់ពីអំពើពុករលួយ រហូតដល់ការរំលោភការបោះឆ្នោត ហើយត្រូវបានកាត់ទោសឲ្យជាប់ពន្ធនាគារជាច្រើនឆ្នាំរួចមកហើយ។ យ៉ាងណាក្តី លោកស្រីបានហៅការចោទប្រកាន់ទាំងនេះថាមិនសមហេតុផល ហើយបដិសេធរាល់ការចោទប្រកាន់លើរូបគាត់។

សុន្ទរកថាជាលាយលក្ខណ៍អក្សររបស់ប្រមុខរដ្ឋាភិបាលលោក មីន អ៊ុងឡាំង បានធ្វើឡើងជាការឆ្លើយតបទៅនឹងសំណើរបស់មន្ត្រីជាន់ខ្ពស់អង្គការសហប្រជាជាតិ ដែលបានទៅបំពេញទស្សនកិច្ចនៅមីយ៉ាន់ម៉ាក្នុងសប្តាហ៍នេះ ហើយបានស្នើសុំឲ្យលោកស្រី ស៊ូជី អនុញ្ញាតត្រឡប់ទៅផ្ទះវិញ។

លោក មីន អ៊ុងឡាំង បាននិយាយក្នុងសេចក្តីថ្លែងការណ៍ថា “ខ្ញុំនឹងពិចារណាលើបញ្ហានេះបន្ទាប់ពីសាលក្រមត្រូវបានបញ្ចប់។ យើងមិនបានដាក់ការចោទប្រកាន់ខ្លាំងលើលោកស្រីទេ ហើយបានបង្ហាញការអាណិតអាសូរ ទោះបីជាយើងអាចធ្វើបានច្រើនជាងនេះក៏ដោយ”។

គួរបញ្ជាក់ថា លោកស្រី ស៊ូជី ដែលជាកូនស្រីរបស់វីរបុរសឯករាជ្យមីយ៉ាន់ម៉ា ត្រូវបានឃុំខ្លួនក្នុងផ្ទះជាលើកដំបូងនៅឆ្នាំ១៩៨៩ បន្ទាប់ពីបាតុកម្មទ្រង់ទ្រាយធំ ប្រឆាំងនឹងការគ្រប់គ្រងដោយយោធាអស់រយៈពេលជាច្រើនទសវត្សរ៍។ នៅឆ្នាំ១៩៩១ លោកស្រីបានឈ្នះពានរង្វាន់ណូបែលសន្តិភាព សម្រាប់ការធ្វើយុទ្ធនាការដើម្បីលទ្ធិប្រជាធិបតេយ្យ ហើយត្រូវបានដោះលែងទាំងស្រុងពីការឃុំខ្លួនក្នុងផ្ទះនៅឆ្នាំ២០១០៕

ប្រែសម្រួល៖ Vann Vann

ប្រភព៖ Straits Times

ចុចអាន៖ យោធា មី យ៉ាន់ ម៉ា ប្រតិកម្មខ្លាំងៗលើ អាស៊ាន បន្ទាប់ ពី ត្រូវ រារាំង មិនឲ្យ ប្រជុំ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត