ប្រទេស អឺរ៉ុប សម្រុកបញ្ជាទិញម៉ាស៊ីនកម្ដៅអគ្គិសនីពី ចិន ខណៈរដូវរងាខិត​ជិតមកដល់

កង្វះការផ្គត់ផ្គង់ឧស្ម័ននៅអឺរ៉ុបដែលបង្កឡើងដោយសង្គ្រាមលុកលុយរបស់រុស្ស៊ីលើអ៊ុយក្រែន បានបង្កឲ្យមានការបញ្ជាទិញម៉ាស៊ីនកម្ដៅអគ្គិសនីយ៉ាងច្រើនក្រាស់ក្រែលពីរោងចក្រក្នុងប្រទេសចិន ស្របពេលដែលរដូវរងានៅអឺរ៉ុបខិតជិតមកដល់ ។

យោងតាមលោក Chen Wen អ្នកគ្រប់គ្រងការផលិតក្នុងរោងចក្រមួយកន្លែងនៅខេត្ត Zhejiang ភាគខាងកើតប្រទេសចិនបានឲ្យដឹងថា ការបញ្ជាទិញ និងលក់ឧបករណ៍កម្ដៅអគ្គិសនីពីសហភាពអឺរ៉ុបបានកើនឡើងជាង ៥៥ ភាគរយចន្លោះខែមករា ដល់ខែសីហាឆ្នាំ ២០២២ នេះ ។

លោក Chen Wen បាននិយាយទៀតថា បច្ចុប្បន្នខ្សែសង្វាក់ផលិតលើកដំបូងរបស់យើង គឺផលិតម៉ាស៊ីនកម្ដៅសម្រាប់អតិថិជនអាល្លឺម៉ង់ ហើយការផលិតលើកទី ២ នឹងត្រូវបញ្ជូនទៅចក្រភពអង់គ្លេស ខណៈខ្សែសង្វាក់ផលិតកម្មបន្ទាប់មកទៀត គឺការផលិតម៉ាស៊ីនកម្ដៅអគ្គិសនីសម្រាប់អតិថិជននៅប្រទេសបារាំង ។

ស្របពេលជាមួយគ្នានេះ ដោយសារផ្ទះជាច្រើននៅអឺរ៉ុបកំពុងប្រើកម្ដៅឧស្ម័នទាំងក្នុងស្ថានភាពខ្វះខាតនោះ, ក្រុមហ៊ុនផ្គត់ផ្គង់របស់ចិនកំពុងធ្វើការបន្ថែមម៉ោង សម្រាប់ការផលិតម៉ាស៊ីនកម្ដៅអគ្គិសនី ដើម្បីបំពេញតាមតម្រូវការជាច្រើនសប្តាហ៍ទៅមុខ នៅមុនរដូវរងាអឺរ៉ុបមកដល់ ។

ជាពិសេស ម៉ាស៊ីនកម្ដៅអគ្គីសនីដែលផលិតនៅក្នុងប្រទេសចិន មានតម្លៃថោកជាងក្រុមហ៊ុនផលិតរបស់សហភាពអឺរ៉ុប ហើយវាត្រូវបានគេមើលឃើញថា ចិនកំពុងទាញយកផលប្រយោជន៍ពីការកើនឡើងនៃតម្រូវការនេះផងដែរ ។

បន្ថែមពីនេះ សង្គ្រាមលុកលុយរបស់រុស្ស៊ីនៅអ៊ុយក្រែនក៏បានធ្វើឲ្យការផ្គត់ផ្គង់ និងតម្លៃឧស្ម័ននៅក្នុងសហភាពអឺរ៉ុបមិនមានលំនឹងផងដែរ ដោយធ្វើឲ្យបណ្តាប្រទេសសហភាពអឺរ៉ុបប្រើវិធានការកាត់បន្ថយថាមពល និងបង្កើនទុនបម្រុងឧស្ម័នជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ SCMP

ចុចអាន ៖ អ្នកនាំពាក្យការបរទេស ចិន ឆ្លើយយ៉ាងខ្លីរឿងលោក ហ៊ូ ជីនតាវ ត្រូវបណ្ដើរ​ចេញពីសមាជបក្ស