រុស្ស៊ី កោះប្រជុំក្រុមប្រឹក្សាសន្តិសុខជាតិបន្ទាន់ ក្រោយការផ្ទុះលើស្ពានគ្រីមៀ

មន្ត្រីរុស្ស៊ីបាននិយាយថា លោកប្រធានាធិបតី វ្ល៉ាឌីមៀរ ពូទីន នឹងកោះប្រជុំក្រុមប្រឹក្សាសន្តិសុខនៅថ្ងៃចន្ទនេះ បន្ទាប់ពីការផ្ទុះនៅលើស្ពានដ៏សំខាន់មួយតភ្ជាប់តំបន់គ្រីមៀ និងរុស្ស៊ី ។

ទន្ទឹមនោះ ការិយាល័យ​ប្រធានាធិបតី​មិន​បាន​បង្ហាញ​ជា​សាធារណៈ​អំពីប្រធានបទ​អ្វី​ដែល​ក្រុម​ប្រឹក្សា​នឹងលើកយក​ពិភាក្សានោះទេ ប៉ុន្តែលោក ពូទីន អាចនឹងលើកយកបញ្ហាការបំផ្ទុះកាលពីថ្ងៃសៅរ៍ បន្ទាប់ពីលោក​បាន​បន្ទោស​អ៊ុយក្រែន​ចំពោះ​ឧប្បត្តិហេតុ​នេះ ដោយ​ហៅ​វា​ថា​ជា​អំពើ​ភេរវកម្ម ។

កាលពីថ្ងៃអាទិត្យ អ្នកនាំពាក្យប្រធានាធិបតីលោក Dmitry Peskov មិនបានផ្តល់ចម្លើយច្បាស់លាស់ណាមួយនោះទេ នៅពេលដែលទីភ្នាក់ងារព័ត៌មានរដ្ឋរបស់រុស្ស៊ីបានសួរថាតើគោលការណ៍ជាមូលដ្ឋានស្តីពីការប្រើប្រាស់អាវុធនុយក្លេអ៊ែរនឹងត្រូវបានអនុវត្ត បន្ទាប់ពីការផ្ទុះនេះឬយ៉ាងណា ខណៈរដ្ឋបាលលោក ​ពូទីន ​បាន​និង​កំពុង​គំរាម​ប្រើ​អាវុធ​បែប​នេះ ។

ដោយឡែកកាលពីខែមុន អតីតប្រធានាធិបតីលោក Dmitry Medvedev បានសរសេរនៅលើប្រព័ន្ធផ្សព្វផ្សាយសង្គមថា លក្ខខណ្ឌសម្រាប់ការប្រើប្រាស់អាវុធនុយក្លេអ៊ែររបស់រុស្ស៊ី រួមមានការវាយប្រហារនុយក្លេអ៊ែរប្រឆាំងនឹងប្រទេសរបស់យើង ក៏ដូចជាការប្រព្រឹត្តទង្វើឈ្លានពានដោយប្រើអាវុធមិនធម្មតាណាមួយដែលគំរាមកំហែងដល់អត្ថិភាពនៃប្រទេសរបស់យើង ។

គួរបញ្ជាក់ថា ការផ្ទុះលើស្ពានដែលតភ្ជាប់ឧបទ្វីបគ្រីមៀទៅកាន់កាន់រុស្ស៊ីដីគោកកាលពីថ្ងៃសៅរ៍ បណ្ដាលឲ្យមនុស្សចំនួន ៣ ​នាក់​ស្លាប់ ហើយភ្លាមៗនោះ ការផ្ទុះក៏បាននាំឲ្យមានការផ្អាកជាបណ្តោះអាសន្ននូវចរាចរណ៍ផ្លូវគោក និងផ្លូវដែក ប៉ុន្តែបានដំណើរការឡើងវិញនៅល្ងាចថ្ងៃដដែលនោះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ពូទីន អះអាងថា អ៊ុយក្រែន ជាអ្នកនៅពីក្រោយការវាយប្រហារភេរវកម្មលើស្ពាន គ្រីមៀ